ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນາຍົກລັດຖະມົນຕີ ລົງຊຸກຍູ້ ຂະບວນການຜະລິດລະດູແລ້ງ ຢູ່ແຂວງ ໄຊຍະບູລີ

ໃນວັນທີ 3 ມີນາ 2020 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ຂະບວນການຜະລິດລະດູແລ້ງຢູ່ແຂວງໄຊຍະບູລີ. ໃຫ້ການຕ້ອນຮັບທ່ານນາຍົກລັດຖະມົນຕີ ພ້ອມຄະນະ ແມ່ນທ່ານ ພົງສະຫວັນ ສິດທະວົງ, ເຈົ້າແຂວງໆໄຊຍະບູລີ, ພ້ອມດ້ວຍການນໍາທຸກພາກສ່ວນຂອງແຂວງ ແລະ ເມືອງ ໄຊຍະບູລີ ໃຫ້ການຕ້ອນຮັບຢ່າງພ້ອມພຽງ. ໃນໂອກາດນີ້, ຄະນະຂອງ ທ່ານນາຍົກລັດຖະມົນຕີໄດ້ໄປຢ້ຽມຢາມກຸ່ມຊາວນາເຂດບ້ານ ນາລາ ເມືອງໄຊຍະບູລີ ພ້ອມທັງໄດ້ຮັບຟັງການລາຍງານຫຍໍ້ກ່ຽວກັບການຜະລິດເຂົ້າສະອາດເປັນສິນຄ້າ ພາຍໃນບ້ານ ນາລາ ເມືອງ ໄຊຍະບູລີ, ເຊິ່ງລາຍງານໂດຍ ທ່ານ ສົມຈິດ ພູມມາກອງສີ ຫົວໜ້າກຸ່ມຜະລິດແນວພັນເຂົ້າສະອາດເປັນສິນຄ້າ. ທ່ານໄດ້ກ່າວ່າ: ໃນລະດູແລ້ງປີ 2020 ນີ້, ຊາວນາເຂດ ບ້ານ ນາລາ ແມ່ນໄດ້ເຮັດນາແຊງທັງໝົດ 62,30 ເຮັກຕາ, ມີ 107 ຄອບຄົວ, ໃນນີ້: ກຸ່ມຜະລິດແນວພັນເຂົ້າ ມີ 21 ຄອບຄົວ; ມີເນື້ອທີ່ 19,45 ເຮັກຕາ ເຊິ່ງເປັນການຜະລິດແນວພັນເຂົ້າລະດູທຳອິດຂອງກຸ່ມ ຊະນິດແນວພັນເຂົ້າທີ່ຜະລິດແມ່ນ ເຂົ້າຖິ່ນແກ້ວ 17 ລຸ້ນ 3, ກຸ່ມຜະລິດເຂົ້າສະອາດ ເພື່ອຂາຍສິນຄ້າ ມີ 47 ຄອບຄົວ, ມີເນື້ອທີ່ 38,47 ເຮັກຕາ ແລະ ຊາວນາປູກເຂົ້າທົ່ວໄປທີ່ບໍ່ເຂົ້າຮ່ວມໂຄງການມີ 39 ຄອບຄົວ, ເນື້ອທີ່ 4,38 ເຮັກຕາ, ສ່ວນການເຄື່ອນໄຫວ ແລະ ຈັດຕັ້ງປະຕິບັດຂອງກຸ່ມແມ່ນຈະໄດ້ປະຕິບັດຕາມຂັ້ນຕອນ ແລະ ມີຕ໋ອງໂສ້ການຜະລິດດັ່ງນີ້: ກຸ່ມຜະລິດແນວພັນ ແມ່ນຈະໄດ້ຜະລິດແນວພັນເຂົ້າສະອາດລຸ້ນ 3 ເພື່ອຂາຍໃຫ້ແກ່ກຸ່ມໂຮງສີເຂົ້າ ແລະ ກຸ່ມໂຮງສີຈະນຳເອົາແນວພັນດັ່ງກ່າວໄປແຈກຢາຍໃຫ້ກຸ່ມຜະລິດເຂົ້າສະອາດເປັນສິນຄ້າໄປປູກ ເມື່ອໄດ້ຜົນຜະລິດແລ້ວ, ກຸ່ມໂຮງສີຈະຕ້ອງໄດ້ຊື້ຜົນຜະລິດ ນຳກຸ່ມຜະລິດຄືນ ເຊິ່ງການຊື້-ຂາຍແມ່ນປະຕິບັດຕາມສັນຍາຜູກພັນສອງສົ້ນລະຫວ່າງຜູ້ປະກອບການ ແລະ ຜູ້ຜະລິດ; ສ່ວນຜົນຜະລິດແມ່ນຈະເພີ່ມຂຶ້ນ ຈາກ 3 ໂຕນຕໍ່ເຮັກຕາເປັນ 3,5 ໂຕນຕໍ່ເຮັກຕາ. ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ເນັ້ນໜັກໃຫ້ກຸ່ມຜະລິດແນວພັນເຂົ້າສະອາດເປັນສິນຄ້າ ຈົ່ງເອົາໃຈໃສ່ໃນການບົວລະບັດຮັກສາ ເຂົ້າເປັນຕົ້ນແມ່ນ: ການໃສ່ຝຸ່ນ, ໃສ່ປຸຍຊີວະພາບໃຫ້ຖືກຕ້ອງຕາມມາດຕະຖານ, ລົກຫຍ້າ, ຂ້າແມງໄມ້ ເພື່ອໃຫ້ໄດ້ຮັບໝາກຜົນຕາມແຜນການທີ່ວາງໄວ້. ພ້ອມດຽວກັນນັ້ນ, ທ່ານນາຍົກລັດຖະມົນຕີ ກໍ່ໄດ້ມອບເງິນໃຫ້ກຸ່ມຊາວນາເພື່ອຈັດຊື້ເຄື່ອງຈັກຄັດແຍກເມັດເຂົ້າຄົບຊຸດ ຈໍານວນ 150 ລ້ານກີບ; ຈາກນັ້ນ, ທີມງານດັ່ງກ່າວກໍ່ໄດ້ໄປຢ້ຽມຢາມໂຮງງານອົບໝາກຖົ່ວເຫຼືອງ ແລະ ຢ້ຽມຊົມໂຄງການເກັບກູ້ໝາກຖົ່ວເຫຼືອງຂອງ ບໍລິສັດ ໄຮລິນ ທີ່ເມືອງພຽງ ຕື່ມອີກ.

ຂ່າວ-ພາບໂດຍ: ອຸ່ນເຮືອນ ໂພທິລັກ