ວັນທີ 5 ກັນຍາ 2024 ນີ້, ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວບົດຄຳເຫັນເພື່ອເຊີນປວງຊົນລາວບັນດາເຜົ່າ ມີສ່ວນຮ່ວມ ໃນການເປັນເຈົ້າພາບ ແລະ ປະທານອາຊຽນ ຂອງ ສປປ ລາວ ປີ 2024 ເຊິ່ງທ່ານໄດ້ຍົກໃຫ້ເຫັນວ່າ: ປີ 2024 ແມ່ນມີຄວາມໝາຍ ຄວາມສຳຄັນ ສຳລັບ ສປປ ລາວ, ເປັນປີທ່ອງທ່ຽວລາວ ແລະ ເປັນປີທີ່ ສປປ ລາວ ເປັນປະທານອາຊຽນ. ນັບແຕ່ ສປປ ລາວ ໄດ້ເຂົ້າເປັນສະມາຊິກອາຊຽນໃນວັນທີ 23 ກໍລະກົດ 1997 ເປັນຕົ້ນມາ, ສປປ ລາວ ໄດ້ປະກອບສ່ວນ ເຂົ້າໃນວຽກງານອາຊຽນ ຢ່າງຫ້າວຫັນ ແລະ ໄດ້ເປັນປະທານອາຊຽນ 3 ຄັ້ງ ຄື: ຄັ້ງທີ 1 ໃນປີ 2004-2005, ຄັ້ງທີ 2 ໃນປີ 2016, ແລະ ຄັ້ງທີ 3 ໃນປີ 2024 ໂດຍເລີ່ມແຕ່ວັນທີ 1 ມັງກອນ ຫາ ວັນ ທີ 31 ເດືອນທັນວາ 2024.
ການເຂົ້າເປັນສະມາຊິກອາຊຽນ ແລະ ການເຄື່ອນໄຫວວຽກງານອາຊຽນ ກໍຄືການເປັນປະທານອາຊຽນຂອງ ສປປ ລາວ ໄດ້ປະກອບສ່ວນສຳຄັນ ເຂົ້າໃນການຍົກສູງຖາ ນະບົດບາດຂອງ ສປປ ລາວ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ ແລະ ເປັນການໂຄສະນາເຜີຍແຜ່ຮີດຄອງປະເພນີອັນດີງາມຂອງຊາດລາວ ໃຫ້ຕ່າງປະເທດ ໄດ້ຮັບຮູ້ ພ້ອມທັງເປັນການດຶງດູດການສະໜັບສະໜູນ ແລະ ການຮ່ວມມື ກໍ່ຄືການຄ້າ-ການລົງທຶນ, ການທ່ອງທ່ຽວ ແລະ ການພັດທະນາຊັບພະຍາກອນມະນຸດ ຈາກບັນດາປະເທດອາຊຽນ ແລະ ບັນດາຄູ່ຮ່ວມມືພາຍນອກຂອງອາຊຽນ ເພື່ອມາສົມທົບກັບທ່າແຮງພາຍໃນ ໃນການຈັດຕັ້ງປະຕິບັດ ພາລະກິດປົກປັກຮັັກສາ ແລະ ສ້າງສາພັດທະນາ ສປປ ລາວ.
ການເປັນປະທານອາຊຽນ ຂອງ ສປປ ລາວໃນປີ 2024 ໄດ້ດຳເນີນພາຍໃຕ້ຄຳຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ຄໍາຂວັນດັ່ງກ່າວ ແມ່ນສອດຄ່ອງກັບນະໂຍບາຍ ແລະ ເປົ້າໝາຍຂອງ ສປປ ລາວ ໃນການຫັນປະເທດ ຈາກປະເທດທີ່ບໍ່ມີຊາຍແດນຕິດກັບທະເລ ໃຫ້ເປັນສູນກາງຂອງການເຊື່ອມໂຍງ-ເຊື່ອມຈອດຂອງພາກພື້ນ ແລະ ທັງສອດຄ່ອງກັບເປົ້າໝາຍລວມຂອງອາຊຽນ ໃນການສ້າງອາຊຽນໃຫ້ເປັນພາກພື້ນທີ່ມີການເຊື່ອມໂຍງ-ເຊື່ອມຈອດ ແລະ ມີຄວາມເຂັ້ມແຂງ ເພື່ອສາມາດຮັບມືກັບສິ່ງທ້າທາຍຕ່າງໆ ໄດ້ຢ່າງມີປະສິດທິພາບ ແລະ ທັນການ ໃນທ່າມກາງສະພາບການຂອງພາກພື້ນ ແລະ ຂອງໂລກທີ່ພວມຜັນແປໄປຢ່າງໄວວາ ແລະ ສະຫຼັບສັບຊ້ອນ.
ທ່ານ ນາຍົກລັດຖະມົນຕີ ກ່າວຕື່ມວ່າ: ການເປັນປະທານອາຊຽນຂອງ ສປປ ລາວ ໃນໄລຍະ 8 ເດືອນທີ່ຜ່ານມາ ໄດ້ຮັບຜົນສໍາເລັດເປັນກ້າວໆມາ. ບັນດາກະຊວງ-ຂະແໜງການຂອງ ສປປ ລາວ ພາຍໃຕ້ 3 ເສົາຄໍ້າປະຊາຄົມອາ ຊຽນ ໄດ້ສຳເລັດການເປັນເຈົ້າພາບ ແລະ ປະທານກອງປະຊຸມອາຊຽນໃນລະດັບຕ່າງໆ ພາຍໃຕ້ຄວາມຮັບ ຜິດຊອບຂອງຕົນ ຢ່າງມີຜົນສໍາເລັດ, ລວມທັງ ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມລະດັບລັດຖະມົນຕີຕ່າງປະເທດ ທີ່ກ່ຽວ ຂ້ອງ ຊຶ່ງຈັດຂຶ້ນໃນ ວັນທີ 24-27 ກໍລະກົດ 2024 ທີ່ນະຄອນຫຼວງວຽງຈັນ.
ຜົນສຳເລັດດັ່ງກ່າວ ແມ່ນໝາກຜົນລວມຂອງ ບັນດາກະຊວງ-ຂະແໜງການ ແລະ ການປະກອບສ່ວນຂອງທຸກພາກສ່ວນ ລວມທັງ ພໍ່ແມ່ພີ່ນ້ອງ ປະຊາຊົນລາວບັນດາເຜົ່າ, ພະນັກງານ, ທະຫານ, ຕຳຫຼວດ ແລະ ພາກທຸລະກິດ. ຂ້າພະເຈົ້າ ຂໍຖືໂອກາດນີ້ ສະແດງຄວາມຊົມເຊີຍຢ່າງຈິງໃຈ ຕໍ່ທຸກການປະກອບສ່ວນ ກໍ່ຄືຜົນສຳ ເລັດດັ່ງກ່າວ ໃນໄລຍະຜ່ານມາ ແລະ ພວກເຮົາຈະສືບຕໍ່ເປັນເຈົ້າພາບ ແລະ ປະທານກອງປະຊຸມຕ່າງໆຂອງອາຊຽນ ແຕ່ນີ້ຫາທ້າຍປີ 2024 ໃຫ້ສຳເລັດຜົນຕາມຄາດ ໝາຍ.
ສິ່ງສຳຄັນທີ່ສຸດ, ສປປ ລາວ ພວກເຮົາ ຈະໄດ້ເປັນເຈົ້າພາບ ແລະ ປະທານກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດ ທີ່ກ່ຽວ ຂ້ອງ ໃນລະຫວ່າງວັນທີ 8-11 ຕຸລາ 2024 ທີ່ນະຄອນຫລວງວຽງຈັນ ຊຶ່ງຈະມີບັນດາປະມຸກລັດ ຫຼື ຫົວໜ້າລັດຖະບານ ຈາກບັນດາປະເທດສະມາຊິກອາຊຽນ ແລະ ຄູ່ຮ່ວມມືພາຍນອກຂອງອາຊຽນ ລວມທັງໝົດ 20 ກວ່າປະເທດ ແລະ ຫົວໜ້າອົງ ການຈັດຕັ້ງພາກພື້ນ ແລະ ສາກົນ ເຂົ້າຮ່ວມ.
ຂ້າພະເຈົ້າ, ຕາງໜ້າໃຫ້ສູນກາງພັກ-ລັດຖະບານ ແລະ ປວງຊົນລາວທັງຊາດ, ຂໍຖືໂອກາດນີ້ ເຊີນຊວນ ພະນັກງານ, ທະຫານ, ຕໍາຫລວດ ແລະ ປະຊາຊົນລາວບັນດາເຜົ່າ ໃນທົ່ວປະເທດ ໃຫ້ການສະໜັບສະໜູນ ແລະ ພ້ອມໃຈກັນເປັນເຈົ້າພາບທີ່ດີ ດ້ວຍການປະກອບສ່ວນຕາມພາລະບົດບາດ ແລະ ຄວາມຮັບຜິດຊອບຂອງຕົນ ໂດຍສະເພາະ ການເອົາໃຈໃສ່ເຮັດວຽກປ້ອງກັນຊາດ-ປ້ອງກັນຄວາມສະຫງົບຢ່າງແຂງ ແຮງ, ອະນາໄມ-ປະດັບປະດາ ໃຫ້ມີຄວາມເປັນລະບຽບຮຽບຮ້ອຍ ແລະ ສະອາດຈົບງາມ, ຮັກສາວັດທະນະທຳອັນດີງາມຂອງຊາດ, ມີນ້ຳໃຈເອື້ອເຟື້ອເຜື່ອແຜ່ ຕ້ອນຮັບຜູ້ແທນກອງປະຊຸມ ເພື່ອສ້າງຄວາມພ້ອມໃນທຸກດ້ານ ສຳລັບການເປັນປະທານ ແລະ ເປັນເຈົ້າພາບ ກອງປະຊຸມສຸດຍອດອາຊຽນຄັ້ງນີ້ ໃຫ້ໄດ້ຮັບຜົນສຳເລັດຕາມຄາດໝາຍ.
ຂ້າພະເຈົ້າເຊື່ອໝັ້ນວ່າ ດ້ວຍຄວາມປຸ້ມລຸມສາມັກຄີ ຂອງພວກເຮົາ, ຈະເຮັດໃຫ້ການເປັນເຈົ້າພາບ ແລະ ປະທານກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຈະຈັດຂຶ້ນໃນວັນທີ 8-11 ຕຸລາ 2024 ນີ້ ຈະໄດ້ຮັບຜົນສໍາເລັດອັນຈົບງາມ.
ພວກເຮົາມາພ້ອມກັນ ເປັນເຈົ້າພາບທີ່ດີ ເພື່ອຜົນສຳເລັດ ຂອງການເປັນປະ ທານອາຊຽນ ແລະ ປີທ່ອງທ່ຽວລາວ ໃນປີ 2024 ນີ້.
