ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນາຍົກລັດຖະມົນຕີ ເນັ້ນໜັກໃຫ້ຊາວໜຸ່ມ-ເຍົາວະຊົນ ແລະ ອະນຸຊົນລາວ ເອົາໃຈໃສ່ພັດທະນາຕົນເອງ ເພື່ອໃຫ້ກາຍເປັນຜູ້ສືບທອດທີ່ດີໃນສ້າງສາ ແລະ ການພັດທະນາປະເທດຊາດ

ນາຍົກລັດຖະມົນຕີ ເນັ້ນໜັກໃຫ້ຊາວໜຸ່ມ-ເຍົາວະຊົນ ແລະ ອະນຸຊົນລາວ ເອົາໃຈໃສ່ພັດທະນາຕົນເອງ ເພື່ອໃຫ້ກາຍເປັນຜູ້ສືບທອດທີ່ດີໃນສ້າງສາ ແລະ ການພັດທະນາປະເທດຊາດ ສູນກາງຊາວໜຸ່ມປະຊາຊົນປະຕິວັດລາວ ຈັດພິທີສະເຫລີມສະຫລອງວັນ ເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຢູ່ຫໍມູນເຊື້ອຊາວໜຸ່ມ-ເຍົາວະຊົນ, ບ້ານດົງໝາກຄາຍ, ເມືອງ ໄຊທານີ, ນະຄອນຫລວງວຽງຈັນ ພາຍໃຕ້ຫົວຂໍ້: “ອະນາຄົດຂອງພວກລູກຫລານຄືອະນາຄົດຂອງຊາດ” ໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ, ນາຍົກລັດຖະມົນຕີ.

ຈຸດປະສົງການຈັດງານຄັ້ງນີ້ ເພື່ອຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດ, ແຜນພັດທະນາເສດຖະກິດ-ສັງຄົມຕິດພັນກັບການພັດທະນາແບບຍືນຍົງ ຫລື SDG ແລະ ແຜນງານຂອງຊາວໜຸ່ມລາວທົ່ວປະເທດກ່ຽວກັບຊາວໜຸ່ມ-ເຍົາວະຊົນ, ອະນຸຊົນ, ເດັກ ແລະ ການສ້າງສິ່ງ ແວດລ້ອມທີ່ດີເຂົ້າສູ່ກິດຈະກຳຕົວຈິງ. ນອກຈາກນີ້ ຍັງເປັນການສ້າງໂອກາດ ແລະ ເປັນເວທີທີ່ມີຊີວິດຊີວາໃຫ້ແກ່ຜູ້ໃຫຍ່ໄດ້ມີໂອກາດພົບ ປະສົນທະນາແລກປ່ຽນບົດຮຽນການດຳລົງຊີວິດ ແລະ ສ້າງແນວຄິດໃຫ້ແກ່ເດັກນ້ອຍໃນວັນນີ້ ເພື່ອໃຫ້ເປັນພົນລະເມືອງທີ່ມີຄຸນນະພາບ ເພາະເດັກໃນວັນນີ້ກໍ່ຄືຜູ້ໃຫຍ່ໃນມື້ໜ້າ ເຊີ່ງເນື້ອແທ້ກໍ່ແມ່ນການລົງທຶນໃສ່ຊັບພະຍາກອນມະນຸດແຕ່ຫົວທີ.

ສຳລັບກິດຈະກຳພາຍໃນງານ ນອກຈາກມີການປູກຕົ້ນໄມ້, ຜູ້ເຂົ້າຮ່ວມຍັງໄດ້ທ່ຽວຊົມງານວາງ ສະແດງຜົນງານ, ການແຂ່ງຂັນທັກສະໃນການເວົ້າ, ການສະແດງສິລະປະ ແລະ ອື່ນຯ ທີ່ເປັນຜົນງານຂອງຊາວໜຸ່ມ ແລະ ເຍົາວະຊົນ. ນອກຈາກນີ້ ຍັງໄດ້ຮັບຟັງການໂອ້ລົມຈາກ ທ່ານ ທອງລຸນ ສີສຸລິດ, ນາຍົກລັດຖະມົນຕີ. ທ່ານໄດ້ເນັ້ນໜັກໃຫ້ຊາວໜຸ່ມ -ເຍົາວະຊົນ ແລະ ອະນຸຊົນທຸກຄົນເອົາໃຈໃສ່ພັດທະນາຕົນເອງໃຫ້ກາຍເປັນຄົນສະຫລາດຮູ້ທັງຄວາມຄິດ ແລະ ສາຍຕາ, ຫ່າງໄກຈາກພິດໄພຮ້າຍທີ່ບໍ່ເພີ່ງປາດຖະໜາຂອງປວງປະຊາ, ຕັ້ງໃຈຮຽນຮູ້ໃຫ້ເປັນນັກອາຊີບທີ່ມີຫລັກວິທະຍາ, ເຝິກຝົນຕົນໃຫ້ແຂງເຂັ້ມທັງຈິດໃຈ ແລະ ກາຍາ, ສ້າງໃຫ້ຕົນເປັນແຮງບັນດານໃຈ ຂອງຄວາມຮັກຈາກບິດາ-ມານດາ ແລະ ສ້າງສະຕິປະຈໍາໃຈໄວ້ວ່າຕົນຕ້ອງເປັນຜູ້ຮ່ວມສ້າງອະນາຄົດຂອງຊາດລາວກ້າວສູ່ຄວາມຈະເລີນວັດທະນາ.

ທ່ານ ທອງລຸນ ສີສຸລິດ ຍັງໄດ້ຍົກໃຫ້ເຫັນສະພາບການຮຽນໜັງສືຂອງຄົນໃນສະໄໝກ່ອນ ແຕກຕ່າງກັນຫລາຍທີ່ສຸດ ເມື່ອທຽບໃສ່ການຮຽນໜັງສືໃນປັດຈຸບັນທີ່ມີສິ່ງອຳນວຍຄວາມສະດວກໃນຫລາຍດ້ານ ເພື່ອເຮັດໃຫ້ຊາວໜຸ່ມ-ເຍົາວະຊົນ ແລະ ອະນຸຊົນ ໄດ້ຮັບຮູ້ເຖີງຄວາມຫຍຸ້ງຍາກລໍາບາກຂອງການຮຽນໜັງສືໃນເມື່ອກ່ອນ ແລະ ເກີດຄວາມສໍານຶກຫັນມາຕັ້ງໃຈສຶກສາຮ່ຳຮຽນໃຫ້ຫລາຍຂຶ້ນ ເພື່ອພັດທະນາຕົນເອງໃຫ້ກາຍເປັນຜູ້ສືບທອດທີ່ດີໃນພາລະກິດສ້າງສາ ແລະ ພັດທະນາປະເທດຊາດໃຫ້ນັບມື້ຈະເລີນກ້າວໜ້າຂຶ້ນໄປເລື້ອຍຯ.

 

ໂດຍ: ມົດແດງນ້ອຍ