ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນໂອກາດທີ່ ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ເຂົ້າຮ່ວມພິທີປິດກອງປະຊຸມ ສະຫຼຸບຜົນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃນໄລຍະ 3 ປີ ( 2021-2023 ) ແລະ ທິດທາງແຜນການຮອດປີ 2025 ພາຍໃຕ້ການເປັນປະທານຂອງ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ, ໂດຍມີ ເຈົ້າແຂວງ, ຮອງເຈົ້າແຂວງ, ກະຊວງທີ່ກ່ຽວຂ້ອງ, ການນຳຂັ້ນສູງກະຊວງ ປກສ, ແລະ ບັນດາ ກອງບັນຊາການປກສ ແຂວງທົ່ວປະເທດ ເຂົ້າຮ່ວມ. ໃນຕອນບ່າຍ ວັນທີ 13 ທັນວາ 2023 ທີ່ສະໂມສອນ ກະຊວງ ປກສ; ທ່ານໄດ້ເນັ້ນ 9 ບ້ນຫາ ເພື່ອສືບຕໍ່ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບ ຕິດ ແຕ່ນີ້ຮອດປີ 2025 ໃຫ້ປະສົບຜົນສໍາເລັດຕາມຄາດໝາຍທີ່ວາງໄວ້.
ທ່ານ ສອນໄຊ ສີພັນດອນ ກ່າວເນັ້ນວ່າ:ເພື່ອສືບຕໍ່ຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແຕ່ນີ້ຮອດປີ 2025 ໃຫ້ປະສົບຜົນສໍາເລັດນັ້ນ. ບັນດາສະຫາຍ ຈະຕ້ອງໄດ້ເອົາໃຈໃສ່ ຫັນເອົາວາລະແຫ່ງຊາດດັ່ງກ່າວ ເຂົ້າເປັນທິດທາງແຜນການ, ແຜນງານ, ໂຄງການລະອຽດ ຂອງກະຊວງ, ຂອງແຂວງ, ຂອງຂະແໜງການທີ່ກ່ຽວຂ້ອງ ທີ່ໄດ້ວາງອອກຈະແຈ້ງແລ້ວນັ້ນ ນໍາມາເປັນທິດທາງແຜນການໃນຊຸມປີຕໍ່ໜ້າ ຄື: 1) ໃຫ້ກວດກາຄືນຜົນການຈັດຕັ້ງປະຕິບັດວາລະແຫ່ງຊາດໃນໄລຍະຜ່ານມາ ເພື່ອຊອກໃຫ້ເຫັນດ້ານອ່ອນ-ຂໍ້ຄົງຄ້າງ, ສິ່ງທ້າທາຍ, ສາເຫດ, ບົດຮຽນທີ່ຖອດຖອນໄດ້ ເພື່ອເປັນບົດຮຽນໃຫ້ແກ່ການວາງທິດທາງ, ແຜນການ, ວິທີການ, ມາດຕະການໃນແກ້ໄຂບັນຫາຢາເສບຕິດ ໃຫ້ມີປະສິດທິພາບ, ປະສິດທິຜົນຫຼາຍຂຶ້ນກວ່າເກົ່າ; 2) ໃຫ້ທົບທວນຄືນ 6 ແຜນວຽກຈຸດສຸມ ເພື່ອປັບປຸງໃຫ້ສອດຄ່ອງກັບສະພາບການຕົວຈິງໃນປະຈຸບັນ ແລະ ຕໍ່ຫນ້າ ໂດຍຫັນເປັນໂຄງການ, ແຕ່ລະໂຄງການຕ້ອງມີແຜນການ, ແຜນງົບປະມານ, ແຜນບຸກຄະລາກອນ ແລະ ມີຄາດໝາຍສູ້ຊົນຢ່າງລະອຽດ, ຈະແຈ້ງ ພ້ອມທັງມອບໝາຍໃຫ້ພາກສ່ວນຮັບຜິດຊອບນໍາໄປຈັດຕັ້ງປະຕິບັດແຕ່ຫົວທີ; 3) ໃຫ້ສືບຕໍ່ກໍານົດສິດ, ໜ້າທີ່ ແລະ ຄວາມຮັບຜິດຊອບຂອງຄະນະກໍາມະການແກ້ໄຂຢາເສບຕິດລະດັບຊາດໃຫ້ລະອຽດ, ຈະແຈ້ງ ແລະ ສືບຕໍ່ແຕ່ງຕັ້ງຄະນະກໍາມະການແກ້ໄຂຢາເສບຕິດ ລະດັບທ້ອງຖິ່ນໃຫ້ຄົບຊຸດໂດຍມີທຸກຂະແໜງ ການທີ່ກ່ຽວຂ້ອງຂອງທ້ອງຖິ່ນເຂົ້າຮ່ວມນໍາ ເພື່ອຮັບປະກັນການຈັດຕັ້ງປະຕິບັດວາລະແຫ່ງຊາດ ແຕ່ນີ້ຮອດປີ 2025 ໃຫ້ມີຄວາມເປັນເອກະພາບ, ຕໍ່ເນື່ອງ, ມີປະສິດທິພາບ ແລະ ປະສິດທິຜົນສູງ;4) ເອົາໃຈໃສ່ເພີ່ມທະວີຄວາມຮັບຜິດຊອບ ແລະ ຄວາມສາມາດໃນການນໍາພາ-ຊີ້ນຳ ຂອງຄະນະພັກ-ຄະນະນໍາແຕ່ລະກະຊວງ, ອໍານາດການປົກຄອງທ້ອງຖິ່ນແຕ່ລະຂັ້ນໃຫ້ສູງຂຶ້ນກວ່າເກົ່າ, ຖືເອົາວາລະແຫ່ງຊາດ ເປັນມາດຕະຖານເງື່ອນໄຂໜຶ່ງເຂົ້າໃນການສ້າງຂະບວນການແຂ່ງຂັນຮັກຊາດ ແລະ ພັດທະນາ, ກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນຕິດພັນກັບການສ້າງບ້ານ, ສ້າງໂຮງຮຽນ ແລະ ສະຖານທີ່ປອດຢາເສບຕິດ ໂດຍສູ້ຊົນສ້າງບ້ານປອດຢາເສບຕິດໃຫ້ໄດ້ 80% ຂອງບ້ານທົ່ວປະເທດ; ສ້າງເປັນສໍານັກງານ, ອົງການປອດຢາເສບຕິດໃຫ້ໄດ້ 100%; ສ້າງໂຮງຮຽນ, ສະຖາບັນການສຶກສາປອດຢາເສບຕິດ ໃຫ້ໄດ້ 95% ຂຶ້ນໄປ; ພ້ອມນີ້, ກໍເອົາໃຈໃສ່ສ້າງຂະບວນແຂ່ງຂັນໃຫ້ຟົດຟື້ນຢ່າງຕໍ່ເນື່ອງ, ມີການເຂົ້າຮ່ວມຂອງທຸກອົງການຈັດຕັ້ງພັກ-ລັດ ແລະ ທຸກພາກສ່ວນໃນສັງຄົມຢ່າງກວ້າງຂວາງ, ມີນະໂຍບາຍທີ່ເໝາະສົມຕໍ່ຜູ້ເຮັດໄດ້ດີ ແລະ ປະຕິບັດວິໄນຕໍ່ຜູ້ລ່ວງລະເມີດ; 5) ເພີ່ມທະວີການໂຄສະນາ-ເຜີຍແຜ່ຜົນຮ້າຍຂອງຢາເສບຕິດ ແລະ ຈັດພິມສື່ໂຄສະນາ ຕ່າງໆທີ່ຕິດພັນກັບວາລະແຫ່ງຊາດ ໃຫ້ໄດ້ 80% ຂຶ້ນໄປຕາມແຜນການທີ່ວາງໄວ້; 6) ປະສານສົມທົບກັບທ້ອງຖິ່ນຢ່າງໃກ້ຊິດ ເພື່ອຕິດຕາມ, ເຝົ້າລະວັງ, ສະກັດກັ້ນ ແລະ ແກ້ໄຂການລັກລອບປູກພືດທີ່ມີສານເສບຕິດຢູ່ບັນດາແຂວງພາກເຫນືອ ແລະ ພາກກາງໃຫ້ຫຼຸດລົງໃນແຕ່ລະປີ, ໃຫ້ກວດກາຄືນບັນດາໂຄງການພັດທະນາທາງເລືອກທົດແທນ ການປູກພືດທີ່ມີສານເສບຕິດ ເຊັ່ນ: ໂຄງການຮ່ວມມືລາວ-ຈີນ, ໂຄງການຮ່ວມມື ລາວ-ສະຫະປະຊາຊາດ(ສປຊ)ແລະ ໂຄງການອື່ນໆ ໃຫ້ມີຜົນສໍາເລັດສູງ ປະຊາຊົນໄດ້ຮັບຜົນປະໂຫຍດ;7) ຕິດຕາມ, ກວດກາ, ຄຸ້ມຄອງການບໍລິການຂອງສູນປິ່ນປົວ, ຝຶກວິຊາຊີບຜູ້ຕິດຢາເສບຕິດ ແລະ ການບໍາບັດຂັ້ນຊຸມຊົນຢູ່ໂຮງໝໍເມືອງ ໃຫ້ມີປະສິດທິພາບສູງຂຶ້ນກວ່າເກົ່າ;  ເອົາໃຈໃສ່ຕິດຕາມ, ກວດກາ, ຄຸ້ມຄອງການນໍາເຂົ້າ, ສົ່ງອອກ, ນໍາຜ່ານສານເຄມີຕົ້ນທີ່ເອົາເຂົ້າມາພັດທະນາດ້ານອຸດສາຫະກໍາ, ບໍ່ແຮ່, ການແພດ ແລະ ອື່ນໆ ຮ່ວມກັບພາກສ່ວນກ່ຽວຂ້ອງ ໃຫ້ຖືກຕ້ອງຕາມລະບຽບກົດຫມາຍ;9) ເອົາໃຈໃສ່ປະສານງານຮ່ວມມືກັບບັນດາປະເທດເພື່ອນມິດອ້ອມຂ້າງ ສປປ ລາວ ເພື່ອຮ່ວມກັນສະກັດກັ້ນ ແລະ ຕ້ານຢາເສບຕິດ ແລະ ສານເຄມີຕົ້ນ ຕາມບໍລິເວນຊາຍແດນລະຫວ່າງປະເທດ. ພ້ອມທັງສືບຕໍ່ຈັດຕັ້ງປະຕິບັດຕາມສັນຍາໂຄງການແມ່ນໍ້າຂອງ-ແມ່ນໍ້າລ້ານຊ້າງ, ໂຄງການແມ່ນໍ້າຂອງປອດໄພ,ຫ້ອງການປະສານງານຕາມຊາຍແດນ BLO ແລະ ໂຄງການອື່ນໆ ທີ່ ສປປ ລາວ ເຂົ້າຮ່ວມເປັນພາຄີ.
ນອກນັ້ນ, ທ່ານ ຍັງໄດ້ຕີລາຄາ ແລະ ເນັ້ນໜັກຕື່ມບາງບັນຫາເພື່ອໃຫ້ທຸກພາສ່ວນທີ່ກ່ຽວຂ້ອງນຳໄປປັບປຸງແກ້ໄຂ ເປັນຕົ້ນແມ່ນຄະນະພັກ-ຄະນະນໍາແຕ່ລະຂັ້ນຫຼາຍຂະແໜງການທັງຢູ່ສູນກາງ ແລະ ທ້ອງຖິ່ນ ຍັງບໍ່ກໍາແໜ້ນເນື້ອໃນຈິດໃຈຂອງວາລະແຫ່ງຊາດຈິ່ງເຮັດໃຫ້ການຈັດຕັ້ງປະຕິບັດວາລະແຫ່ງຊາດບໍ່ທັນໄດ້ຮັບການນຳພາ-ຊີ້ນຳໃຫ້ມີຄວາມເປັນເອກະພາບດ້ານທັດສະນະ, ຄວາມຮັບຮູ້, ເຂົ້າໃຈ ແລະ ການກະທໍາຕົວຈິງ ໃນທົ່ວລະບົບການເມືອງ ແລະ ທົ່ວສັງຄົມ;ການສ້າງຄວາມເຂັ້ມແຂງ ໃຫ້ສະຖາບັນຄອບຄົວ, ຊຸມຊົນ ບໍ່ທັນແຂງແຮງ ແລະ ບໍ່ທັນກວ້າງຂວາງ, ຂະບວນການບໍ່ຟົດຟື້ນ, ບໍ່ທັນເປັນຫນ້າທີ່ລວມຂອງທົ່ວປວງຊົນເຮັດໃຫ້ການແກ້ໄຂບັນຫາຢາເສບຕິດຢູ່ຂັ້ນຮາກຖານ ບໍ່ທັນມີປະສິດທິພາບປະສິດທິຜົນດີເທົ່າທີ່ຄວນ;ກົດໝາຍ ແລະ ນິຕິກໍາທີ່ໄດ້ຮັບການປັບປຸງແກ້ໄຂ ແຕ່ການໂຄສະນາເຜີຍແຜ່ ບໍ່ທັນກວ້າງຂວາງ, ບໍ່ທັນເລິກເຊິ່ງ, ສະຕິຕໍ່ກົດໝາຍ ແລະ ນິຕິກໍາ ບໍ່ທັນເຂັ້ມງວດ;ສູນບໍາບັດປິ່ນປົວຜູ້ຕິດຢາເສບຕິດ ຍັງຄັບແຄບແອອັດ, ຍັງຂາດງົບປະມານ, ຂາດຢາປິ່ນປົວພະຍາດ, ຂາດການຝຶກວິຊາຊີບ, ອັດຕາກິນຍັງຈໍາກັດບໍ່ພຽງພໍ.
May be an image of 1 person, dais, temple and text that says 'ปะทาม N'