ໃນຕອນເຊົ້າຂອງວັນທີ 05 ສິງຫາ 2023 ທີ່ ຈາກາກຕາ, ອິນໂດເນເຊຍ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມພິທີເປີດກອງປະຊຸມສຸດຍອດອາຊຽນ ຄັ້ງທີ 43 ຢ່າງເປັນທາງການ ໂດຍການເປັນປະທານຂອງ ທ່ານ ໂຈໂກ ວີໂດໂດ, ປະທານາທິບໍດີ ແຫ່ງ ອິນໂດເນເຊຍ ພາຍໃຕ້ຄໍາຂວັນ “ອາຊຽນມີຄວາມສໍາຄັນ: ສູນກາງແຫ່ງການຈະເລີນເຕີບໂຕ”.
ພາຍຫຼັງພິທີເປີດກອງປະຊຸມສຸດຍອດ, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສືບຕໍ່ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 43 ແບບຄົບຄະນະ ແລະ ແບບວົງແຄບ.
ກອງປະຊຸມສຸດຍອດແບບຄົບຄະນະ ຜູ້ນໍາອາຊຽນໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດບັນດາບູລິມະສິດ ສໍາລັບການເປັນປະທານອາຊຽນຂອງອິນໂດເນເຊຍ ພາຍໃຕ້ຄໍາຂັວນ “ອາຊຽນມີຄວາມສໍາຄັນ: ສູນກາງແຫ່ງການຈະເລີນເຕີບໂຕ” ກໍຄື ການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ການສ້າງວິໄສທັດປະຊາຄົມອາຊຽນ ຫຼັງປີ 2025. ກອງປະຊຸມ ໄດ້ເຫັນດີ ຮັບຮອງເອົາ ບັນດາຖະແຫຼງການ ແລະ ເອກະສານ ເພື່ອເປັນພື້ນຖານໃຫ້ແກ່ອາຊຽນໃນການເສີມສ້າງປະຊາຄົມອາຊຽນໃຫ້ເຂັ້ມແຂງ ແລະ ຮັບປະກັນໃຫ້ປະຊາຊົນໄດ້ຮັບຜົນປະໂຫຍດຈາກຂະ ບວນການສ້າງປະຊາຄົມອາຊຽນ ແລະ ທັງເຮັດໃຫ້ອາຊຽນກາຍເປັນສູນກາງແຫ່ງການຈະເລີນເຕີບໂຕ.
ສຳລັບກອງປະຊຸມສຸດຍອດແບບວົງແຄບ ຜູ້ນຳອາຊຽນໄດ້ປຶກສາຫາລື ແລະ ທົບທວນຄວາມຄືບໜ້າ ກ່ຽວກັບ ການຈັດຕັ້ງປະຕິບັດ 5 ຂໍ້ຕົກລົງຂອງຜູ້ນໍາອາຊຽນກ່ຽວກັບສະພາບການໃນມຽນມາ ລວມທັງການຊ່ວຍເຫລືອດ້ານມະນຸດສະທໍາໃນມຽນມາ. ນອກຈາກນີ້, ຜູ້ນໍາອາຊຽນ ໄດ້ປຶກສາຫາລື ແລະ ຮັບຊາບຄວາມຄືບໜ້າຂອງການຈັດຕັ້ງປະຕິບັດແນວຄວາມຄິດຂອງອາຊຽນ ກ່ຽວກັບອິນໂດ-ປາຊີຟິກ, ຊຶ່ງເຫັນວ່າ ມີຫຼາຍໂຄງການໄດ້ຮັບການຈັດຕັ້ງປະຕິບັດ ຜ່ານກົນໄກຂອງອາຊຽນ, ລວມທັງການອອກຖະແຫຼງການຮ່ວມລະຫວ່າງອາຊຽນ ກັບຄູ່ເຈລະຈາອາຊຽນ ເພື່ອສະໜັບສະໜູນການຈັດຕັ້ງປະຕິບັດແນວຄວາມຄິດຂອງອາຊຽນ ກ່ຽວກັບອິນໂດ-ປາຊີຟິກ ໃຫ້ເປັນຮູບປະທໍາ. ຜູ້ນໍາອາຊຽນ ຍັງໄດ້ເນັ້ນຢໍ້າຄວາມສໍາຄັນຂອງການພົວພັນຮ່ວມມື ລະຫວ່າງ ອາຊຽນກັບພາຍນອກ ໂດຍສະເພາະແມ່ນຄວາມສໍາຄັນໃນການຮັກສາບົດບາດຄວາມເປັນແກນກາງຂອງອາຊຽນ ໃນໂຄງສ້າງພາກພື້ນທີ່ພວມຜັນແປ ແລະ ໄດ້ເຫັນດີຍົກລະດັບການພົວພັນຮ່ວມມືອາຊຽນ-ຍີ່ປຸ່ນ ຂຶ້ນເປັນຄູ່ຮ່ວມຍຸດສະທະສາດຮອບດ້ານ ແລະ ການຮ່ວມມືອາຊຽນ-ການາດາ ຂຶ້ນເປັນຄູ່ຮ່ວມຍຸດທະສາດ.
ໃນມື້ດຽວກັນ, ທ່ານນາຍົກລັດຖະມົນຕີ ສອນໄຊ ສີພັນດອນ ຍັງໄດ້ເຂົ້າຮ່ວມການພົບປະ ລະຫວ່າງ 3 ນາຍົກລັດຖະມົນຕີ ລາວ-ຫວຽດນາມ-ກຳປູເຈຍ ເພື່ອປຶກສາຫາລື ແລະ ຊຸກຍູ້ການພົວພັນຮ່ວມມືລະຫວ່າງ 3 ປະເທດ ແລະ ເຂົ້າຮ່ວມພິທີເປີດ ເວທີປຶກສາຫາລືອາຊຽນ-ອິນໂດ-ປາຊິຟິກ, ຊຶ່ງເປັນໜຶ່ງໃນກິດຈະກໍາບູລິມະສິດ ພາຍໃຕ້ການເປັນປະທານອາຊຽນ 2023 ຂອງອິນໂດເນເຊຍ ເພື່ອປະກອບສ່ວນໃຫ້ແກ່ການຈັດຕັ້ງປະຕິບັດແນວຄວາມຄິດ ອາຊຽນ ກ່ຽວກັບ ອິນໂດ-ປາຊີຟິກ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
