ນາຍົກລັດຖະມົນຕີໄດ້ອອກຄຳສັ່ງ ເລກທີ 13/ນຍ ລົງວັນທີ 29 ສິງຫາ 2023 ວ່າດ້ວຍການເພີ່ມທະວີແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ.
ເນື້ອໃນຂອງຄຳສັ່ງ ລະບຸວ່າ: ເພື່ອຈັດຕັ້ງຜັນຂະຫຍາຍມະຕິຕົກລົງ ຂອງກົມການເມືອງສູນກາງພັກ ກ່ຽວກັບການເພີ່ມທະວີການແກ້ໄຂ ສະພາບຄວາມຫຍຸ້ງຍາກ, ຄວາມເຄັ່ງຮ້ອນ ທາງດ້ານເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 19/ກມສພ, ລົງວັນທີ 30 ມິຖຸນາ 2023, ທິດຊີ້ນຳ ຂອງກົມການເມືອງສູນກາງພັກ ແລະ ຄະນະເລຂາທິການສູນກາງພັກ ຕາມແຈ້ງການ ສະບັບເລກທີ 48/ຫສພ, ລົງວັນທີ 13 ກໍລະກົດ 2023 ແລະ ບັນດາມະຕິ ຂອງສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃຫ້ແທດເໝາະກັບສະພາບການຕົວຈິງ ແລະ ຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນ ທັງເພື່ອເປັນບ່ອນອີງພື້ນຖານໃຫ້ຂະແໜງການ, ອົງການກ່ຽວຂ້ອງຂັ້ນສູນກາງ ລວມທັງອົງການປົກຄອງທ້ອງຖິ່ນ ຈັດຕັ້ງປະຕິບັດມາດຕະການແກ້ໄຂບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ຢ່າງຄ່ອງຕົວ ແລະ ໄດ້ຮັບຜົນເປັນຢ່າງດີ.
