ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນາຍົກ ອົສຕຼາລີ ກ່າວວ່າ: ອາເມຣິກາແມ່ນແຫຼ່ງຕິດເຊື້ອພະຍາດ ໂຄວິດ-19 ໃຫຍ່ທີ່ສຸດຂອງອົສຕຼາລີ

ນັບ​ມາຮອດ​ເວ​ລາ 14 ໂມງ​ຂອງວັນ​ທີ 21 ມີ​ນາ​ນີ້, ​ມີຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ​ ໂ​ຄ​ວິດ-19​ຢູ່​ອົ​ສ​ຕຼາ​ລີ​​ໄດ້​ເພີ່ມ​ຂຶ້ນເປັນ 1.073 ກໍ​ລະ​ນີ.

ຕອນ​ເຊົ້າ​ວັນ​ທີ 20 ມີ​ນາ​ນີ້​ ໃນ​ໂອ​ກາດ​ໃຫ້​ສຳ​ພາດ​ຕໍ່​ນັກ​ຂ່າວ​ຂອງ​ ສະ​ຖາ​ນີ​ໂທ​ລະ​ພາບ 2GB, ທ່ານ​ສະ​ກອດ ໂມ​ຣິ​​ສັນ ນາ​ຍົກ​ລັດ​ຖະ​ມົນ​ຕີ ​ອົ​ສ​ຕຼາ​ລີ ກ່າວ​ວ່າ: ໃນ​ຈຳ​ນວນຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ ​ໂ​ຄວິດ-19​ຢູ່​ປະ​ເທດ​ຕົນ, ມີ 80% ແມ່ນ​ມາ​ຈາກ​ຕ່າງ​ປະ​ເທດ ​ຫຼື​ວ່າ​ໄດ້​ພົວ​ພັນ​ຢ່າງ​ໃກ້​ຊິດ​ກັບ​ຄົນ​ທີ່​ເດີນ​ທາງ​ມາ​ຈາກ​ຕ່າງ​ປະ​ເທດ. ໃນ​ຈຳ​ນວນ​ຄົນ​ເຈັບ​ເຫຼົ່າ​ນີ້, “ສ່ວນ​ຫຼາຍ​​ເປັນ​ແຫຼ່ງ​ເກີດ​ຈາກ​ອາ​ເມ​ຣິ​ກາ”. ໃນ​ໂອ​ກາດ​ໃຫ້​ສຳ​ພາດ​ຕໍ່​ນັກ​ຂ່າວ, ທ່ານ​ໂມ​ຣິ​ສັນ ກ່າວ​ວ່າ, “ຂ້າ​ພະ​ເຈົ້​າ​ເຫັນ​ວ່າ​ບໍ່​ມີ​ຫຼັກ​ຖານ​ໃດໆ​​ທີ່ສະ​ແດງ​ໃຫ້​ເຫັນ​ວ່າ, ປະ​ເທດ​ໃດໆ​ລວມ​ທັງ​ປະ​ເທດ​ຈີນ​ໄດ້​ຕັ້ງ​ໃຈ​ເຮັດ​ເລື່ອງ​ໃດ​ໜຶ່ງ​ຂຶ້ນ.” ຖ້ອຍ​ຄວາມ​ຂອງ​ທ່ານ​ໂມ​ຣິ​​ສັນ​ຖືກ​ສື່ມວນ​ຊົນ​ຫຼາຍ​ແຫ່ງ​​ນຳ​ເອົາ​ໄປ​ຕີ​ລາ​ຄາວ່າ​ນີ້​ແມ່ນ​ສັນ​ຍານ​ທີ່​ທ່ານ​ໂມ​ຣິ​ສັນ​ຮູ້​ສຶກ​ບໍ່​ພໍ​ໃຈ​ຕໍ່​ລັດ​ຖະ​ບານ​ທ​ຣຳ​ຍ້ອນ​ລັດ​ຖະ​ບານ​ທ​ຣຳ​ບໍ່​ໄດ້​ປະ​ຕິ​ບັດ​ມາດ​ຕະ​ການ​ໃດໆ​ໃນ​ການ​ປ້ອງ​ກັນ ​ແລະ​ ຄວບ​ຄຸມ​ພະ​ຍາດ​ ໂຄວິດ-19.

ກ່ອນ​ໜ້າ​ນີ້​ອາ​ທິດ​ໜຶ່ງ, ທ່ານ​​ ດາ​ນຽວ.ແອນດ​ຣູ ເຈົ້າ​ແຂວງ​ແຂວງວິກ​ໂຕ​ເລຍ​ໄດ້​ສະ​ເໜີ​ຕໍ່​ລັດ​ຖະ​ບັນ ​ອົ​ສ​ຕຼາ​ລີ ​ວ່າ​ຄວນ​ຈຳ​ກັດ​ບໍ່​ໃຫ້​ນັກ​ທ່ອງ​ທ່ຽວ​ອາ​ເມ​ຣິ​ກາ​ເຂົ້າ​ດິນ​ແດນ ​ອົ​ສ​ຕຼາ​ລີ. ທ່ານ​ເຫັນ​ວ່າ: “ຜູ້​ຖືກ​ບົ່ງ​ປະ​ຕິ​ເປັນ​ພະ​ຍາດ ​ໂຄວິດ-19 ໃໝ່​​ຢູ່ຈີນ​​ແມ່ນ​ໜ້ອຍ​ທີ່​ສຸດ​ແລ້ວ, ອົ​ສ​ຕຼາ​ລີ ​ຍັງ​ປະ​ຕິ​ບັດ​ມາດ​ຕະ​ການ​ຫ້າມ​ບໍ່​ໃຫ້​ນັກ​ທ່ອງ​ທ່ຽວ​ຈີນ ​ມາ​ທ່ຽວ ​ອົ​ສ​ຕຼ​າ​ລີ, ແຕ່​​ກັບຊາວ​ອາ​ເມ​ຣິ​ກາ​​ພັດ​ຍັງສາ​ມາດ​​ເດີນ​ທາງ​ມາ​ທ່ຽວ ​ອົ​ສ​ຕຼາ​ລີ ​ຢ່າງ​ບໍ່​ມີ​ຂີດ​ຈຳ​ກັດ, ການ​ກະ​ທຳ​ດັ່ງ​ກ່າວ​ແມ່ນ​ບໍ່​ສົມ​ເຫດ​ສົມ​ຜົນ.” “ປັດ​ຈຸ​ບັນ​ຍັງ​ບໍ່​ຫັນ​ໄດ້​ຫ້າມ​ໃຫ້​ຊາວ​ອາ​ເມ​ຣິ​ກາ​ມາ​ທ່ຽວ​ອົ​ສ​ຕຼາ​ລີ, ​ການ​ກະ​ທຳ​ໃນ​ລັກ​ສະ​ນະ​ນີ້ແມ່ນ​ບໍ່​ມີ​ຄວາມ​ຮັບ​ຜິດ​ຊອບ​ຕໍ່​​ປະ​ຊາ​ຊົນແຂວງວິກ​ໂຕ​ເລຍ​ກໍ​ຄື​ທົ່ວ​ປະ​ເທດ​ອົ​ສ​ຕຼາ​ລີ​”, ຂ່າວ​ຍັງ​​ລາຍ​ງານ​ຕື່ມວ່າ, ທ່ານ​ປີເຕີ ​ດັດ​ຕັນ ລັດ​ຖະ​ມົນ​ຕີ​ກະ​ຊວງ​ພາຍ​ໃນ​ອົ​ສ​ຕຼາ​ລີ​ຖືກ​ບົ່ງ​ມະ​ຕິ​ວ່າ​ເປັນ​ພະ​ຍາດ​ໂຄວິດ-19ພາຍ​ຫຼັງ​ກັບ​ມາ​ຈາ​ກ​ການ​ຢ້ຽມ​ຢາມ​ອາ​ເມ​ຣິ​ກາ​, ​ປະ​ຈຸ​ບັນທ່ານ​ພວມ​ຖືກ​ແຍກ​ດ່ຽວ​ແລະ​ປິ່ນ​ປົວ​ຢູ່​ໂຮງ​ໝໍ.

ວັນ​ທີ 18 ມີ​ນາ​ນີ້, ລັດ​ຖະ​ບານ​ໂມ​ຣີ​​ສັນ​ໄດ້​ປະ​ກາດ​ໃຫ້​ອົ​ສ​ຕຼາ​ລີ​ເຂົ້າ​ສູ່​ພາ​ວະ​ສຸກ​ເສີນ​ດ້ານ​ຄວາມ​ປອດ​ໄພ​ທາງ​ຊີ​ວະ​ພາບມະນຸດ​ໂດຍ​ອີງ​ຕາ​ມ “ກົດ​ໝາຍ​ວ່າ​ດ້ວຍ​ຄວາມ​ປອດ​ໄພ​ທາງ​ຊີ​ວະ​ພາບ”, ທ່ານ ​ໂມ​ລີ​​ສັນ ​ປະ​ກາດ​ຫ້າມ​ບໍ່​ໃຫ້​ປະ​ຊາ​ຊົນ​ອົ​ສ​ຕຼາ​ລີ​ອອກ​ນ​ອກ​ປະ​ເທດ, ນີ້​ແມ່ນ​ອົ​ສ​ຕຼາ​ລີ​​ໄດ້ປະ​ຕິ​ບັດ​ຄ່ຳ​ສັ່ງ​ດັ່ງ​ກ່າວ​ເປັນ​ຄັ້ງ​ທຳ​ອິດ​ໃນ​ປະ​ຫວັດ​ສາດ. ວັນ​ທີ 19 ມີ​ນາ​ນີ້, ທ່ານ​ໂມ​ລີ​​ສັນ​ໄດ້​ປະ​ກາດ “ຄ່ຳ​ສັ່ງ​ປິດ​ປະ​ເທດ”, ກໍ​ຄື​ເລີ່ມ​ແຕ່​ຕອນ​ຄ່ຳ​ເວ​ລາ​ 21 ໂມງວັນ​ທີ 20 ມີ​ນາ​ນີ້, ປະ​ຊາ​ຊົນ​​ທີ່​ບໍ່​ແມ່ນ​ຄົນ​ສັນ​ຊາດ​ອົ​ສ​ຕຼາ​ລີ​ ແລະ ​ປະ​ຊາ​ຊົນ​ທີ່​ບໍ່​ມີ​ບັດ​ອາ​ໄສ​ຢູ່​ອົ​ສ​ຕຼາ​ລີ​ຖາ​ວອນ​ຫ້າມ​ບໍ່​ໃຫ້​ເຂົ້າ​ດິນ​ແດນ​ອົ​ສ​ຕຼາ​ລີ, ສ່ວນ​ຜູ້​ມີ​ສິດ​ເຂົ້າ​ດິນ​ແດນ​ອົ​ສ​ຕຼາ​ລີ​ກໍ​ຕ້ອງ​ຖືກ​ແຍກ​ດ່ຽວ​ເປັນ​ເວ​ລາ 14 ວັນ​ຢ່າງ​ເຂັ້ມ​ງວດ.