ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຂ່ຳນັບຮັບຕ້ອນ ກອງປະຊຸມໃຫ່ຍຄັ້ງທີ XI
ຂອງ ພັກປະຊາຊົນປະຕິວັດລາວ ຢ່າງສຸດໃຈ

ນຳໃຊ້ພູມປັນຍາຊາວບ້ານສ້າງລາຍຮັບເຂົ້າຄອບຄົວໄດ້ 250 ລ້ານກີບຕໍ່ປີ

ການນຳໃຊ້ວັດຖຸດິບຈາກທຳມະຊາດບວກກັບ ນຳພູມປັນຍາຊາວບ້ານທີ່ສືບທອດມາແຕ່ປູ່ຍ່າຕາຍາຍ ເຂົ້າໃນຂະບວນການຜະລິດແມ່ນສາມາດຫລຸດຕົ້ນທຶນສາມາດສ້າງລາຍຮັບ ດັ່ງຄອບຄົວຂອງທ່ານ ນາງ ພິນ ປັນຍາທອງ ໄດ້ຖືເອົາ ກຳຫັດຖະກຳຕ່ຳແຜ່ນແພເປັນສິນຄ້າ ຈົນກາຍເປັນຕົວແບບໃນການສ້າງເສດຖະກິດຄອບຄົວ ແລະ ສິນຄ້າກໍ່ໄດ້ກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ (ODOP)ຄື ຜະລິດຕະພັນ ຜ້າຝ້າຍທຳມະຊາດ ຍ້ອມສີເປືອກດູ່ ລາຍລື້ນາອອນ-ດອນເຟືອງ ຢູ່ບ້ານໃໜ່ໝອງຊາງ ເມືອງຊຽງຮ່ອນ ແຂວງໄຊຍະບູລີ ສາມາດສ້າງລາຍຮັບເຂົ້າຄອບຄົວໄດ້ 250 ລ້ານກີບຕໍ່ປີ.

ນາງ ພິນ ປັນຍາທອງໃຫ້ຮູ້ວ່າ ຍ້ອນຕົນເອງມີຄວາມຮູ້ທາງດ້ານການຕໍ່ຫູກທໍໄໝ ແລະ ສືບທອດມາຍັງປູ່ຍ່າຕາຍາສືບຕໍ່ກັນມາ ບວກກັບຕົນເອງມັກອາຊີບດັ່ງກ່າວ ຈຶ່ງໄດ້ລິເລີ່ມປະກອບອາຊີບຕໍ່າຫູກຜໍ່ໄໝ ແຕ່ປີ 2018 ໂດຍເບື້ອງຕົ້ນໃຊ້ທຶນທີ່ສະສົມມາຈຳນວນໜຶ່ງ ແລະ ນຳເອົາວັດຖຸດິບຈາກເປືອກດູ່ມາຈາກທຳມະຊາດ ຝ້າຍກໍ່ຊື້ນຳປະຊາຊົນພາຍໃນເມືອງ ທຳອິດໄດ້ທົດລອງໃຫ້ສະມາຊິກ ແລະ ຕົນເອງຕໍ່າຫູກ ຈຳນວນ 10 ກີ່ ເຫັນວ່າຂາຍໄດ້ລາຄາດີ ຊຸດໜຶ່ງບໍ່ຕໍ່າກວ່າ 400.000 ກີບ ເຊິ່ງປະກອບມີຜະລິດຕະພັນຄື: ສິ້ນ, ແຜ່ນແພ, ຜ້າບ່ຽງ, ແພປູໂຕະ, ຖົງ ແລະ ຜ້າຂະມ້າ ຈຸດພິເສດຂອງຜະລິດຕະພັນ ມີລວດລາຍຕາມພູມປັນຍາລາຍລື້ ນາອອນ-ດອນເຟືອງປະສົມແບບລວດລາຍປະຍຸກ, ຫຼາຍສີສັນຄູ່ກັນໄປ ຕາມຕະຫຼາດຕ້ອງການ ຫຼາຍສີສັນລົງໃສ່ຕາມເນື້ອຜ້າ ທີ່ເປັນເອກກະລັກ ເຫັນວ່າສິນຄ້າດັ່ງກ່າວມີຄວາມນິຍົມຂອງສັງຄົມ ຫຼັງຈາກນັ້ນຈຶ່ງໄດ້ຂະຫຍາຍໃຫ້ສະມາຊິກອິກຈຳນວນ 80 ກີ່ ແຕ່ກໍຍັງບໍ່ຕອບສະໜອງພຽງພໍກັບຄວາມຕ້ອງການຂອງທ້ອງຕະຫຼາດ ເຊິ່ງໄລຍະນັ້ນທາງເມືອງໄດ້ມີນະໂຍບາຍສົ່ງເສີມຮີດຄອງປະເພນີວັດທະນະທຳເຜົົ່າ ໂດຍກຳນົດໃຫ້ພະນັກງານ ສຳນັກງານ ຫ້ອງການ ນຸ່ງເຄື່ອງເຜົ່າຂອງຕົນມາວຽກໄດ້ 1 ວັນຕໍ່ອາທິດ ໂດຍກຳນົດເອົາວັນ ພະຫັດຂອງທຸກອາທິດໃຫ້ນຸ່ງເຄື່ອງເຜົ່າຂອງຕົນມາໄດ້ ດັ່ງນັ້ນຜະລິດຕະພັນບໍ່ພຽງພໍກັບຄວາມຕ້ອງການຂອງສັງຄົມ ຕົນຈຶ່ງໄດ້ປຶກສາກັບຄອບຄົວຂະຫຍາຍເພີ່ມຕຶ່ມ 150 ກີ່ ເພື່ອໃຫ້ມີຄວາມພຽງພໍກັບຄວາມຕ້ອງການໃນທ້ອງຕະຫຼາດພາຍໃນເມືອງ ຕ່າງເມືອງຕ່າງແຂວງ ແລະ ຕ່າງປະເທດກໍ່ໄດ້ມີສັ່ງຈອງນັບມື້ນັບຫຼາຍຂຶ້ນ ແຕ່ລະປີຍັງໄດ້ຮັບເຊີນໄປວາງສະແດງສິນຄ້າຢູ່ ຕ່າງເມືອງ ຕ່າງແຂວງ ເທດສະການບຸນຊ້າງ ສູນການຄ້າລາວໄອເຕັກນະຄອນຫຼວງວຽງຈັນ ແລະ ຕ່າງປະເທດ ມາຮອດປະຈະບັນ ມີສະມາຊິກຕໍ່າຫູກໃຫ້ຕົນ 340 ກີ່ ຜ່ານການດຳເນີນກິດຈະກຳຂອງຕົນໄດ້ເຮັດໃຫ້ຄອບຄົວມີລາຍໄດ້ 250 ລ້ານກີບຕໍ່ປີ ເຮັດໃຫ້ຄອບຄົວມີຊີວິດການເປັນຢູ່ດີຂຶ້ນ ມີເຮືອນຢູ່ຖາວອນ 1 ຫຼັງ ຊື້ດິນໄດ້ອີກ 1 ຕອນ ລົດໃຫຍ່ 1 ຄັນ ລົດຈັກ 1 ຄັນ ມີທຶນຮອນການສຶກສາຂອງລູກ ແລະ ມີເງິນເກັບຈຳນວນໜຶ່ງເພື່ອເປັນທຶນຂະຫຍາຍຕື່ມອີກໃນອານາຄົດ ເພື່ອສ້າງລາຍໄດ້ໃຫ້ຄອບຄົວເພີ່ມຂື້ນຕື່ມ.

ສະຫຼຸບແລ້ວ ການສ້າງເສດຖະກິດຄອບຄົວ ຈະປະສົບຜົນສຳເລັດນັ້ນ, ກ້າວໄປສູ່ການເປັນຄອບຄົວຕົວແບບ ແລະ ກ້າວສູ່ຄວາມຮັ່ງມີແມ່ນຈະຕ້ອງໄດ້ ດຸໝັ່ນ, ຊື່ສັດ, ປະຫຍັດ ແລະ ອົດທົນ ເຊິ່ງໃຊ້ເວລາພໍສົມຄວນໃນການລົງມືເຮັດທຳຈິງ ບຸກບືນສູ້ຊົນຜ່ານຜ່າອຸປະສັກນາໆປະການ ບໍ່ຍອມທໍ້ຖອຍ ກໍ່ສາມາດປະສົບຜົນສຳເລັດໄດ້.

ໂດຍ: ດອນ ຂຽວພະນາ