ນິຄົມອຸດສາຫະກຳລ້ຽງປາຄົບວົງຈອນໃນເຂດເສດຖະກິດໃໝ່ ສີທັນດອນ ປະກອບສ່ວນສ້າງວຽກເຮັດງານທໍາໃຫ້ແຮງງານລາວ
ໂຄງການນິຄົມອຸດສາຫະກຳລ້ຽງປາຄົບວົງຈອນ ແມ່ນໜຶ່ງໃນບັນດາໂຄງການທີ່ ນອນຢູ່ໃນໂຄງການພັດທະນາເຂດເສດຖະກິດໃໝ່ ສີທັນດອນ ຕັ້ງຢູ່ເມືອງໂຂງ, ແຂວງຈໍາປາສັກ ກຽມເປີດໂຮງ ງານແປຮູບປາໃນອີກບໍ່ດົນນີ້, ຄາດວ່າຈະຮັບເອົາແຮງງານລາວເຂົ້າເຮັດວຽກນໍາຫລາຍຮ້ອຍຄົນ
ທ່ານ Xi Huasheng ຜູ້ຮັບຜິດຊອບໂຄງການນິຄົມອຸດສາ ຫະກຳລ້ຽງປາຄົບວົງ ຈອນ ໃຫ້ສໍາພາດຕໍ່ສື່ມວນຊົນລາວເມື່ອບໍ່ ດົນມານີ້ວ່າ: ໂຄງການນິຄົມອຸດສາຫະກຳລ້ຽງປາຄົບວົງຈອນມີເນື້ອທີ່ທັງໝົດ 109 ເຮັກຕາ, ໄດ້ເລີ່ມລົງມືບຸກເບີກກໍ່ສ້າງໃນ ກາງເດືອນ 10 ປີ 2022 ຜ່ານມາ, ປັດຈຸບັນໄດ້ສ້າງໜອງລ້ຽງປາໃນເນື້ອທີ່ 100 ເຮັກຕາ, ໄດ້ປ່ອຍລູກປາແລ້ວຈຳນວນ 6 ລ້ານໂຕ, ຄາດວ່າປະລິມານການຜະລິດໄດ້ 6.000 ໂຕນ, ຂະບວນການຜະລິດແມ່ນເປັນແບບຕ່ອງໂສ້ງ ນັບແຕ່ເພາະພັນລູກປາ, ການ ລ້ຽງປາ ແລະ ການແປຮູບ ຊຶ່ງທາງເຮົາໄດ້ມີໂຮງງານແປຮູບ ແລະ ໂຄຕ້າການສົ່ງອອກເປັນຂອງຕົນເອງ. ຄາດວ່າ ວັນທີ 15 ກັນຍາ ປີ 2024 ຂະບວນການກໍ່ສ້າງ ແລະ ຕິດຕັ້ງເຄື່ອງຈັກໂຮງງານແປ ຮູບຈະສຳເລັດ, ນອກຈາກນັ້ນ ຈະໃຊ້ເວລາປັບປຸງລະບົບອີກ 15 ວັນ ຊຶ່ງໂຮງງານແປຮູບປາ ຈະເລີ່ມແປຮູບໃນຕົ້ນເດືອນຕຸລາ 2024 ນີ້
ທ່ານ ໃຫ້ຮູ້ຕື່ມວ່າ: ນິຄົມອຸດສາຫະກຳລ້ຽງປາຄົບວົງຈອນ ມີເນື້ອທີ່ທັງໝົດ 109 ເຮັກຕາ, ແມ່ນຈະສາມາດຜະລິດປາເປັນໄດ້ທັງໝົດ 25.000.000 ໂຕນ/ປີ, ຫຼັງຈາກແປຮູບເປັນປາແຜ່ນປະ ມານການສົ່ງອອກ 15.000.000 ໂຕນ/ປີ, ຕົກເປັນມູນຄ່າ 240.000.000 ຢວນ/ປີ (ສະກຸນເງິນຈີນ) ຫຼື 30.000.000 ໂດລາ/ປີ, ຄາດວ່າບໍລິສັດຈະມີກຳໄລສຸດທິ 48.000.000 ຢວນ/ປີ ຫຼື 6.000.000 ໂດລາ/ປີ.
ປັດຈຸບັນ, ມີແຮງງານລາວທີ່ເຮັດວຽກຢູ່ນິຄົມອຸດສາຫະກຳລ້ຽງປາຄົບວົງຈອນ ເກືອບ 100 ຄົນ, ຄາດວ່າ ເມື່ອໂຮງງານແປ ຮູບປາສໍາເລັດ ແລະ ເປີດນໍາໃຊ້ຢ່າງເປັນທາງການ ຈະມີຄວາມ ຕ້ອງການແຮງງານປະມານ 300 ຄົນ, ເຊິ່ງຈະເປັນການສ້າງວຽກເຮັດງານທຳໃຫ້ແກ່ປະຊາຊົນພາຍໃນເມືອງໄດ້ເປັນຢ່າງດີ ແລະ ສ້າງຊີວິດການເປັນຢູ່ໃຫ້ປະຊາຊົນນັບມື້ນັບດີຂຶ້ນເລື້ອຍໆ.
