ມາຮອດປັດຈຸບັນຜະລິດຕະພັນການທ່ອງທ່ຽວ ດ້ານຊີວະນາໆພັນ ຂອງສະຖານທີ່ທ່ອງທ່ຽວນ້ຳກັດຢໍລະປ່າ ໄດ້ຮັບຄວາມສົນໃຈຈາກນັກທ່ອງທ່ຽວ ດ້ານການຄົ້ນຄວ້າຈາກຕ່າງປະເທດເປັນຈໍານວນຫລາຍ ພາຍຫລັງເປີດໃຫ້ບໍລິການຜະລິດຕະພັນນີ້ ເມື່ອເດືອນກຸມພາ ປີ 2024 ນີ້ ໂດຍມີຈໍານວນການຈອງເພີ່ມຂຶ້ນ ໃນລະດູການທ່ອງທ່ຽວທີ່ຈະມາເຖິງນີ້.
ທ່ານ ສົມເພັດ ມ້າວປະເສີດ, ປະທານບໍລິສັດແຟເຊັດ ພັດທະນາແຫລ່ງທ່ອງທ່ຽວທໍາມະຊາດ ນໍ້າກັດຢໍລະປ່າ ໃຫ້ສໍາພາດວ່າ: ມາຮອດປັດຈຸບັນສາມາດສຶກສາຊີວະນາໆພັນ ໄດ້ຫລາຍກວ່າ 1.000 ລາຍການ ໂດຍແບ່ງອອກເປັນ 4 ພາກສ່ວນຄື: ແມງໄມ້ ແລະແມງກະເບື້ອ, ນົກ, ສັດເລືອຄານເຄິ່ງບົກເຄິ່ງນໍ້າ ແລະ ດອກໄມ້ ພົ້ນເດັ່ນແມ່ນການຄົ້ນພົບສາຍພັນແມງໄມ້ 8 ສາຍພັນ ແຕ່ຢູ່ໃນພິພິດທະພັນມີ 2 ສາຍພັນ ໂດຍຈະໄດ້ຕັ້ງຊື່ທີ່ເປັນເອກະລັກສະເພາະຂອງແຕ່ລະສາຍພັນ ພາຍຫລັງເປີດໃຫ້ບໍລິການຜະລິດຕະພັນນີ້ ເຫັນວ່າໄດ້ຮັບການຕອບຮັບຈາກນັກທ່ອງທ່ຽວ ດ້ານການຄົ້ນຄວ້າຈາກຕ່າງປະເທດເປັນຈໍານວນຫລາຍ ຊຶ່ງຄາດວ່າການສຶກສາດ້ານຊີວະນາໆພັນ ຈະເປັນອີກໜື່ງທ່າແຮງຫລັກດ້ານການທ່ອງທ່ຽວຂອງລາວໃນອານາຄົດ ເນື່ອງຈາກຊີວະນາໆພັນທີ່ໄດ້ສຶກສາຄົ້ນຄ້ວາແມ່ນພົບເຫັນໄດ້ເຂດສະຫງວນຂອງນໍ້າກັດຢໍລະປ່າ ໂດຍສາມາດເບີ່ງໄດ້ຕາມລະດູການເທົ່ານັ້ນ.
ໃນໂອກາດເດີນທາງມາທ່ຽວນໍ້າກັດຢໍລະປ່າ ທ່ານ ນາງ ແຄລໍລາຍ ເບນນອຍ ຜູ້ຈັດການທີ່ສ້າງລາຍການທ່ອງທ່ຽວ ຢູ່ບໍລິສັດທ່ອງທ່ຽວແຫ່ງໜື່ງໃນປະເທດຝລັ່ງ ໃຫ້ສໍາພາດວ່າ: ຮູ້ສຶກປະທັບໃຈຫລາຍທີ່ໄດ້ມີໂອກາດມາທ່ຽວປະເທດລາວ ທີ່ມີທຳມະຊາດທີ່ສວຍງາມ ໂດຍສະເພາະນໍ້າກັດຢໍລະປ່າຍັງມີທຳມະຊາດທີ່ອຸດົມສົມບູນຫລາຍ ແລະ ປະຊາຊົນຍັງຮັກສາໄດ້ມູນເຊື້ອວັດທະນະທຳ ຮີດຄອງປະເພນີ ທີ່ເປັນເອກະລັກສະເພາະຂອງທ້ອງຖິ່ນ ຊຶ່ງຂ້າພະເຈົ້າໄດ້ເດີນທາງໄປສະຖານທີ່ທ່ອງທ່ຽວສໍາຄັນຂອງແຂວງຫລວງພະບາງ ແລະນໍ້າກັດຢໍລະປ່າແຂວງອຸດົມໄຊ ພ້ອມທັງຊິມອາຫານທີ່ເປັນເອກະລັກຂອງລາວ ເປັນຕົ້ນແມ່ນລາບ, ມົກປາ, ນໍ້າຫວານໝາກກ້ວຍ ເຊື່ອມກ້ວຍ ແລະມັກອາຫານລາວຫລາຍ.
ການມາທ່ຽວປະເທດລາວໃນຄັ້ງນີ້ ເພື່ອສຶກສາ, ສໍາຫລວດ ແລະສໍາຜັດດ້ວຍຕົນເອງເຖິງສະຖານທີ່ທ່ອງທ່ຽວ, ໂຮງແຮມ, ຮ້ານອາຫານຂອງລາວ ໃນແຕ່ລະລະດັບ ເພື່ອໂຄສະນາ ແລະຂາຍຜະລິດຕະພັນການທ່ອງທ່ຽວ ຂອງລາວໃຫ້ລູກຄ້າຊຶ່ງເປັນນັກທ່ອງທ່ຽວຕ່າງປະເທດ ໂດຍສະເພາະຄົນຝລັ່ງທີ່ມີຄວາມສົນໃຈມາທ່ຽວປະເທດລາວ.
ພາຍຫລັງສໍາເລັດການສໍາຫລວດ ຫລືສຶກສາດ້ານທ່າແຮງການທ່ອງທ່ຽວ ຂອງລາວແລ້ວ ເມື່ອກັບໄປຝລັ່ງຈະເລີ່ມດຳເນີນການໂຄສະນາການທ່ອງທ່ຽວລາວ ໃຫ້ຄົນຝລັ່ງໄດ້ຮູ້ຈັກປະເທດລາວຫລາຍຂຶ້ນ ເນື່ອງຈາກລູກຄ້າຂອງບໍລິສັດທ່ອງທ່ຽວຢູ່ຝລັ່ງ ສ່ວນຫລາຍມັກການທ່ອງທ່ຽວໃນຮູບແບບທໍາມະຊາດ, ວິຖີການດຳລົງຊີວິດຂອງປະຊາຊົນໃນທ້ອງຖິ່ນທີ່ເປັນເອກກະລັກ ຊຶ່ງສິ່ງເຫລົ່ານີ້ຈະເປັນຈຸດຂາຍທີ່ສໍາຄັນຂອງການທ່ອງທ່ຽວລາວ.
ຂ່າວ: ຈັນທະສອນ ສີຫານາດ
