ຈາກກໍລີນີສື່ສັງຄົມອອນລາຍ News Times ບໍ່ຮູ້ວ່າແມ່ນພາກສ່ວນໃດແມ່ນຜູ້ຮັບຜິດຊອບ ເພຈດັ່ງກ່າວໄດ້ແຊວີດີໂອຈາກເຟສບຸກຊື່ນາງ ເກດ ວົງຄຳຊາວ ບ້ານໂສດ ເມືອງໂຂງ ແຂວງຈຳປາສັກ ໂດຍໃສ່ຫົວຂໍ້ວ່າ: ນ້ຳຂອງຖ້ວມບ້ານໂສດ ເມືອງໂຂງ ແຂວງຈຳປາສັກ ລົງໃນເຟຈຂອງຕົນ ໃນວັນທີ 27 ພຶດສະພາ 2024 ເວລາ 18 ໂມງ ຈຶ່ງເຮັດໃຫ້ສັງຄົມສັບສົນ ຫຼື ເຂົ້າໃຈຜິດວ່າ: ບ້ານໂສດ ແມ່ນຖືກນ້ຳຂອງຖ້ວມແທ້.
ດັ່ງນັ້ນ, ວັນທີ 28 ພຶດສະພາ 2024 ທ່ານ ຄຳສິງ ບຸນຈະເລີນ ຮອງເຈົ້າເມືອງໆໂຂງ ແຂວງຈໍາປາສັກ ຈຶ່ງໄດ້ລົງຕິດຕາມເບິ່ງພື້ນທີ່ຕົວຈິງ ໂດຍມີຄະນະພັກຮາກຖານກຸ່ມ ໂສດ, ນາຍບ້ານໂສດ ແລະ ພາກສ່ວນກ່ຽວຂ້ອງໄດ້ລົງຕິດຕາມເບິ່ງຕົວຈິງໃນຄັ້ງນີ້; ທ່ານ ບຸນເພັງ ໄຊຍະສຸກ ເລຂາພັກບ້ານ ນາຍບ້ານໂສດ ໄດ້ໃຫ້ສຳພາດຕໍ່ສື່ວິທະຍຸ-ໂທລະພາບເມືອງໂຂງ ວ່າ: ໃນຕອນເຊົ້າວັນທີ 25 ພຶດສະພາ 2024 ໄດ້ເກີດມີສະພາບຝົນຕົກໜັກ ເປັນເຫດເຮັດໃຫ້ນ້ຳປ່າທີ່ໄຫຼມາຈາກຕົ້ນແມ່ນ້ຳກໍຄືຫ້ວຍໂສດ ໄຫຼມາເປັນຈຳນວນຫຼາຍແລ້ວລົ້ນຝັ່ງເຂົ້າໃສ່ພື້ນທີ່ບ້ານເຮືອນຂອງປະຊາຊົນກະທັນຫັນ ທີ່ຕັ້ງຢູ່ລຽບຕາມແຄມແມ່ນ້ຳ ພ້ອມທັງໄຫຼຂ້າມທາງໃນຈຸດທີ່ໄຫຼຂ້າມນັ້ນມີຄວາມຍາວປະມານ 100 ແມັດ; ທ່ານນາຍບ້ານໆ ໂສດ ໄດ້ຮູ້ຕື່ມວ່າ: ເວລາທີ່ນ້ຳໄຫຼມາຖ້ວມ ແມ່ນເວລາ 5 ໂມງເຊົ້າຂອງວັນທີ 25 ພຶດສະພາ ແຕ່ສະພາບນ້ຳຖ້ວມແມ່ນພຽງແຕ່ 2-3 ຊົ່ວໂມງນ້ຳກໍ່ຫຼຸດ ເຮັດໃຫ້ການສັນຈອນໄດ້ເປັນປົກກະຕິ, ຈຸດພິເສດບ້ານໂສດ ກໍຄືບໍລິເວນນ້ຳຖ້ວມນີ້ແມ່ນເປັນພື້ນທີ່ຕ່ຳ, ປະຊາຊົນຕັ້ງເຮືອນລຽບຕາມແຄມຫ້ວຍ ເພື່ອອາໃສນ້ຳຈາກຫ້ວຍເຂົ້າໃນການດຳລົງຊີວິດ, ປູກຝັງ-ລ້ຽງສັດ ແລະ ເປັນປະຈຳ ຫາກປີໃດຝົນຕົກຫຼາຍມື້ຕິດຕໍ່ກັນກໍຈະມີສະພາບນ້ຳຖ້ວມກະທັນຫັນ, ເກີດມີສະພາບນ້ຳໄຫຼຂ້າມທາງ.
ໂອກາດນີ້, ທ່ານ ຄຳສິງ ບຸນຈະເລີນ ຊີ້ນຳຕໍ່ພາກສ່ວນກ່ຽວຂ້ອງວ່າ: ຈາກສະພາບນ້ຳຖ້ວມເສັ້ນທາງ ເຮັດໃຫ້ມີບາງຈຸດນ້ຳກັດເຊາະທາງໄດ້ຮັບຄວາມເສຍຫາຍ; ຈາກນັ້ນ ຍັງມີຂີ້ເຫຍື້ອທີ່ໄຫຼມາກັບກະແສນ້ຳເປັນຈຳນວນຫຼາຍອັດຕັນທາງລະບາຍນ້ຳ ເຮັດໃຫ້ນ້ຳໄຫຼບໍ່ສະດວກ. ຮຽກຮ້ອງໃຫ້ອົງການຈັດຕັ້ງທຸກພາກສ່ວນພາຍໃນກຸ່ມໂສດ ກໍຄືພໍ່ແມ່ປະຊາຊົນບ້ານໂສດ ຈົ່ງສາມັກຄີກັນເຮັດອະນາໄມເກັບເສດໄມ້ ແລະ ຂີ້ເຫຍື້ອ ອອກຈາກປາກລະບາຍນ້ຳໂດຍໄວ ເພື່ອເຮັດໃຫ້ນ້ຳໄຫຼສະດວກ.
ຂ່າວ-ພາບ: ພຸດທະສິນ ວົງວິໄລທອງ ສະຖານີວິທະຍຸ-ໂທລະພາບເມືອງໂຂງ
