ກອງປະຊຸມປຶກສາຫາລືການແກ້ໄຂຜົນກະທົບ ຈາກເຫດການນຳຖ້ວມ ຢູ່ເມືອງວຽງຄຳ, ເມືອງປາກແຊງ ແລະ ເມືອງໂພນທອງ ແຂວງຫລວງພະບາງ ຈັດຂຶ້ນໃນວັນທີ 29 ກໍລະກົດ 2024 ທີ່ຫ້ອງວ່າການແຂວງຫລວງພະບາງ ໂດຍເປັນປະທານຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງ ປະທານຄະນະຄຸ້ມຄອງ-ແກ້ໄຂໄພພິບັດຂັ້ນແຂວງ.
ໂອກາດນີ້, ທ່ານ ສຸລິສັກ ພົມມາລີ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງຫລວງພະບາງ ໄດ້ລາຍງານວ່າ: ສະພາບຜົນກະທົບຈາກໄພທໍາມະຊາດນໍ້າຖ້ວມ ທີ່ເກີດຂຶ້ນ ໃນລະຫວ່າງວັນທີ 23-27 ກໍລະກົດ 2024 ເນື່ອງຈາກມີຝົນໜັກຕິດຕໍ່ກັນຫລາຍມື້ເຮັດໃຫ້ນ້ຳຫລາຍສາຍມີປະລິມານນ້ຳເພີ່ມຂຶ້ນ ແລະ ມີນໍ້າປ່າໄຫລຊຸ ສົ່ງຜົນກະທົບຕໍ່ພື້ນຖານໂຄງລ່າງ ທີ່ຢູ່ອາໄສຂອງປະຊາຊົນ 03 ເມືອງ ລວມ 19 ບ້ານ, 757 ຄອບຄົວ, ມູນຄ່າເສຍຫາຍ 7,77 ຕື້ກວ່າກີບ ໃນນີ້, ເມືອງວຽງຄຳຖືກຜົນກະທົບ ລວມມີ 13 ບ້ານ, 648 ຄອບຄົວ, ຄອບຄົວຖືກກະທົບໜັກຂາດທີ່ຢູ່ອາໄສມີ 72 ຄອບຄົວ, ມີ 1.347 ຄົນ ຍິງ 690 ຄົນ, ດ້ານພື້ນຖານໂຄງລ່າງ ກະທົບທີ່ຢູ່ອາໄສຄື: ເຮືອນໄລ 4 ຫລັງ, ເລົ້າເຂົ້າເປືອກ-ເຂົ້າສານ 3 ຫລັງ, ລວມ 3 ໂຕນ, ເຄື່ອງໃຊ້ໃນຄົວເຮືອນເສຍຫາຍ ທັງໝົດມີ 120 ຄອບຄົວ, ລວມຜົນ ເສຍຫາຍທັງໝົດ 5,6 ຕື້ກວ່າກີບ, ເນື້ອທີ່ນາເສຍຫາຍ 36 ກວ່າເຮັກຕາ, ໄຮ່ 10 ກວ່າເຮັກຕາ, ສັດລ້ຽງ ເຊັ່ນ: ງົວ, ຄວາຍ 50 ໂຕ, ໝູ 100 ໂຕ ແລະ ສັດປີກ 2.000 ໂຕ, ໜອງປາ 32 ໜອງ, ຊົນລະປະທານເສຍຫາຍ 4 ແຫ່ງ, ລະບົບນ້ຳລິນ ເສຍຫາຍ 13 ບ້ານ, ເສັ້ນທາງ 1c ແຕ່ບ້ານດອນແກ້ວ ຫາບ້ານໜອງຄໍາ ເຂດແດນເມືອງວຽງຄໍາ-ເມືອງຮ້ຽມແຂວງຫົວພັນ ໄລຍະທາງ 30 ກິໂລແມັດ, ມີດິນເຈື່ອນຖົມທາງເຮັດໃຫ້ການສັນຈອນຖືກຕັດຂາດ, ເສັ້ນທາງຈາກບ້ານເມືອງໝ້ວຍ ຫາບ້ານສົບເຮືອງຖືກຕັດຂາດ ປະມານ 12 ກິໂລແມັດ ບໍ່ສາມາດສັນຈອນໄດ້ ລວມທັງເສັ້ນທາງຫລວງທ້ອງຖິ່ນ ຈໍານວນ 05 ເສັ້ນ ຖືກດິນຖົມເຊາະເຈື່ອນ ເຮັດໃຫ້ເສັ້ນທາງຕັດຂາດບໍ່ສາມາດສັນຈອນໄດ້, ເສົາໄຟຟ້າເສຍຫາຍ 29 ຕົ້ນ, ປະຊາຊົນ 20 ບ້ານ ບໍ່ສາມາດຊົມໃຊ້ໄດ້ ປັດຈຸບັນໄດ້ແກ້ໄຂສາມາດນຳໃຊ້ 09 ບ້ານ.
ສ່ວນເມືອງປາກແຊງ ຖືກຜົນກະທົບ ມີ 05 ບ້ານ, ມີ 96 ຄອບຄົວ ໃນນີ້, ເຮືອນທີ່ຖືກນໍາໄຫລຊຸ 06 ຫລັງ, ເຮືອນເປ່ເພ ເສຍຫາຍໜັກ ທີ່ບໍ່ສາມາດຢູ່ໄດ້ 14 ຫລັງ, ເຮືອນທີ່ຖືກນໍ້າຖ້ວມທໍາມະດາ 76 ຫລັງ, ມີສັດລ້ຽງ ເຊັ່ນ: ແບ້, ໝູ, ເປັດ, ໄກ່ ລວມ 313 ໂຕ, ເລົ້າເຂົ້າ 04 ຫລັງ ມີເຂົ້າເສຍຫາຍ 04 ໂຕນ ລວມມູນຄ່າເສຍຫາຍທັງໝົດ 1,95 ຕື້ກວ່າກີບ.
ສຳລັບ ເມືອງໂພນທອງ ຖືກຜົນກະທົບ ລວມມີ 1 ບ້ານ, ມີ 13 ຄອບຄົວ ໃນນີ້, ມີເຮືອນໄຫລຊຸ 01 ຫລັງ, ເຮືອນຖືກເປ່ເພໜັກ 05 ຫລັງ, ເຮືອນເປ່ເພປານກາງ 07 ຫລັງຄາ ລວມຜົນເສຍຫາຍທັງໝົດ 141 ລ້ານກີບ.
