ໃນວັນທີ 24 ກໍລະກົດ 2024 ຜ່ານມານີ້, ຫລາຍບ້ານ ຢູ່ເມືອງໂພນທອງ, ເມືອງປາກແຊງ ແລະ ເມືອງວຽງຄຳ ແຂວງຫລວງພະບາງ ຖືກນ້ຳຖ້ວມ ເນື່ອງຈາກວ່າມີຝົນຕົກໜັກຫລາຍວັນຕິດຕໍ່ກັນ ເຮັດໃຫ້ແມ່ນ້ຳຫລາຍສາຍ ຂອງບັນດາເມືອງ ຍື່ງຂຶ້ນຖ້ວມບ້ານເຮືອນ, ເນື້ອທີ່ທຳການຜະລິດ ຂອງປະຊາຊົນ ສ້າງຜົນເສຍຫາຍ ເປັນບໍລິເວນກວ້າງ, ເຊິ່ງຄວາມເສຍຫາຍ ໃນເບື້ອງຕົ້ນ ປະມານ 1,5 ຕື້ກີບ. ສະເພາະ ເມືອງປາກແຊງ ສາຍນ້ຳເຊືອງ ໄດ້ໄຫລນອງກະທັນຫັນ ເຂົ້າຖ້ວມເຮືອນປະຊາຊົນ ແລະ ເນື້ອທີ່ທຳການຜະລິດ, ມີ 5 ບ້ານ, 102 ຄອບຄົວ ໄດ້ຮັບຜົນກະທົບ ຄື: ບ້ານໜອງ, ບ້ານຫາດຈາງ, ບ້ານຫາດພວນ, ບ້ານສົບວັດ ແລະ ບ້ານໂພ ໃນນັ້ນ, ບ້ານໜອງ ໄດ້ຮັບຜົນກະທົບໜັກກວ່າໝູ່ ມີ 50 ຄອບຄົວ, ມີພົນລະເມືອງ 266 ຄົນ ຍິງ 130 ຄົນ, ມີເຮືອນໄຫລຊຸ 1 ຫລັງ, ເຮືອນເປ່ເພ 100 ເປີເຊັນ 3 ຫລັງ, ເຮືອນເປ່ເພ 60 ເປີເຊັນ 3 ຫລັງ ແລະ ເຮືອນນໍ້າຖ້ວມປານກາງ 43 ຫລັງ. ນອກນັ້ນ, ຍັງມີ ເລົ້າເຂົ້າ 1 ຫລັງ, ມີເຄື່ອງອຸປະໂພກ-ບໍລິໂພກ ແລະ ສັດລ້ຽງຈໍານວນໜຶ່ງ ຄິດເປັນມູນຄ່າເສຍຫາຍ ທັງໝົດ 1,2 ຕື້ກວ່າກີບ.
ສ່ວນ ບ້ານຫາດຈາງ ມີ 17 ຄອບຄົວ, ມີພົນລະເມືອງ 71 ຄົນ ຍິງ 31 ຄົນ, ມີເຮືອນໄຫລຊຸ 5 ຫລັງ, ເຮືອນເປ່ເພ 100 ເປີເຊັນ 4 ຫລັງ, ເຮືອນນໍ້າຖ້ວມປານກາງ 8 ຫລັງ. ນອກນັ້ນ, ຍັງມີ ເຄື່ອງອຸປະໂພກ-ບໍລິໂພກ ແລະ ສັດລ້ຽງຈໍານວນໜຶ່ງ ຄິດເປັນມູນຄ່າເສຍຫາຍທັງໝົດ 159 ລ້ານກີບ. ບ້ານຫາດພວນ ມີ 17 ຄອບຄົວ, ມີພົນລະເມືອງ 57 ຄົນ ຍິງ 31 ຄົນ, ມີເຮືອນໄຫລຊຸ 1 ຫລັງ, ເຮືອນນໍ້າຖ້ວມປານກາງ 5 ຫລັງ, ມີເຄື່ອງອຸປະໂພກ-ບໍລິໂພກ ແລະ ສັດລ້ຽງຈໍານວນໜຶ່ງ ຄິດເປັນມູນຄ່າເສຍຫາຍທັງໝົດ 166 ລ້ານ ກີບ. ບ້ານສົບວັດ ມີ 9 ຄອບຄົວ, ມີພົນລະເມືອງ 59 ຄົນ ຍິງ 28 ຄົນ, ມີເຮືອນນໍ້າຖ້ວມປານກາງ 1 ຫລັງ, ມີເຄື່ອງອຸປະໂພກ-ບໍລິໂພກ ແລະ ສັດລ້ຽງຈໍານວນໜຶ່ງ ຄິດເປັນມູນຄ່າເສຍຫາຍທັງໝົດ 5 ລ້ານກີບ ແລະ ບ້ານໂພ ມີ 9 ຄອບຄົວ, ມີພົນລະເມືອງ 36 ຄົນ ຍິງ 19 ຄົນ, ເຮືອນຖືກນໍ້າຖ້ວມປານກາງ 2 ຫລັງ, ເຄື່ອງອຸປະໂພກ-ບໍລິໂພກ ແລະ ສັດລ້ຽງຈໍານວນໜຶ່ງ ຄິດເປັນມູນຄ່າເສຍຫາຍທັງໝົດ 21 ລ້ານກີບ. ປັດຈຸບັນ ສະພາບຂອງນ້ຳ ແມ່ນໄດ້ລົດລົງເປັນປົກກະຕິແລ້ວ, ແຕ່ການໄປມາຫາສູ່ຍັງມີຄວາມລຳບາກຫລາຍ, ເພາະເສັ້ນທາງຖືກຕັດຂາດ, ລົດໃຫຍ່ບໍ່ສາມາດເຂົ້າໄປເຖິງໄດ້ ເນື່ອງຈາກມີຕົ້ນໄມ້ລົ້ມຕັນທາງເຂົ້າ ແລະ ສ້າງຄວາມລຳບາກໃຫ້ປະຊາຊົນຫລາຍສົມຄວນ.
ສຳລັບ ເມືອງໂພນທອງ ມີບ້ານທີ່ຖືກນ້ຳຖ້ວມ 1 ບ້ານ ຄື: ບ້ານດອນເງິນ, ມີຜູ້ໄດ້ຮັບຜົນກະທົບ 13 ຄົວຄອບ ໃນນັ້ນ, ກະທົບໜັກ 5 ຄອບຄົວ, ເຮືອນເປ່ເພ 6 ຫລັງ, ເຂົ້າເປືອກຂອງປະຊາຊົນ ເສຍຫາຍ 8.100 ກິໂລ, ເງິນສົດ 20.500.000 ກີບ, ເນື້ອທີ່ສວນ 3,5 ເຮັກຕາ, ສັດປີກ 482 ໂຕ, ໜູ 30 ໂຕ. ນອກນີ້, ຍັງມີເຄື່ອງໃຊ້ໃນຄົວເຮືອນ ອື່ນໆອີກຈຳນວນໜຶ່ງ ລວມມູນຄ່າຂອງການເສຍຫາຍ ປະມານ 643.346.000 ກີບ, ບໍ່ລວມມູນຄ່າເຮືອນ ຈຳນວນ 6 ຫລັງທີ່ເສຍຫາຍທັງໜົດ. ຢ່າງໃດກໍ່ຕາມ ເມືອງໂພນທອງ ຍັງໄດ້ແຈ້ງເຕືອນ ມາຍັງບັນດາອົງການປົກຄອງບ້ານ, ພໍ່ແມ່ປະຊາຊົນໃນຂອບເຂດທົ່ວເມືອງໂພນທອງ ໂດຍສະເພາະເທສະບານເມືອງ ໃຫ້ມີສະຕິກຽມພ້ອມຮັບມືກັບອຸທົກກະໄພນໍ້າຖ້ວມ ທີ່ອາດຈະເກີດຂຶ້ນ, ເນື່ອງຈາກວ່າ ປັດຈຸບັນ ລະດັບນໍ້າແຕ່ລະສາຍເປັນຕົ້ນ ນໍ້າແໝນ, ນໍ້າມັດ, ນໍ້າອຶມ, ນໍ້າແຊງ ແລະ ນໍ້າສາຍອື່ນໆ ເຫັນວ່າມີແນວໂນ້ມເພີ່ມຂຶ້ນຢ່າງໄວວາ, ເນື່ອງຈາກ ມີຝົນຕົກໜັກຫລາຍວັນຕິດຕໍ່ກັນຜ່ານມາ ເຮັດໃຫ້ມວນນໍ້າ ຢ່າງມະຫາສານຈາກນໍ້າຫ້ວຍ, ນ້ຳຮ່ອງ ຫລາຍສາຍ ຫລັ່ງໄຫລໂຮມກັນ ເຮັດໃຫ້ສາຍນໍ້າແຕ່ລະສາຍ ເພີ່ມປະລິມານຂຶ້ນຢ່າງຕໍ່ເນື່ອງ ຈົນເຖິງປັດຈຸບັນ ເຫັນວ່າລະດັບນໍ້າຍັງມີປະລິມານເພີ່ມຂຶ້ນເລື້ອຍໆ.
ສ່ວນ ເມືອງວຽງຄໍາ ມີ 8 ບ້ານ ຖືກນ້ຳຖ້ວມ ເປັນຕົ້ນ ບ້ານເມືອງໝ້ວຍ, ບ້ານວັງຄໍາ, ບ້ານຫ້ວຍໂກນ, ບ້ານບວມມີ້, ປາກລາວ ກຸ່ມເມືອງໝ້ວຍ ແລະ ບ້ານຕຸ່ມມິ່ງ, ບ້ານວຽງທອງ ແລະ ບ້ານສົບເຮືອງ ກຸ່ມສົບເຮືອງ ສ້າງຄວາມເສຍຫາຍຢ່າງໜັກໜ່ວງ, ເສັ້ນທາງຖືກຕັດຂາດ, ໄຟຟ້າ, ນໍ້າລິນບໍ່ສາມາດຊົມໃຊ້ໄດ້ ປັດຈຸບັນ ພາກສ່ວນທີ່ກ່ຽວຂ້ອງ ກຳລັງສ້ອມແປງເສັ້ນທາງໄປຫາເຂດປະສົບໄພ. ສ່ວນຄວາມເສຍຕົວຈິງ ຍັງຢູ່ໃນຂັ້ນຕອນການເກັບກຳຂໍ້ມູນ.
ຂ່າວ: ທະນູທອງ, ຂໍ້ມູນ-ພາບ: ແກ່ນຄຳ, ເຕີມ, ບຸນທັນ
ຂປລ
