ຕະຫຼອດໄລຍະ 19 ປີ ແຫ່ງການສ້າງຕັ້ງໂຮງຮຽນອະນຸບານ -ປະຖົມຫຼວງປະເສີດ ເປັນໂຮງຮຽນພາກເອກະຊົນ ທີ່ຈັດຕັ້ງການຮຽນການສອນຫຼັກສູດຂອງກະຊວງສຶກສາທິການ ແລະ ກິລາ (ສສກ) ໄດ້ມີການເຕີບໃຫຍ່ຂະຫຍາຍຕົວຢ່າງກວ້າງຂວາງ ແລະ ມີຄຸນນະພາບ ໂດຍສະເພາະຫຼາຍນ້ອງນັກຮຽນສາມາດສ້າງຜົນ ງານໄດ້ພົ້ນເດັ່ນດ້ວຍການຄອງຫຼຽນຄຳ ໃນສາຂາວິຊາ ຈິນຕະຄະນິດ ຫຼື ຄະນິດຄິດໄວ ໃນການແຂ່ງຂັນຊິງແຊ໋ມລະດັບສາກົນ ຈັດຂຶ້ນທີ່ປະເທດໄທ ເຖິງ 2 ຄັ້ງ ແລະ ຍັງສາມາດສອບເສັງນັກ ຮຽນເກັ່ງເປັນອັນດັບທີ 1 ທົ່ວເມືອງໄຊເຊດຖາ ອີກດ້ວຍ ຊຶ່ງໃນສົກຮຽນດັ່ງກ່າວ ໄດ້ສືບຕໍ່ມູນເຊື້ອແຜນຍຸດທະສາດຕ່າງໆໂດຍມີຄູສອນຊຽວຊານລະດັບສາກົນຈາກຕ່າງປະເທດ ຄຽງຄູ່ກັບການເປີດການຮຽນການສອນ ຫຼັກສູດ 3 ພາສາ ກໍຄື ພາສາລາວ, ພາສາອັງກິດ ແລະ ພາສາຈີນ.
ໃນວັນທີ 5 ສິງຫາ 2024 ທ່ານ ສົມມະໂນນຶກ ຫຼວງປະເສີດ ປະທານກຸ່ມໂຮງຮຽນອະນຸບານ-ປະຖົມ ຫຼວງປະເສີດ ທັງເປັນຜູ້ອໍານວຍການບໍລິສັດ ເອັດເຄ ສໍາຫຼວດອອກແບບ-ຮັບເໝົາກໍ່ສ້າງ ໃຫ້ສໍາພາດຕໍ່ສື່ມວນຊົນວ່າ: ໂຮງຮຽນອະນຸບານ-ປະຖົມຫຼວງປະເສີດ ກໍເປັນໂຮງຮຽນເອກະຊົນແຫ່ງໜຶ່ງທີ່ໄດ້ຮັບການ ສ້າງຕັ້ງຂຶ້ນ ແລະ ຈັດການຮຽນ-ການສອນ ເລີ່ມແຕ່ສົກຮຽນປີ 2005-2006 ເປັນຕົ້ນມາ ພາຍໃຕ້ການອະນຸມັດຂອງພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ຫ້ອງການສຶກສາທິການ ແລະ ກິລາເມືອງໄຊເສດຖາ ເພື່ອເປີດສອນຫຼັກສູດຊັ້ນອະນຸບານ ແລະ ປະຖົມ ສະຖານທີ່ຕັ້ງຢູ່ ບ້ານໂນນຄໍ້ເໜືອ, ເມືອງໄຊເສດຖາ, ນະຄອນຫຼວງວຽງຈັນ ໃນປັດຈຸບັນພວກເຮົາກໍກ້າວເຂົ້າສູ່ປີທີ 19 ພໍດີ. ໃນເມື່ອກ່ອນໂຮງຮຽນຫຼັງນີ້ເປັນອາຄານຊັ້ນດຽວຮູບຕົວຢູ ມີເນື້ອທີ 1730 ຕາແມັດ ເລີ່ມຕົ້ນເປີດຮຽນນັບແຕ່ຊັ້ນ ອະນຸບານ1 ຮອດ ຊັ້ນ ປ3 ມີນັກຮຽນປະມານ 50 ນ້ອງ ແລະ ມາຮອດສົກປີ 2007-2008 ພວກເຮົາຈຶ່ງສໍາເລັດການເປີດຮຽນຮອດຊັ້ນ ປ5 ເປັນປະຖົມສົມບູນ.
ມາຮອດກາງປີ 2022 ພວກເຮົາໄດ້ຕັດສິນໃຈເລີ່ມໂຄງການກໍ່ສ້າງອາຄານຮຽນຫຼັງໃໝ່ ສໍາເລັດນໍາໃຊ້ອາຄານຮຽນຫຼັງໃໝ່ ໃນຕົ້ນເດືອນ ສິງຫາ ປີ 2023 ແນ່ໃສ່ການພັດທະນາໂຮງຮຽນໃຫ້ກາຍເປັນໂຮງຮຽນທີ່ມີຄຸນນະພາບ, ເປັນບ່ອນຮຽນຮູ້ທີ່ທັນສະ ໄໝ, ປອດໄພ ແລະ ສະດວກສະບາຍ, ຕອບສະໜອງການພັດທະນາໃນຍຸກສະໄໝໃໝ່ຂອງການສຶກສາ ຊຶ່ງອາຄານຮຽນຫຼັງໃໝ່ນີ້ເປັນຕຶກອາຄານ 3 ຊັ້ນຖາວອນ ມີຫ້ອງຮັບໃຊ້ທັງໝົດ 26 ຫ້ອງ ແລະ ປັດຈຸບັນນຳໃຊ້ເປັນຫ້ອງຮຽນທັງໝົດ 17 ຫ້ອງ, ອະ ນຸບານ 7 ຫ້ອງ, ປະຖົມ 10 ຫ້ອງ ມີບຸກຄະລາກອນທັງໝົດ 36 ທ່ານ ເປັນຄູຸອາຈານທັງໝົດ 26 ທ່ານ ເປັນຍິງ 24 ທ່ານ, ມີນັກຮຽນທັງໝົດ 463 ນ້ອງ.
ທ່ານ ສົມມະໂນນຶກ ຫຼວງປະເສີດ ໃຫ້ຮູ້ອີກວ່າ: ໂຮງຮຽນຂອງພວກເຮົາກໍແມ່ນໂຮງຮຽນສາມັນ ນຳໃຊ້ຫຼັກສູດແຫ່ງຊາດ ຂອງກະຊວງສຶກສາທິການ ແລະ ກິລາ,, ຄຽງຄູ່ກັບການພັດທະ ນາການສຶກສາໃຫ້ມີຄວາມເຊື່ອມໂຍງກັບພາກພື້ນ ແລະ ສາກົນ ພວກເຮົາໄດ້ໃຫ້ຄວາມສຳຄັນເປີດກວ້າງການສຶກສາເພື່ອສົ່ງເສີມຄຸນນະພາບຂອງລູກ-ຫຼານນັກຮຽນເຮົາຫັ້ນ ປັດຈຸບັນພວກເຮົາກໍໄດ້ມີການພົວພັນຮ່ວມມືແລກປ່ຽນກັບສະຖາບັນຕ່າງປະເທດເຊັ່ນ: ປະເທດໄທ ແລະ ສປຈີນ. ໃນການຈັດການຮຽນ-ການ ສອນຄຽງຄູ່ກັບຫຼັກສູດຂອງກະຊວງສຶກສາທິການ ແລະ ກິລາ ໄດ້ສົ່ງເສີມດ້ານພາສາຕ່າງປະເທດ ໃນຫັ້ນພວກເຮົາໄດ້ນຳເອົາພາສາຈີນ ແລະ ພາສາອັງກິດ ປະກອບເຂົ້າໃນການຮຽນ-ການສອນນັບແຕ່ຊັ້ນອະນຸບານຮອດປະຖົມ ປັດຈຸບັນກໍມີ ອາຈານຄົນລາວ, ອາຈານຄົນຈີນ, ອາຈານຄົນຝຣັ່ງ ແລະ ອາຈານຄົນຟີລິບປິນ ທີ່ເພີ່ນມີປະສົບການສູງຊ່ວຍສິດສອນໃນປັດຈຸບັນນີ້ແລະ ເມື່ອຕົ້ນສົກຮຽນທີ່ຜ່ານມາພວກເຮົາກໍໄດ້ສຳເລັດໂຄງການທົດລອງ ແລະ ຮ່ວມມືກັບສະຖາບັນຈິນຕະຄະນິດປະເທດໄທ ໃນການທົດລອງຈັດຕັ້ງຫຼັກສູດຈິນຕະຄະນິດ ຫຼື ຄະນິດຄິດໄວ (ລູກຄິດຍີ່ປຸ່ນ) ເຂົ້າໃນການຈັດການຮຽນ-ການສອນຂອງໂຮງຮຽນເຮົາ ກໍຖືວ່າໄດ້ຮັບໝາກຜົນເປັນຢ່າງດີ ທັງທາງດ້ານວຽກງານວິຊາການ ແລະ ການເຄື່ອນ 5 ຫຼັກມູນການສຶກສາ.
ຜົນງານພົ້ນເດັ່ນຜ່ານມາ ທີ່ນ້ອງນັກຮຽນ ແລະ ຄູ-ອາຈານພວກເຮົາພູມໃຈ ແລະ ດີໃຈກໍແມ່ນຜົນງານຈາກການເຂົ້າຮ່ວມແຂ່ງຂັນຈິນຕະຄະນິດຊິງແຊ໋ມພາກຕາເວັນອອກສຽງເໜືອຄັ້ງທີ 5 ຈັດຂຶ້ນທີ່ສູນປະຊຸມນານາຊາດຂອນແກ່ນ ປະເທດໄທ ໃນຊ່ວງເດືອນກຸມພາ ໄດ້ນຳພານ້ອງນັກຮຽນເຂົ້າຮ່ວມທັງໝົດ 6 ນ້ອງຈາກຊັ້ນ ປ4 ຈຳນວນ 2 ນ້ອງ ແລະ ປ5 ຈໍານວນ 4 ນ້ອງ, ໃນນັ້ນ ສາມາດຍາດໄດ້ຂັນລາງວັນຊະນະເລີດອັນດັບ 1 ຈຳນວນ 2 ນ້ອງ, ຮອງຊະນະເລີດອັນດັບ 2 ຈໍານວນ 2 ນ້ອງ, ຮອງຊະນະ ເລີດອັນດັບ 3 ຈຳນວນ 1 ນ້ອງ ແລະ ຫຼຽນຄຳ 1 ນ້ອງ ລວມ 6 ລາງວັນ ແລະ ການເຂົ້າຮ່ວມແຂ່ງຂັນຈິນຕະຄະນິດ ຊິງແຊ໋ມລະດັບນານາຊາດ ຄັ້ງທີ 2 ທີ່ຈັດຂຶ້ນ ໃນຕົ້ນເດືອນເມສາ ທີ່ຜ່ານມາ ພວກເຮົາກໍໄດ້ນຳພານ້ອງນັກຮຽນເຂົ້າຮ່ວມທັງໝົດ 8 ນ້ອງ ຈາກຊັ້ນອະນຸບານ3, ຊັ້ນປ3, ປ4 ແລະ ປ5 ໃນນັ້ນກໍສາມາດຍາດໄດ້ ຂັນລາງວັນຮອງຊະນະເລີດອັນດັບທີ 2 ຈຳນວນ 2 ນ້ອງ ແລະ ຫຼຽນຄຳ 6 ນ້ອງ ລວມ 8 ລາງວັນ. ແລະ ຜົນງານນັກຮຽນເກັ່ງຜ່ານມາພວກເຮົາກໍສາມາດສ້າງໄດ້ນັກຮຽນເກັ່ງຕິດອັນດັບທີ 1 ຂອງເມືອງໄຊເສດຖາ ວິຊາໂລກອອ້ມຕົວ ແລະ ຄະແນນ 38-39 ຫຼື 7 ຂຶ້ນ ເກືອບທຸກວິຊາໃນການສອບເສັງຈົບຊັ້ນແຕ່ລະສົກຮຽນ ໄດ້ຮັບການຍ້ອງຍໍຂັ້ນພະແນກສຶກສານະຄອນຫຼວງ, ຂັ້ນເມືອງກໍມີຈຳນວນຫຼາຍພໍສົມຄວນໃນແຕ່ລະປີ.
ສ່ວນແຜນຮັບນັກຮຽນໃນສົກຮຽນ 2024-2025 ທີ່ຈະມາຮອດນີ້ ກໍໄດ້ກະກຽມຄວາມພ້ອມຂະຫຍາຍຫ້ອງຮຽນເພີ່ມອີກ 6 ຫ້ອງ ຊັ້ນປະຖົມ 4 ຫ້ອງ ແລະ ອະນຸບານ 2 ຫ້ອງ ເພື່ອກຽມຮອງຮັບຈຳນວນນັກຮຽນທີ່ລົງທະບຽນຈອງບ່ອນນັ່ງໄວ້ນັ້ນ ໃນເດືອນ ສິງຫານີ້ ກໍາລັງເປີດຮັບລົງທະບຽນນັກຮຽນໃໝ່ ຊຶ່ງຈຳນວນທີ່ພວກເຮົາຈະຮອງຮັບໄດ້ເພີ່ມອີກປະມານ 210 ນ້ອງ ປັດຈຸບັນກໍຖືວ່າມີນັກຮຽນທີ່ມາລົງທະບຽນແລ້ວເກືອບ 70% ແລະ ໃນທ້າຍເດືອນສິງຫາທີ່ຈະມາຮອດນີ້ ພວກເຮົາກໍກໍາລັງກະກຽມເປີດ ໂຮງຮຽນລ້ຽງເດັກ, ອະນຸບານ-ປະຖົມ ຫຼວງປະເສີດ ແຫ່ງທີ2 ສາຂາເມືອງຫາດຊາຍຟອງ ຢ່າງເປັນທາງການ ຕັ້ງຢູ່ທີບ້ານນາໄຫ, ເມືອງຫາດຊາຍຟອງ ນະຄອນຫຼວງວຽງຈັນ.
ຢ່າງໃດກໍຕາມ, ຄຽງຄູ່ກັບການຮຽນການສອນ ຫຼັກສູດ 3 ພາສາດັ່ງກ່າວ ທາງໂຮງຮຽນກໍຍັງມີນະໂຍບາຍໃຫ້ແກ່ນັກຮຽນຖ້າຈ່າຍເປັນເດືອນມີສ່ວນຫຼຸດ 10% ຈ່າຍເຄີ່ງປີ ມີສ່ວນຫຼຸດ 15% ແລະ ຈ່າຍໝົດປີ ມີສ່ວນຫຼຸດ 20% ສະເພາະຜູ້ທີ່ມາລົງທະບຽນນັບແຕ່ມື້ນີ້ເຖີງ 29 ສິງຫາ 2024 ເປັນຕົ້ນໄປ.
ພາບ-ຂ່າວໂດຍ ສົງການ ພັນແພງດີ
