ແຂວງສະຫວັນນະເຂດ ຈັດພິທີນໍາສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ກັບຄືນປະເທດຢ່າງສົມກຽດ ປະຈໍາປີ 2023-2024 ເມື່ອບໍ່ດົນມານີ້ທີ່ກອງຂຸດຄົ້ນອັດຖິ 584 ບ້ານໂພໄຮ່ ເມືອງເຊໂປນ ແຂວງສະຫວັນນະເຂດ ນຳໂດຍສະຫາຍ ພົຈວ ສີທາ ດວງມາລາ ຫົວໜ້າກົມພະນັກງານ, ກົມໃຫຍ່ການເມືອງກອງທັບ ຮອງປະທານຄະນະປະຕິບັດງານພິເສດ.
ອັດຖິທີ່ນໍາມາມອບໃນຄັ້ງນີ້ມີຈໍານວນ 12 ອັດຖິຂອງທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດເພື່ອພາລະກິດຕໍ່ສູ້ປົດປ່ອຍຊາດ ກອງທັບຫວຽດນາມ ໄດ້ສົ່ງທະຫານອາສາສະໝັກ ແລະ ຊ່ຽວຊານຫວຽດນາມມາຮ່ວມສູ້ຮົບຄຽງບ່າຄຽງໄຫຼ່ກັບກໍາລັງປະກອບອາວຸດລາວ ນັບທັງກໍາລັງຫຼວງ ແລະ ກໍາລັງທ້ອງຖິ່ນຮ່ວມຂຸມຄອງສູ້ຮົບອັນດຽວກັນ ຕໍ່ສູ້ຕີສັດຕູຜູ້ຮຸກຮານໂຕດຽວກັນ, ເລືອດເນື້ອຂອງນັກຮົບປະຕິວັດສອງຊາດໄດ້ໄຫຼເຈື່ອນເປັນສີແດງໃນທຸກຫົນແຫ່ງຂອງຂຸມຄອງສູ້ຮົບ ຊຶ່ງສະແດງໃຫ້ເຫັນເຖິງຄວາມສາມັກຄີພິເສດ ລະຫວ່າງສອງຊາດ ລາວ-ຫວຽດນາມ, ຫວຽດນາມ-ລາວ, ນໍ້າໃຈກໍາມະຊີບອັນສູງສົ່ງຂອງກອງທັບປະຊາຊົນຫວຽດນາມ ເຖິງເວລາຈະລ່ວງກາຍຜ່ານມາຫຼາຍສິບປີແລ້ວ ແຕ່ບັນດາຮູບພາບກໍາປືນສູ້ຮົບ ບົນສະໝໍລະພູມທີ່ດຸເດືອດຮ່ວມຂຸມຄອງສູ້ຮົບອັນດຽວກັນຂອງນັກຮົບປະຕິວັດສອງຊາດ ລາວ-ຫວຽດນາມ ຍັງຢູ່ໃນຄວາມຊົງຈໍາ ແລະ ຢູ່ໃນດວງໃຈຂອງພະນັກງານ-ນັກຮົບ ແລະ ປະຊາຊົນລາວຕະຫຼອດໄປ ພ້ອມທັງຈາລຶກໄວ້ໃນປື້ມປະຫວັດສາດແຫ່ງການ ຕໍ່ສູ້ຂອງປະຊາຊົນລາວຕະຫຼອດໄປ. ໃນພິທີໄດ້ມີການເຊັນບົດບັນທຶກມອບ-ຮັບອັດຖິຢ່າງເປັນທາງການ.
ຂ່າວ: ສະຫວັນນະເຂດ
