ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ນໍາໃຊ້ເງິນກອງທຶນທາງ 7,4 ຕື້ກີບ ເພື່ອປັບປຸງຄືນໃໝ່ 8 ເສັ້ນທາງໃນນະຄອນຫລວງວຽງຈັນ

ພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ຈະນໍາໃຊ້ເງິນກອງທຶນທາງ 7,4 ຕື້ກີບ ເພື່ອປັບປຸງທາສີເສັ້ນທາງ, ໄຟອໍານາດ ແລະ ຕິດຕັ້ງປ້າຍຈະລາຈອນຢູ່ 8 ເສັ້ນທາງຫລັກພາຍໃນນະຄອນຫລວງວຽງຈັນຄືນໃໝ່ ໃຫ້ມີຄວາມສວຍງາມ, ມີຄວາມເປັນລະບຽບຮຽບຮ້ອຍ ແລະ ປະກອບສ່ວນຊ່ວຍແກ້ໄຂຄວາມແອອັດຂອງການສັນຈອນ, ທັງເປັນການຕ້ອນຮັບວັນສໍາຄັນຂອງພັກ-ຂອງຊາດພາຍໃນປີ 2020.
ທ່ານ ສີວອນ ຊັບທະວີ, ຫົວໜ້າຂະແໜງຄຸ້ມຄອງການຂົນສົ່ງທາງບົກ, ພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ໃຫ້ສໍາພາດວ່າ: 8 ເສັ້ນທາງທີ່ປັບປຸງໃໝ່ໃນຄັ້ງນີ້ ລວມມີ: ຖະໜົນໄກສອນ ພົມວິຫານ, ໜອງບອນ, ສາມແສນໄທ, ເສດຖາທິລາດ, ເຈົ້າຟ້າງຸ່ມ, ສຸພານຸວົງ, ລ້ານຊ້າງ ແລະ ຖະໜົນທ່າເດື່ອ, ໂດຍໄດ້ອະນາໄມເອົາສີແຕ້ມເສັ້ນທາງເກົ່າອອກແລ້ວແຕ້ມສີໃໝ່ແທນ. ພ້ອມນີ້ ກໍ່ໄດ້ປັບປຸງປ້າຍ ແລະ ໄຟອໍານາດຕາມເສັ້ນທາງເປົ້າໝາຍຄືນ ໃໝ່ເຊັ່ນກັນ.
ໃນເບື້ອງຕົ້ນແມ່ນເລີ່ມຈາກຖະໜົນໄກສອນ ພົມວິຫານ ແລະ ຖະໜົນລ້ານຊ້າງ ໂດຍເຮັດທັງເວັນ ແລະ ຄືນ ເພື່ອໃຫ້ສໍາເລັດກ່ອນວັນທີ 15 ມີນານີ້ ຈາກນັ້ນຈຶ່ງສືບຕໍ່ປັບປຸງບັນດາເສັ້ນທາງທີ່ເຫລືອ ເພື່ອໃຫ້ສໍາເລັດພາຍໃນເດືອນພຶດສະພາປີ 2020 ນີ້.


ຄຽງຄູ່ກັບການປັບປຸງ 8 ເສັ້ນທາງຫລັກແລ້ວ, ຍັງຈະໄດ້ປັບປຸງເພີ່ມຕື່ມບາງເສັ້ນທາງທີ່ເຊື່ອມຕໍ່ທາງເບຕົງ ເພື່ອໃຫ້ເປັນລະບຽບຮຽບຮ້ອຍກ່ວາເກົ່າ.
ທ່ານ ສີວອນ ຊັບທະວີ ໃຫ້ຮູ້ຕື່ມວ່າ: ສໍາລັບການປັບປຸງທາສີຂອບທາງໃນຄັ້ງນີ້ ແມ່ນໄດ້ປ່ຽນແປງສີຂອບທາງໃໝ່ຕາມຄູ່ມືທີ່ກະຊວງໂຍທາທິການ ແລະ ຂົນສົ່ງກໍານົດໃໝ່ ຢ່າງເປັນເອກະພາບນຳກັນໃນຂອບເຂດທົ່ວປະເທດ, ໂດຍກຳນົດສີຂອບທາງຂອງຄູດອນກາງຈາກສີຂາວ ແລະ ແດງ ໃນເມື່ອກ່ອນມາເປັນສີຂາວ ແລະ ດໍາ; ສ່ວນເສັ້ນຜ່າກາງທາງທີ່ເປັນເສັ້ນທາງສັນຈອນສອງເລນນັ້ນ ແມ່ນປ່ຽນຈາກສີຂາວໃນເມື່ອກ່ອນມາເປັນສີເຫລືອງ, ຂະນະທີ່ຂອບທາງເບື້ອງນອກແມ່ນບໍ່ໄດ້ແຕ້ມໃໝ່ເພາະມີປ້າຍຫ້າມຕ່າງໆ ຕິດຕັ້ງຢູ່ແລ້ວ.
ຢ່າງໃດກໍ່ຕາມ, ໃນໄລຍະປັບປຸງທາສີທາງ, ໄຟອໍານາດ ແລະ ຕິດຕັ້ງປ້າຍຈະລາຈອນຄືນໃໝ່ນີ້ ອາດເຮັດໃຫ້ການສັນຈອນໄປ-ມາຢູ່ບັນດາເສັ້ນທາງເປົ້າໝາຍຕ່າງໆພົບຄວາມຫຍຸ້ງຍາກ; ດັ່ງນັ້ນ ທ່ານຈຶ່ງຮຽກຮ້ອງມາຍັງຜູ້ໃຊ້ລົດໃຊ້ຖະໜົນໃນນະຄອນຫລວງວຽງຈັນທຸກຄົນ ຈົ່ງມີສະຕິຄ່ອຍໄປຄ່ອຍມາ ແລະ ໃຫ້ກຽດເຊີ່ງກັນ ແລະ ກັນໃນຂະນະຂັບຂີ່, ພ້ອມທັງປະຕິບັດຕາມກົດລະບຽບການສັນຈອນຢ່າງເຄັ່ງຄັດ ເພື່ອຮັບປະກັນບໍ່ມີໃຫ້ອຸບັດຕິເຫດເກີດຂຶ້ນໄດ້.

ຂ່າວ;ພາບ: ບຸນຕຽງ ຈັນທະວົງ