ວັນທີ 20-21 ສິງຫາ 2024ນີ້, ຢູ່ເມືອງເງິນ ແຂວງໄຊຍະບູ ລີ ໄດ້ເກີດມີຝົນຕົກໜັກຫລາຍຊົ່ວໂມງຕິດຕໍ່ກັນ ຮອດຕອນເຊົ້າເວລາ 7:30 ໂມງ ເຮັດໃຫ້ນໍ້າຍາງ ແລະ ນໍ້າເງິນ ບວກກັບນໍ້າປ່າໄຫລຊຸຖ້ວມ ທົ່ງນາ ຮົ້ວ-ສວນ ແລະ ບ້ານເຮືອນປະຊາຊົນໃນຫລາຍບ້ານ.
ພາຍຫລັງໄດ້ຮັບແຈ້ງທາງຄະນະກໍາມະການຕ້ານ ແລະ ສະກັດກັ້ນໄພພິບັດຂັ້ນເມືອງ, ນໍາໂດຍ ທ່ານທະວິສັກ ໄຊຍະວົງ ເຈົ້າ ເມືອງ-ເມືອງເງິນ ພ້ອມດ້ວຍຄະນະນຳອົງການປົກຄອງເມືອງ ໄດ້ສົມທົບກັບພາກສ່ວນທີ່ກ່ຽວຂ້ອງເຂົ້າໄປຊ່ວຍເຫລືອປະຊາຊົນຢ່າງຮີບດ່ວນ ໂດຍສະເພາະ ແມ່ນບ້ານແກ້ວດອນຄູນ (ເປັນພື້ນທີຕ່ຳ ຕິດແຄມນໍ້າ) ເຮັດໃຫ້ນ້ຳຖ້ວມຢ່າງໄວວາ ແລະ ກະທັນຫັນ, ມີຫຼາຍຄອບຄົວໄດ້ຮັບຜົນກະທົບໜັກ,
ດັ່ງນັ້ນ, ຄະນະກໍາມະການຕ້ານ ແລະ ສະກັດກັ້ນໄພພິບັດຂັ້ນເມືອງ ໄດ້ເລັ່ງຂົນເຄື່ອງຍ້າຍຂອງ,ແລະ ສັດລ້ຽງຂອງປະຊາຊົນ. ລວມທັງເຄື່ອນຍ້າຍເອົາເດັກນ້ອຍ ຜູ້ເຖົ້ໄປຢູ່ໃນເຂດທີ່ປອດໄພ ພ້ອມທັງຕັ້ງຈຸດປະສານງານສຸກເສີນ ຢູ່ ວັດບ້ານຫລວງມີໄຊ, ປັດຈຸບັນ ທາງອົງການປົກຄອງເມືອງ ພ້ອມດ້ວຍຄະນະກຳມະ ການຕ້ານ ແລະ ສະກັດກັ້ນໄພພິບັດຂັ້ນເມືອງ ໄດ້ແຕ່ງຕັ້ງພະນັກ ງານລົງນໍາພາປະຊາຊົນເຮັດການອະນາໄມເຮືອນ, ອານາໄມບ່ອນອື່ນໆ ແລະ ຊ່ວຍເຫລືອສຸກເສີນ ເຊັ່ນ: ນ້ຳດື່ມ, ອາຫານ, ທີມງານແພດໜໍໄວ້ບໍລິການ.
ສໍາລັບຂໍ້ມູນຜົນເສຍຫາຍເບື້ອງຕົ້ນ, ໂດຍສະເພາະແມ່ນບ້ານທີ່ນອນຢູ່ໃນກຸ່ມສ່ຽງຄື: ບ້ານແກ້ວດອນຄູນ, ບ້ານບີໝີ, ບ້ານກາງ ແລະ ບ້ານທອງ ບ້ານເຮືອນຖືກມີຜົນກະທົບ 80 ກ່ວາຫລັງຄາເຮືອນ, ມີເນື້ອທີ່ທຳການຜະລິດ 123 ເຮັກຕາ, ສັດລ້ຽງເສຍ ຫາຍ ເກືອບ 100 ໂຕ, ໜອງປາ 30 ກ່ວາໜອງ, ຊົນລະປະ ທານ ເສຍຫາຍຈໍານວນໜຶ່ງ. ພື້ນຖານໂຄງລ່າງໄດ້ຮັບຜົນເສຍຫາຍຖືກດິນເຊາະເຈື່ອນ ບ້ານກິ່ວງີ້ວ, ບ້ານປາງບົງ, ບ້ານບໍ່ຫລວງ, ບ້ານ ປຸ່ງຟາດ, ເສັ້ນທາງເປ່ເພ 2 ເສັ້ນ, ຂົວ ເປ່ເພ 1 ແຫ່ງ, ນ້ຳປະປາ ທໍ່ຫົວງານຂາດ ໃຊ້ການບໍ່ໄດ້ ສ່ວນມູນຄ່າການເສຍຫາຍຍັງຢູ່ໃນການປະເມີນ.
ຂ່າວ: ແຂວງໄຊຍະບູລີ
