ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ບັນຍາກາດການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ໃນວັນທີ 11/06/2018

ການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ໃນຕອນເຊົ້າມື້ນີ້ ພາຍໃຕ້ການເປັນປະທານຂອງ ທ່ານ ບຸນປອນ ບຸດຕະນະວົງ, ຮອງປະທານສະພາແຫ່ງຊາດ. ຜູ້ແທນກອງປະຊຸມໄດ້ຮັບຟັງ ແລະ ປະກອບຄຳເຫັນໃສ່ບົດລາຍງານຂອງລັດຖະບານກ່ຽວກັບແຜນແມ່ບົດຈັດສັນທີ່ດິນແຫ່ງຊາດ ສະເໜີໂດຍ ທ່ານ ສົມມາດ ພົນເສນາ, ລັດຖະມົນຕີກະຊວງ ຊັບພະຍາ ກອນທຳມະຊາດ ແລະ ສິ່ງແວດລ້ອມ ທ່ານໄດ້ຍົກໃຫ້ເຫັນສະພາບການຄຸ້ມຄອງທີ່ດິນໃນໄລຍະຜ່ານມາ, ແຜນແມ່ບົດຈັດສັນທີ່ດິນແຫ່ງຊາດ, ນະໂຍບາຍ ແລະ ຍຸດທະສາດໃນການສ້າງແຜນແມ່ບົດຈັດສັນທີ່ດິນແຫ່ງຊາດ ແລະ ມາດຕະການໃນການຈັດຕັ້ງປະຕິບັດ ເພື່ອໃຫ້ການຄຸ້ມຄອງທີ່ດິນມິປະສິດທີ່ຜົນກ່ວາເກົ່າ.

ທ່ານ ສົມມາດ ພົນເສນາ ຍົກໃຫ້ເຫັນບາງຕອນວ່າ: ເຖີງວ່າໄດ້ມີກົດໝາຍ ແລະ ນິຕິກຳຕ່າງຯ ກ່ຽວກັບການຄຸ້ມຄອງທີ່ດິນຫລາຍສະບັບກໍຕາມ ແຕ່ໄລຍະຜ່ານມາການລະເມີດກົດໝາຍ ແລະ ລະບຽບການທີ່ວາງໄວ້ຍັງມີຫລາຍ ເປັນຕົ້ນ: ການຫລົບຫລີກພາສີທີ່ດິນ, ການບຸກລຸກແບ່ງປັນເອົາທີ່ດິນຂອງລັດ ແລະ ອື່ນຯ ຈິ່ງມີຄວາມຈຳເປັນຕ້ອງມີມາດຕະການຄູ້ມຄອງທີ່ດິນມີປະສິດທິຜົນກ່ວາເກົ່າ.

ພາຍຫລັງ ທ່ານ ສົມມາດ ພົນເສນາ ຂຶ້ນລາຍງານສຳເລັດ ທ່ານ ບຸນປອນ ສີສຸລາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໄດ້ຕາງໜ້າຄະນະປະຈຳສະພາແຫ່ງຊາດປະກອບຄຳເຫັນໃສ່ບົດລາຍງານຂອງລັດຖະບານສະບັບນີ້ ໂດຍຍົກໃຫ້ເຫັນວ່າ: ຈາກການຕີລາຄາຂອງຄະນະປະຈຳສະພາແຫ່ງຊາດເຫັນວ່າການຄູ້ມຄອງທີ່ດິນໄລຍະຜ່ານມາເກີດມີປະກົດການຫຍໍ້ທໍ້ຫລາຍຢ່າງກ່ຽວກັວບັນຫາທີ່ດິນ ເປັນຕົ້ນ: ບັນຫາການອອກໃບຕາດິນຊ້ຳຊ້ອນ, ການນຳໃຊ້ທີ່ດິນບໍ່ຖືກຕ້ອງຕາມເປົ້າໝາຍ, ການບຸກລຸກດິນຂອງລັດ ແລະ ອື່ນຯ. ຄະນະປະຈຳສະພາແຫ່ງຊາດຈິ່ງສະເໜີໃຫ້ພາກສ່ວນກ່ຽວຂ້ອງກວດກາຄືນ ແລະ ເອົາໃຈໃສ່ຫລາຍບັນຫາໃນແຜນແມ່ບົດຈັດສັນທີ່ດິນແຫ່ງຊາດຂອງລັດຖະບານສະບັບນີ້ ເປັນຕົ້ນ: ກວດກາຄືນບັນດາຂໍ້ມູນກ່ຽວກັບທີ່ດິນທີ່ກຳນົດໄວ້ ເພາະເປັນຂໍ້ມູນເກົ່າທີ່ສຳຫລວດມາແລ້ວຫລາຍປີ, ການສຳຫລວດທີ່ດິນຕ້ອງສອດຄ່ອງ ແລະ ເໝາະສົມກັບຄວາມເປັນຈິງຫລາຍກ່ວາເກົ່າ ແລະ ອື່ນຯ.

ຈາກນັ້ນ ສະມາຊິກສະພາແຫ່ງຊາດ ໄດ້ປະກອບຄຳເຫັນໃສ່ບົດລາຍງານສະບັບນີ້ ຕາມການເຈາະຈີ້ມຂອງປະທານສະພາແຫ່ງຊາດ ເຫັນວ່າມີບັນຍາກາດຄຶກຄື້ນສົມຄວນ ເນື່ອງຈາກສະມາຊິກສະພາແຫ່ງຊາດຜັດປ່ຽນກັນປະກອບຄຳເຫັນຫລາຍບັນຫາເພື່ອໃຫ້ບົດລາຍງານສະບັບນີ້ມີເນື້ອໃນຄົບຖ້ວນກ່ວາເກົ່າ.

ທ່ານ ນາງ ສີໄຄ ສີປະເສີດ, ສະມາຊິກສະພາແຫ່ງຊາດເຂດເລືອກຕັ້ງທີ 11 ແຂວງ ບໍລິຄຳໄຊ ປະກອບຄຳເຫັນສະເໜີໃຫ້ລັດຖະບານ ກໍຄື ກະຊວງກ່ຽວຂ້ອງກວດກາຄືນຕົວເລກບັນດາຕົວເລກເນື້ອທີ່ດີນປະເພດຕ່າງຯ ທີ່ກຳນົດຢູ່ໃນແຜນແມ່ບົດຈັດສັນທີ່ດິນແຫ່ງຊາດສະບັບນີ້ ເພາະອາດມີຕົວເລກຄາດເຄື່ອນຫລາຍສົມຄວນ.

ສຳລັບການປະກອບຄຳເຫັນໃສ່ບົດລາຍງານຂອງລັດຖະບານກ່ຽວກັບແຜນແມ່ບົດຈັດສັນທີ່ດິນແຫ່ງຊາດ ຕາມແຜນແລ້ວດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ຈະໃຫ້ສຳເລັດໃນຕອນບ່າຍມື້ນີ້.