ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນອາທິດຜ່ານມາ ທີ່ນະຄອນຫຼວງຮ່າໂນ້ຍ ເອກອັກຄະລັດຖະທູດບັນດາປະເທດອາຊຽນ ປະຈຳ ສສ ຫວຽດນາມ ແລະ ຕີມໍ-ເລສເຕ ນຳໂດຍ ທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ໄດ້ເຂົ້າຢ້ຽມຄຳນັບ ທ່ານ ເຈິ່ນ ແທັງ ເໝີນ ປະທານສະພາແຫ່ງຊາດ ສສ ຫວຽດນາມ ຄົນໃໝ່.
ທ່ານ ນາງ ຄຳເພົາ ເອີນທະວັນ ໄດ້ຕາງໜ້າເອກອັກຄະລັດຖະທູດບັນດາປະເທດອາຊຽນ ປະຈຳ ສສ ຫວຽດນາມ ແລະ ຕີມໍ-ເລສເຕ ມີຄຳເຫັນ ໂດຍທ່ານໄດ້ຕີລາຄາສູງຕໍ່ການປະກອບສ່ວນຢ່າງມີປະສິດທິຜົນ ຂອງສະພາແຫ່ງຊາດຫວຽດນາມ ໃນຕະຫຼອດໄລຍະເວລາເກືອບ 30 ປີ ນັບແຕ່ເຂົ້າເປັນສະມາຊິກຂອງ AIPO/AIPA ສະພາແຫ່ງຊາດຫວຽດນາມ ໄດ້ຜັນຂະຫຍາຍຫຼາຍຂໍ້ລິເລີ່ມ ປະກອບສ່ວນຢ່າງຕັ້ງໜ້າເຂົ້າໃນການປະຕິບັດບັນດາຈຸດໝາຍຂອງວິໄສທັດ ປະຊາຄົມອາຊຽນ 2045 ແລະ ໄດ້ວາງຫຼາຍຂໍ້ລິເລີ່ມ ຕັ້ງໜ້າປະກອບສ່ວນເຂົ້າຮ່ວມຍົກສູງປະສິດທິຜົນ ໃນການຮ່ວມມືລະຫວ່າງລັດຖະສະພາພາກພື້ນ ທ່ານເອກອັກຄະລັດຖະທູດລາວຍັງໄດ້ກ່າວວ່າ: ກົນໄກການເຈລະຈາ ແລະ ການຮ່ວມມືແມ່ນວິທີແກ້ໄຂຄວາມບໍ່ແນ່ນອນທາງດ້ານພູມສາດ ແລະ ເສດຖະກິດທີ່ສັບສົນຂອງໂລກໃນປັດຈຸບັນ ອາຊຽນ ແມ່ນກຸນແຈສຳຄັນໃນການຊຸກຍູ້ສັນຕິພາບ ແລະ ສະຖຽນລະພາບຂອງໂລກ AIPA ມີບົດບາດສຳຄັນໃນການດຶງດູດປະຊາຊົນອາຊີຕາເວັນອອກສ່ຽງໃຕ້ ເຂົ້າຮ່ວມບັນດານະໂຍບາຍເລັ່ງລັດ ການສ້າງວິໄສທັດປະຊາຄົມອາຊຽນ 2045.
ໂອກາດດັ່ງກ່າວ ທ່ານ ເຈິ່ນ ແທັງ ເໝີນ ປະທານສະພາແຫ່ງຊາດ ຫວຽດນາມ ໄດ້ສະແດງຄວາມຂອບອົກຂອບໃຈຢ່າງເລິກເຊິ່ງ ເຖິງບັນດາການນຳຂອງສະພາແຫ່ງຊາດ ລັດຖະສະພາບັນດາປະເທດອາຊຽນ ທີ່ໄດ້ສົ່ງຈົດໝາຍມາອວຍພອນທ່ານທີ່ໄດ້ຮັບເລືອກຕັ້ງ ເປັນປະທານສະພາແຫ່ງຊາດ ຫວຽດນາມ ຄົນໃໝ່ ສະແດງຄວາມຊົມເຊີຍ ສປປ ລາວ ຕໍ່ກັບຄວາມຮັບຜິດຊອບຂອງການເປັນປະທານອາຊຽນ ແລະ ການເປັນປະທານລັດຖະສະພາ ລະຫວ່າງປະເທດອາຊຽນ (AIPA) ໃນປີ 2024 ແລະ ເຊື່ອໝັ້ນວ່າ ພາຍໃຕ້ການນຳພາຂອງປະທານປະເທດແຫ່ງ ສປປ ລາວ ອາຊຽນ ແລະ AIPA ຈະສືບຕໍ່ບັນລຸໄດ້ຜົນສຳເລັດໃໝ່ ປະກອບ ສ່ວນເຂົ້າໃນສັນຕິພາບ ສະຖຽນລະພາບ ການຮ່ວມມື ແລະ ການພັດທະນາແບບຍືນຍົງໃນພາກພື້ນ.
ທີ່ມາ: ວຽງຈັນທຸລະກິດສັງຄົມ
May be an image of 11 people