ບັນດາເຈົ້າຄອງນະຫລວງອາຊຽນ ຮ່ວມກັນແລກປ່ຽນທັດ ສະນະ ແລະປຶກສາຫາລືກ່ຽວກັບການພັດທະນາຕົວເມືອງ ໃນກອງປະຊຸມຄົບຄະນະເຈົ້າຄອງນະຄອນຫລວງອາຊຽນ ພາຍໃຕ້ຫົວຂໍ້ ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອການພັດທະນາແບບຍືນຍົງຂອງບັນດານະຄອນອາຊຽນ ໃນວັນທີ 18 ກັນຍາ 2024 ທີ່ຫໍປະຊຸມແຫ່ງຊາດນະຄອນຫລວງວຽງຈັນ ຄຽງຄູ່ກັບກອງປະຊຸມຍ່ອຍປີ່ນອ້ອມ 5 ຂົງເຂດວຽກງານທີ່ສໍາຄັນຄື: ຕົວເມືອງທີ່ໜ້າຢູ່ ແລະຍືນຍົງ, ການທ່ອງທ່ຽວສີຂຽວ, ການພັດທະນາເສດຖະກິດແບບຍືນຍົງ, ຕົວເມືອງທີ່ມີຄວາມຍືນ ຍົງທາງດ້ານສິ່ງແວດລ້ອມ; ແລະ ຄວາມເຂັ້ມແຂງທາງດ້ານການ ປ່ຽນແປງດິນຟ້າອາກາດ ແນໃສ່ເຮັດໃຫ້ການພັດທະນາຕົວເມືອງໄດ້ຮັບການພັດທະນາ, ໜ້າຢູ່, ສີວິໄລ ແລະ ຍືນຍົງ.
ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫລວງວຽງຈັນ ໄດ້ຍົກໃຫ້ເຫັນວ່າ: ປະຊາຄົມອາຊຽນໄດ້ເຕີບໃຫ່ຍ ແລະ ຂະຫຍາຍຕົວເປັນແຕ່ລະໄລຍະ, ມີປະຊາກອນຫລາຍກວ່າ 679 ລ້ານຄົນ ກວມ 8 ສ່ວນຮ້ອຍຂອງປະຊາກອນໂລກ ແລະ ເປັນຊຸມ ຊົນທີ່ໃຫ່ຍຂອງໂລກ ດ້ວຍສະພາບ, ພູມສັນຖານ, ທ່າແຮງ ແລະ ນະວັດຕະກຳໃໝ່ໆ ເຮັດໃຫ້ບັນດານະຄອນ ແລະປະເທດສະມາ ຊິກອາຊຽນ ສາມາດເຊື່ອມຈອດກັນໄດ້ງ່າຍຂື້່ນ ເປັນຕົ້ນການ ເຊື່ອມຈອດດ້ານພື້ນຖານໂຄງລ່າງຄົມມະນາຄົມ, ເຊື່ອມຈອດດ້ວຍການສ້າງຄວາມຮັບຮູ້ ຫລືລະບຽບການ ແລະການເຊື່ອມຈອດທາງດ້ານວັດທະນະທຳສັງ ຄົມ. ຄາດວ່າພາຍຫລັງສໍາເລັດກອງປະຊຸມຄັ້ງນີ້ ບັນດານະຄອນຈະຊຸກຍູ້ສົ່ງເສີມໃຫ້ປະຊາກອນອາ ຊຽນມີການໄປມາ-ຫາສູ່ ເພື່ອແລກປ່ຽນດ້ານວັດທະນະທຳ ແລະ ການທ່ອງທ່ຽວ ລະຫວ່າງກັນຫລາຍຂື້ນ.
ໂອກາດນີ້ທ່ານ ອາດສະພັງທອງ ສີພັນດອນ ຍັງຊີ້ໃຫ້ເຫັນວ່າ: ລັດຖະບານລາວ ກໍຄືນະຄອນຫຼວງວຽງຈັນ ໄດ້ກຳນົດແຈ້ງກ່ຽວກັບນະໂຍບາຍພັດທະນານະຄອນຫຼວງວຽງຈັນ ເຊິ່ງໃນນັ້ນນະໂຍບາຍທີ່ສໍາຄັນກ່ຽວກັບການພັດທະນາຕົວເມືອງ ແມ່ນນະໂຍບາຍ 6 ສ ຄື: ສະອາດ, ສະຫງົບ, ສີຂຽວ, ສະຫວ່າງ, ສີວິໄລ ແລະ ສະເໜີຕໍ່ກອງປະຊຸມຮັບຮູ້ວ່າການພັດທະນາຕົວເມືອງຂອງນະຄອນຫລວງວຽງຈັນ ໄປຕາມແຜນຂະຫຍາຍຜັງເມືອງ ເຊິ່ງປະຈຸບັນສະພາປະຊາຊົນນະຄອນຫຼວງວຽງຈັນ ແລະ ກະຊວງ ໂຍທາທິການ ແລະ ຂົນສົ່ງ ໄດ້ຮັບຮອງແຜນຜັນຂະຫຍາຍຜັງເມືອງສະບັບທີ 3 2024 – 2030. ໂດຍເນັ້ນໃສ່ພັດທະນາຕົວເມືອງໄປຕາມທິດສີຂຽວ ແຜນຈັດຕັ້ງປະຕິບັດຕົວເມືອງສີຂຽວຂອງນະຄອນຫຼວງວຽງຈັນ (2023 – 2030) ຈາກການເຊື່ອມຈອດຂອງບັນດານະຄອນອາຊຽນ ແນໃສ່ການແກ້ໄຂບັນຫາຄວາມຫຍຸ້ງຍາກ ທີ່ບັນດານະຄອນອາຊຽນພວມປະເຊີນຢູ່ ເປັນຕົ້ນ ບັນຫາເສດຖະກິດ, ສິ່ງແວດລ້ອມ, ການປ່ຽນແປງດິນຟ້າອາກາດ-ໄພພິບັດ, ບັນຫາຄວາມທຸກຍາກຂອງປະຊາຊົນ, ບັນຫາການຂະຫຍາຍຕົວຂອງເມືອງ ແລະ ບັນຫາອື່ນໆ, ຊື່ງການເຊື່ອມໂຍງ-ເຊື່ອມຈອດເຫລົ່ານີ້ ຈະຊ່ວຍໃຫ້ນະຄອນຫລວງປະເທດບັນດາປະເທດສະມາຊິກອາຊຽນ ກ້າວໄປສູ່ການເປັນອັນໜຶ່ງອັນດຽວກັນ ແລະ ກາຍເປັນຕົວເມືອງພັດທະນາທີ່ຍືນຍົງຮ່ວມກັນໃນອານາຄົດ.
