ບັນດາເປົ້າໝາຍຫລັກຂອງອົງການອາ ຫານໂລກ ຫລືWFP ປະຈໍາລາວ ໄດ້ຮັບການຈັດຕັ້ງປະຕິບັດຢ່າງເປັນຮູບປະທໍາຢູ່ແຂວງຜົ້ງສາລີ ແນໃສ່ສະໜັບສະໜູນ ແລະຊ່ວຍເຫລືອລັດຖະບານລາວໃນການປັບປຸງຄວາມໝັ້ນຄົງດ້ານສະບຽງອາຫານ, ຫລຸດຜ່ອນການຂາດໂພສະນາການ ແລະຮັບປະກັນລະບົບຕ່ອງໂສ້ທີ່ຍືນຍົງສຳລັບທຸກຄົນ.
ທ່ານ ກຸ ຄອງແສນເມືອງ, ຜູ້ປະສານງານອົງການອາຫານໂລກ ຫລືWFP ປະຈໍາແຂວງຜົ້ງສາລີ ໃຫ້ສໍາພາດວ່າ: ເປົ້າໝາຍຕົ້ນຕໍທີ່ອົງການອາຫານໂລກສຸມໃສ່ຈັດຕັ້ງປະຕິບັດຢູ່ແຂວງຜົ້ງສາລີກໍ່ຄືບັນດາແຂວງທີ່ໄດ້ຮັບການສະໜັບ ສະ ໜູນຈາກໂຄງການ ປະກອບມີ 4 ເປົ້າ ໝາຍຄື: ການເສີມສ້າງຄວາມເຂັ້ມແຂງໃຫ້ແຜນງານອາຫານທ່ຽງໃນໂຮງຮຽນຂອງລັດຖະບານ, ຈັດຕັ້ງປະຕິບັດກິດ ຈະກຳເພື່ອໂພສະນາການທີ່ນອນໃນເປົ້າ ໝາຍການປັບປຸງວຽກງານໂພສະນາການ ແລະການຄໍ້າປະກັນດ້ານສະບຽງອາ ຫານໃນເຂດຊຸມຊົນ ຢູ່ 4 ເມືອງໃຕ້ຄື: ເມືອງໃໝ່, ເມືອງສໍາພັນ, ບຸນໃຕ້ ແລະ ເມືອງຂວາ ລວມເຖິງກິດຈະກຳຕອບໂຕ້ທາງດ້ານໄພພິບັດ ຫລືການສ້າງຊັບສິນເພື່ອຄໍ້າປະກັນດ້ານສະບຽງອາຫານໃນເຂດທີ່ມີຄວາມສ່ຽງທີ່ຈະເກີດໄພພິບັດຢູ່ 2 ເມືອງຄື: ເມືອງຍອດອູ ແລະ ເມືອງຜົ້ງສາລີ ໃນນີ້ເມືອງຍອດອູກວມເອົາ 9 ບ້ານ ແລະ ເມືອງຜົ້ງສາລີຈໍານວນ 6 ບ້ານ ຊື່ງຈະປະກອບມີການສ້າງທະນາຄານເຂົ້າ, ການສ້າງນໍ້າລິນ, ການສ້າງເສັ້ນທາງເຂົ້າສູ່ເຂດທໍາການຜະລິດຂອງປະຊາຊົນ, ປັບປຸງລະບົບຊົນລະ ປະທານ ແລະ ສົ່ງເສີມປະຊາຊົນທຳການຜະລິດເປັນສິນຄ້າຕາມທ່າແຮງຂອງທ້ອງຖີ່ນ ເປັນຕົ້ນການປູກຊາ, ການປູກຂ່າ, ໜໍ່ໄມ້ ແລະ ລ້ຽງສັດ ສໍາລັບກິດຈະກຳປັບປຸງດ້ານສະບຽງອາຫານ ແລະ ໂພສະນາການໄດ້ການສະໜອງທືນໃຫ້ຄອບຄົວທີ່ມີແມ່ຍິງຖືພາ ແລະມີລູກນ້ອຍ ອາຍຸຕໍ່າກວ່າ 2 ປີ ເພື່ອນໍາໃຊ້ເຂົ້າໃນການປູກຝັງ ແລະລ້ຽງສັດໃນຄອບຄົວ ເພື່ອຮັບປະກັນໃຫ້ເຂົາເຈົ້າມີໂພສະນາການທີ່ດີ, ກິນ ອື່ມ ແລະມີອາຫານບໍລິໂພກຢ່າງພຽງພໍ ທັງສາມາດຄໍ້າປະກັນດ້ານສະບຽງອາຫານໃນຄອບຄົວກໍ່ຄືຊຸມຊົນ.
ອົງການອາຫານໂລກປະຈໍາລາວໃຫ້ການສະໜັບສະໜູນ ແລະເລີ່ມຈັດຕັ້ງປະຕິບັດໂຄງການຕ່າງໆຢູ່ແຂວງຜົ້ງສາລີນັບແຕ່ປີ 2002 ເປັນຕົ້ນມາ ເບື້ອງຕົ້ນໄດ້ຈັດຕັ້ງປະຕິບັດຢູ່ 2 ເມືອງຄື: ເມືອງບຸນໃຕ້ ແລະ ເມືອງໃໝ່ ຈາກນັ້ນໃນສົກ 2005-2006 ໄດ້ຂະຫຍາຍເປັນ 7 ເມືອງທົ່ວແຂວງ ປະກອບມີ ເມືອງໃໝ່, ເມືອງສໍາພັນ, ເມືອງຂວາ, ເມືອງບຸນໃຕ້, ເມືອງບຸນເໜືອ, ເມືອງຜົ້ງສາລີ ແລະ ເມືອງຍອດອູ, ມາຮອດປັດຈຸບັນກິດຈະກຳໂຄງການອາຫານທ່ຽງໃນໂຮງຮຽນໄດ້ມອບໂອນໃຫ້ລັດຖະບານສືບຕໍ່ຈັດຕັ້ງປະຕິບັດ, ສ່ວນກິດຈະກຳເພື່ອໂພສະນາການທີ່ນອນໃນເປົ້າໝາຍການປັບປຸງວຽກງານໂພສະນາການ ແລະຄໍ້າປະກັນດ້ານສະບຽງອາຫານໃນເຂດຊຸມຊົນ ລວມເຖິງກິດຈະກຳຕອບໂຕ້ທາງດ້ານໄພພິ ບັດ ຫລືການສ້າງຊັບສິນ ເພື່ອຄໍ້າປະກັນດ້ານສະບຽງອາຫານໃນເຂດທີ່ມີຄວາມສ່ຽງທີ່ຈະເກີດໄພພິບັດ ຄາດວ່າຈະມອບໃຫ້ລັດຖະບານໃນໄວໆນີ້ ເພື່ອສືບຕໍ່ສົ່ງເສີມ ແລະຊຸກຍູ້ໃຫ້ທຸກກິດຈະກຳມີຄວາມຍືນຍົງໃນອານາຄົດ.
