ໃນໂອກາດສະເຫລີມສະຫລອງ ວັນໄຊຊະນະດຽນບຽນຟູ ຄົບຮອບ 70 ປີ ຢູ່ດຽນບຽນຟູ ສສ ຫວຽດນາມ ໃນວັນທີ 7 ພຶດສະພາ 2024 ຜ່ານມານີ້, ທ່ານ ຟາມ ດຶກ ກູ (Pham Duc Cu) ໄດ້ຕາງໜ້າໃຫ້ນັກຮົບເກົ່າ, ນັກຮົບປະຕິວັດຫວຽດນາມ ຂຶ້ນມີຄຳເຫັນ ສະແດງຄວາມພາກພູມໃຈ ທີ່ໄດ້ເຂົ້າຮ່ວມການເຄື່ອນໄຫວໂດຍກົງ ໃນຂະບວນການດຽນບຽນຟູ, ໄດ້ເຫັນເຫດການປະຫວັດສາດອັນສະຫງ່າລາສີ ທີ່ເຕັມໄປດ້ວຍຄວາມລຳບາກ ແລະ ສິ່ງທ້າທາຍຂອງປະເທດຊາດ ຢູ່ບັ້ນຮົບດຽນບຽນຟູ, ພ້ອມທັງຕີລາຄາສູງຕໍ່ບັນດານັກຮົບປະຕິວັດ ແລະ ປະຊາຊົນ ຜູ້ທີ່ເສຍສະລະຊີວິດ ເພື່ອຊາດ ເພື່ອແຜ່ນດິນ ຈົນສາມາດຍາດໄດ້ໄຊຊະນະ ໃນບັ້ນຮົບດຽນບຽນຟູ.
ທ່ານ ຟາມ ດຶກ ກູ ໄດ້ໃຫ້ຮູ້ວ່າ: ໃນໄລຍະ 70 ປີຜ່ານມາ, ໃນບັ້ນຮົບຍຸດທະສາດດຽນບຽນຟູ ໃນປີ 1954, ກອງພັນໃຫຍ່ ແລະ ກອງພັນ 383 ຂອງກອງພັນໃຫຍ່ປືນໃຫຍ່ 367 ຂອງພວກເຮົາໄດ້ຮັບກຽດມອບໝາຍຈາກບັນດາຜູ້ບັນຊາການທະຫານບົກ ຈັດຕັ້ງກອງພັນຕ້ານການຍິງປືນໃຫຍ່ຂອງກອງທັບເຮືອ ດ້ວຍຈິດໃຈເດັດດ່ຽວຕໍ່ສູ້ ຍາດເອົາໄຊຊະນະ, ຕໍ່ສູ້ຢ່າງພິລະອາດຫານ, ຮ່ວມກັບບັນດາໜ່ວຍມິດຕະພາບ, ສາມາດເອົາຊະນະກອງທັບອາກາດຂອງພວກລ່າເມືອງຂຶ້ນຝຣັ່ງ ແລະ ການແຊກແຊງຂອງອາເມລິກາ, ສາມາດຕັດເສັ້ນທາງການສະໜອງການບິນຂອງສັດຕູ ຢູ່ເຂດນ່ານຟ້າດຽນບຽນ, ສາມາດຍິງເຮືອບິນ 62 ລຳ ເຊິ່ງໄດ້ປະກອບສ່ວນສຳຄັນເຂົ້າໃນໄຊຊະນະລວມຂອງກອງທັບ ແລະ ປະຊາຊົນຫວຽດນາມ ໃນຂະບວນການດຽນບຽນຟູ.
ທ່ານ ຟາມ ດຶກ ກູ ຍັງໄດ້ກ່າວອີກວ່າ: ທະຫານ ແລະ ນັກຮົບເກົ່າດຽນບຽນ ຍາມໃດກໍເຊີດຊູບັນດາຄຸນນະພາບ, ຮີດຄອງປະເພນີອັນດີງາມຂອງທະຫານລຸງໂຮ່ ເປັນແບບຢ່າງໃນການດຳລົງຊີວິດ, ປະຕິບັດຕາມແນວທາງຂອງພັກ, ນະໂຍບາຍ, ກົດໝາຍຂອງລັດ, ຕັ້ງໜ້າເຂົ້າຮ່ວມການກໍ່ສ້າງລະບົບການເມືອງທີ່ປອດໃສ ແລະ ໝັ້ນຄົງເຂັ້ມແຂງ, ໂຄສະນາເຜີຍແຜ່ອຸດົມການປະຕິວັດ, ປຸກລະດົມ ແລະ ເຊີດຊູບັນດາຮີດຄອງປະເພນີອັນສະຫງ່າລາສີ ຂອງຊາດໃຫ້ແກ່ຄົນຮຸ່ນໜຸ່ມ. ພ້ອມທັງ ສະແດງຄວາມເຊື່ອໝັ້ນວ່າ: ຄົນຮຸ່ນໜຸ່ມໃນທຸກວັນນີ້, ຍາມໃດກໍມີຄວາມພາກພູມໃຈ, ຈົດຈຳ ແລະ ເຊີດຊູບັນດາຮີດ ຄອງປະເພນີອັນສະຫງ່າລາສີຂອງຊາດ ແລະ ຈິດໃຈ ຂອງໄຊຊະນະດຽນບຽນຟູ, ກ້າຄິດ, ກ້າເຮັດ, ມີຄວາມຂະຫຍັນໝັ່ນພຽນ ແລະ ມີຫົວຄິດປະດິດສ້າງ ແລະ ປົກປັກຮັກສາປະເທດຊາດສັງຄົມນິຍົມ.
ຂ່າວ-ພາບ: ທະນູທອງ, ຂປລ
