ແຫລ່ງຂ່າວຈາກແຂວງຜົ້ງສາລີ ໃຫ້ຮູ້ວ່າ: ສະຫາຍ ເກດສະພາ ຈັນທະສອນ ສະມາຊິກຊາວໜຸ່ມຂອງໜ່ວຍຮາກຖານຊາວໜຸ່ມ ພະແນກກະສິກຳ ແລະ ປ່າໄມ້ ແຂວງຜົ້ງສາລີ, ພະນັກງານວິຊາການອາສາສະໝັກ ສັງກັດຢູ່ຂະແໜງລ້ຽງສັດ ແລະ ການປະມົງ ພະແນກກະສິກຳ ແລະ ປ່າໄມ້ແຂວງ, ປັດຈຸບັນຢູ່ບ້ານໃໝ່, ເມືອງບູນເໜືອ, ແຂວງຜົ້ງສາລີ ແມ່ນບຸກຄົນໜຶ່ງທີ່ບຸກບືນປະຕິບັດໜ້າທີ່ວິຊາສະເພາະຂອງຕົນ ແລະ ການຈັດຕັ້ງປະຕິບັດຄຳຂວັນ 4 ບຸກ ຂອງຊາວໜຸ່ມພັກປະຊາຊົນປະຕິວັດລາວແລ້ວ ຍັງເອົາໃຈໃສ່ການພັດທະນາເສດຖະກິດຄອບຄົວຂອງຕົນເອງ ໂດຍການລ້ຽງປາ ໂດຍອີງໃສ່ທ່າແຮງບົ່ມຊ້ອນຂອງທ້ອງຖິ່ນ ເພື່ອຍົກສູງລາຍໄດ້, ສ້າງຄວາມເຂັ້ມແຂງ ໃຫ້ຄອບຄົວຕາມແນວທາງຂອງພັກ ແລະ ນະໂຍບາຍຂອງລັດ.
ຄຳຂວັນ 4 ບຸກຂອງຊາວໜຸ່ມ ເປັນຕົ້ນແມ່ນບຸກທາງດ້ານແນວຄິດ, ບຸກດ້ານຝຶກຝົນຫລໍ່ຫລອມຮໍ່າຮຽນ, ບຸກດ້ານວິຊາຊີບ ແລະ ສ້າງວຽກເຮັດງານທຳນັ້ນ ບັນດາສະມາຊິກໜ່ວຍຮາກຖານຊາວໜຸ່ມ ພະແນກກະສິກຳ ແລະ ປ່າໄມ້ ແຂວງຜົ້ງສາລີ ກໍໄດ້ເປັນເຈົ້າການໃນການຈັດຕັ້ງປະຕິບັດຄຳຂວັນດັ່ງກ່າວ ໂດຍສະເພາະ ດ້ານວິຊາຊີບ ແລະ ສ້າງວຽກເຮັດງານທຳ ໃນນີ້, ໄດ້ບຸກແຂ່ງຂັນກັນສ້າງເສດຖະກິດຄອບຄົວຂອງໃຜລາວຢ່າງຫ້າວຫັນ ເຊິ່ງມີ ສະມາຊິກ 3 ສະຫາຍ ທີ່ພົນເດັ່ນໃນການສ້າງລາຍຮັບເພີ່ມຈົນກາຍເປັນຕົວແບບຂອງໜ່ວຍ.
ສະຫາຍ ເກດສະພາ ຈັນທະສອນ ໄດ້ເປັນຕົວແທນຕົວແບບໜ່ວຍຮາກຖານຊາວໜຸ່ມພະແນກກະສິກຳ ແລະ ປ່າໄມ້ ແຂວງຜົ້ງສາລີ ຂຶ້ນປະກອບຄຳເຫັນໃນກອງປະໃຫ່ຍຄັ້ງທີ່ XI ຂອງໜ່ວຍເມື່ອບໍ່ດົນມານີ້ວ່າ:
ແຕ່ກ່ອນຄອບຄົວຂອງຕົນເປັນຄອບຄົວໜຶ່ງໃນຄອບຄົວທີ່ທຸກຍາກ, ມີຈຳນວນພົນ 2 ຄົນ, ຍິງ 1 ຄົນ ອາຊີບຕົ້ນຕົ້ນຕໍ ແມ່ນພະນັກງານອາສາສະໝັກ ພະແນກກະສິກຳ ແລະ ປ່າໄມ້ແຂວງ ແລະ ເຮັດນາປູກເຂົ້າ ໂດຍອາໄສແຕ່ທຳມະຊາດ ບວກກັບເນື້ອທີ່ນາຍັງມີໜ້ອຍ ຜົນຜະລິດເຂົ້າປີໜຶ່ງໄດ້ພຽງ 270 ກິໂລກຣາມ ເຮັດນາມາຫລາຍປີແຕ່ເຂົ້າພັດບໍ່ກຸ້ມກິນ ຈຶ່ງເຮັດໃຫ້ຄອບຄົວປະສົບກັບຄວາມຫຍຸ້ງຍາກຂາດເຂີນມາຕະຫລອດ. ດັ່ງນັ້ນຈຶ່ງໄດ້ມີແນວຄິດຫັນປ່ຽນຈາກການເຮັດນາ ມາລ້ຽງປາ ສິ່ງທີ່ຊຸກຍູ້ໃຫ້ຕົນເອງລ້ຽງປາ ເນື່ອງມາຈາກການນຳພະແນກກະສິກຳ ແລະ ປ່າໄມ້ ກໍຄືຄະນະໜ່ວຍຮາກຖານຊາວໜຸ່ມພະແນກ ໄດ້ມີແບບແຜນສົ່ງເສີມການຜະລິດທາງດ້ານສະບຽງອາຫານ, ກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ພ້ອມທັງໄດ້ຮັບການເອື້ອອຳນວຍຈາກຫລາຍພາກສ່ວນ ທີ່ມີການວາງແຜນ ແລະ ຈັດຕັ້ງປະຕິບັດເຊັ່ນ: ໄດ້ຮັບການແນະນຳຈາກວິຊາການຈາກພະແນກກະສິກກຳ ແລະ ປ່າໄມ້ ບວກໃສ່ກັບຄວາມຮູ້ຂອງຕົນເອງທີ່ຮຽນຈົບ ດ້ານການລ້ຽງສັດມາກ່ອນ ແລະ ທາງດ້ານທະນາຄານນະໂຍບາຍກໍໄດ້ສ້າງເງື່ອນໄຂຫລາຍດ້ານໃນການສະໜອງທຶນກູ້ຢືມ ໃຫ້ແກ່ການປູກ ແລະ ການລ້ຽງສັດປະເພດຕ່າງໆ, ພ້ອມນີ້ຄອບຄົວຂອງຕົນເອງກໍມັກການລ້ຽງປາ ໂດຍໄດ້ເລີ່ມລົງມືລ້ຽງມາແຕ່ປີ 2020 ເປັນຕົ້ນມາ, ນຳໃຊ້ດິນຈຳນວນ 1 ຕອນ ໃນເນື້ອທີ່ 0,08 ເຮັກຕາ. ໃນປີໜຶ່ງຄອບຄົວຂອງຕົນ ໄດ້ຈຳໜ່າຍປາອອກ 1 ຊຸດ ໃນປະລິມານ 1.5 ໂຕນ ຂາຍໄດ້ 63 ລ້ານກີບຕໍ່ປີ ໂດຍຫັກຄ່າສິ້ນເປືອງ ການບູລະນະຮັກສາສະຖານທີ, ອາຫານ ແລະ ອື່ນໆ ອອກທັງໝົດ 44 ລ້ານກີບ ຍັງເຫລືອກຳໄລຫັກເຂົ້າໄວ້ຄອບຕົວຕົວຈິງ 19 ລ້ານກີບ ມີລາຍຮັບເພີ່ມສະເລ່ຍໃສ່ຫົວຄົນພາຍໃນຄອບຄົວ 9 ລ້ານ 5 ແສນກີບຕໍ່ຄົນຕໍ່ປີ.
ສະຫາຍ ເກດສະພາ ຈັນທະສອນ ໃຫ້ຮູ້ຕື່ມວ່າ: ຂັ້ນຕອນຂອງການລ້ຽງປາ ພາຍຫລັງທີ່ຈຳໜ່າຍປາອອກໝົດ ແມ່ນຕາກໜອງໃຫ້ແຫ້ງ ແລ້ວວ່ານປຸຍຂາວ, ໃສ່ຝຸ່ນຄອກປະໄວ້ 7 ວັນ ແລ້ວເອົານ້ຳເຂົ້າໃສ່ໄວ້ 3 ວັນ ຈຶ່ງເອົາປານ້ອຍລົງປ່ອຍ ໂດຍການປ່ອຍປານ້ອຍໃສ່ໜອງແມ່ນເລີ່ມເຂົ້າເດືອນ ເມສາ ເຊິ່ງແນວພັນປານ້ອຍແມ່ນຊື້ມາຈາກ ສປ ຈີນ ແລະ ນະຄອນຫລວງວຽງຈັນ ໂດຍໃຫ້ອາຫານເປັນປະຈຳວັນ (ເຊົ້າ ແລະ ແລງ) ພ້ອມທັງຕິດຕາມສັງເກດການເປັນປະຈຳ ແລະ ປ່ອຍນ້ຳເຂົ້າອອກເປັນປະຈຳ. ສຳລັບການຈຳໜ່າຍປາທີ່ໃຫຍ່ອອກຂາຍແມ່ນມີພໍ່ຄ້າ, ແມ່ຄ້າຄົນກາງເຂົ້າມາຊື້ຢູ່ໜອງປາເລີຍ. ດ້ານດີຂອງການລ້ຽງປາ ແມ່ນຕົນເອງໄດ້ມີລາຍຮັບດີຂຶ້ນ ມີທຶນພັດທະນາຄອບຄົວ, ປັດຈຸບັນການລ້ຽງປາເຫັນວ່າມີຜົນດີເຊັ່ນ: ຕະຫລາດມີຄວາມຕ້ອງການນັບມື້ນັບເພີ່ມຂຶ້ນ, ຜູ້ຄົນຊອກບໍລິໂພກຊີ້ນປາຫລາຍຂຶ້ນ, ເຖິງວ່າການລ້ຽງປາຈະໃຊ້ຕົ້ນທຶນຫລາຍ ໃນການຊື້ຫົວອາຫານ, ແຕ່ກໍບໍ່ໄດ້ໃຊ້ແຮງງານຫລາຍ ແລະ ຍັງມີເວລາໄປເຮັດການຜະລິດແນວອື່ນໄດ້ຕື່ມອີກ ໂດຍສະເພາະພະນັກງານ ກໍສາມາດໃຊ້ເວລານອກໂມງການລ້ຽງປາໄດ້. ນອກຈາກການລ້ຽງປາແລ້ວຄອບຄົວຂອງຕົນ ຍັງໄດ້ລ້ຽງສັດປີກຈຳນວນໜຶ່ງ ແລະ ປູກຜັກສວນຄົວຕື່ມອີກ. ສຳລັບທິດທາງແຜນການໃນຕໍ່ໜ້ານີ້ ຈະສູ້ຊົນບຸກບືນລ້ຽງປາໃຫ້ດີກວ່າເກົ່າ ໂດຍໃຫ້ມີຜົນຜະລິດເພີ່ມຂຶ້ນເປັນ 2 ໂຕນຕໍ່ປີ (ໃນຈຳນວນພື້ນທີ່ໜອງປາເດີມ).
ຂ່າວ: ສົມຄິດ
