ວັນທີ 2 ກັນຍານີ້ ອົງການປົກຄອງນະຄອນຫຼວງພະບາງ ໄດ້ຈັດບຸນຊ່ວງເຮືອປະເພນີ ໃນໂອກາດບຸນຫໍ່ເຂົ້າປະດັບດິນ ປະຈໍາປີ ພສ 2567, ຄສ 2024, ໂດຍມີ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ສົມສະຫວາດ ເລັ່ງສະຫວັດ ອະດິດຮອງນາຍົກລັດຖະມົນຕີ, ພ້ອມດ້ວຍບັນດາການນຳຂັ້ນແຂວງ, ຂັ້ນນະຄອນ-ເມືອງ, ແຂກຮັບເຊີນ ແລະ ມວນຊົນທັງພາຍໃນ ແລະຕ່າງປະເທດ ຮ່ວມຊົມຮ່ວມເຊຍຕາມແຄມຝັ່ງນ້ຳຄານ.
ພິທີ ເລີ່ມແຕ່ຕອນເຊົ້າ ໂດຍໄດ້ເຕົ້າໂຮມການນໍາພັກ-ລັດ ຊາວພຸດທະສາສະນິກະຊົນ, ແຂກທັງພາຍໃນ ແລະຕ່າງປະເທດ, ຕະຫຼອດຮອດປະຊາຊົນບັນດາເຜົ່າ ພ້ອມກັນໃສ່ບາດຖວາຍເຄື່ອງວັດຖຸທານທານ ແດ່ພະສົງ-ສາມະເນນ ແລະປະກອບພິທີທາງສາສະໜາ ຢູ່ຕາມວັດວອາຣາມແຕ່ລະແຫ່ງ, ຈາກນັ້ນ ໄດ້ເຕົ້າໂຮມບັນດາການນຳ, ແຂກຮັບເຊີນ ແລະເຮືອຊ່ວງທີ່ເຂົ້າຮ່ວມແຂ່ງຂັນຢູ່ເຂດຜາມໄຊເຮືອຊ່ວງ.
ໃນໂອກາດນີ້ ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ກ່າວເປີດພິທີຢ່າງເປັນທາງການວ່າ: ເປັນປະຈຳທຸກປີ ພໍຮອດມື້ແຮມ 14 ຄໍ່າເດືອນ 9 ທີ່ຊາວຫຼວງພະບາງ ເມືອງມໍລະດົກໂລກ ໄດ້ຈັດໃຫ້ມີບຸນຊ່ວງເຮືອປະເພນີ ໂອກາດບຸນຫໍ່ເຂົ້າປະດັບດິນ, ອັນເປັນປາງບຸນໜຶ່ງ ທີ່ໄດ້ ສືບທອດກັນມາແຕ່ສັດຕະວັດທີ 19 ໂດຍແມ່ນເຈົ້າມັນທາຕຸຣາດ ກະສັດປົກຄອງອານາຈັກລາວລ້ານຊ້າງຫລວງພະບາງ ເປັນຜູ້ລິເລີ່ມ ແລະໄດ້ຮັບການສືບທອດມາເຖີງປັດຈຸບັນ ເປັນການສະແດງເຖີງ ພາລະກຳລັງ ຄວາມສາມັກຄີ ແລະບົດຮຽນ-ປະສົບການ ລະຫວ່າງປະຊາຊົນບັນດາເຜົ່າ, ພ້ອມທັງເປັນການບູຊາພະຍານາກ 15 ຕະກູນ ທີ່ເປັນເຈົ້າປົກປັກຮັກສາຊາວຫຼວງພະບາງ ແລະ ປົກປັກຮັກສາບ້ານເມືອງ ໃຫ້ມີຄວາມຈະເລີນຮຸ່ງເຮືອງ ແລະຢູ່ເຢັນເປັນສຸກຕະຫລອດໄປ.
ທ່ານກ່າວຕື່ມວ່າ: ບຸນຊ່ວງເຮືອທີ່ນະຄອນຫຼວງພະບາງ ເມືອງມໍລະດົກໂລກ ປີນີ້ ມີເຮືອຊ່ວງປະເພນີຈາກບ້ານຕ່າງໆພາຍໃນນະຄອນ ຫຼວງພະບາງ, ຕາງໜ້າຈາກເມືອງອ້ອມຂ້າງ, ພິເສດອົງການປົກຄອງແຂວງຫຼວງພະບາງ ໄດ້ເປີດກວ້າງໃຫ້ມີສີພາຍ ແລະເຮືອຊ່ວງຈາກຕ່າງແຂວງ ເຂົ້າຮ່ວມແຂ່ງຂັນ ລວມທັງໝົດ 25 ລໍາ,
ພ້ອມນີ້, ທ່ານໄດ້ຮຽກຮ້ອງໃຫ້ຫົວໜ້າສີພາຍເຮືອຊ່ວງ ແລະຄະນະກຳມະການ ພ້ອມກັນປະຕິບັດລະບຽບຂອງການແຂ່ງຂັນໃຫ້ເຂັ້ມງວດ ເພື່ອເຮັດໃຫ້ບຸນຊ່ວງເຮືອປີນີ້ ມີບັນຍາກາດເບີກບານມ່ວນຊື່ນ ແລະຮັກສາໄດ້ຮີດຄອງປະເພນີອັນດີງາມ, ຮັບປະກັນໃຫ້ນັກທ່ອງທ່ຽວທີ່ມາທ່ຽວຊົມມີຄວາມປະທັບໃຈ.
ພາຍຫຼັງເປີດພິທີຢ່າງເປັນທາງການ ໄດ້ເລີ້ມການແຂ່ງຂັນຕາມຕາຕະລາງຄາດຄູ່ ໂດຍເລີ້ມຈາກເຮືອຊ່ວງນາງດຳ ນາງດ່ອນ ອັນເປັນການເປີດສາກການແຂ່ງຂັນ ຕາມຮີດຄອງປະເພນີ, ສ່ວນການແຂ່ງຂັນຈະປະຕິບັດໃນຮູບແບບ ເສຍສອງຄັ້ງແລ້ວຄັດອອກ ພ້ອມທັງຈັດອັນດັບທີ່, ສ່ວນເຮືອທີ່ເສຍຄັ້ງໜຶ່ງ ແມ່ນສາມາດຊີງຂຶ້ນໄປເຖີງຮອບຊີງຊະນະເລີດ ໂດຍຈະດຳເນີນເປັນເວາ 1 ວັນຈຶ່ງສຳເລັດ.
