ວັນທີ 30 ສີງຫາ 2024 ນີ້ ທີ່ຫ້ອງວ່າການນະຄອນ ຫຼວງພະບາງ ໄດ້ຈັດພິທີຈົກສະຫຼາກ ຄາດຄູ່ ເຮືອຊ່ວງເຂົ້າຮ່ວມແຂ່ງຂັນ ບຸນຊ່ວງເຮືອປະເພນີ ປະຈຳປີ 2024 ທີ່ຍື່ງນໍ້າຄານ ນະຄອນ ຫຼວງພະບາງ, ໂດຍເປັນປະທານຂອງ ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ
ໃນພິທີ ທ່ານ ວຽງທອງ ຫັດສະຈັນ ມີຄຳເຫັນຊີ້ນຳໃຫ້ຫົວໜ້າ ແລະ ສີພາຍເຮືອຊ່ວງທີ່ເຂົ້າຮ່ວມແຂ່ງຂັນ ລວມທັງຄະນະກຳມະ ການທຸກພາກສ່ວນ ພ້ອມກັນປະຕິບັດກົດລະບຽບການແຂ່ງຂັນໃຫ້ເຂັ້ມງວດ, ຍົກສູງຄວາມມີນ້ຳໃຈນັກກິລາ, ແນໃສ່ຮັບປະກັນຄວາມສະຫງົບ ຄວາມເປັນລະບຽບຮຽບຮ້ອຍ-ຍຸຕິທຳ, ເປັນການສົ່ງເສີມກິລາຊ່ວງເຮືອ ແລະສົ່ງເສີມດ້ານສຸຂະພາບ, ມິດຕະພາບ ແລະຄວາມສາມັກຄີຂອງປະຊາຊົນບັນດາເຜົ່າ, ປະກອບສ່ວນການຮັກສາ ແລະເສີມຂະຫຍາຍວັດທະນະທຳຮີດຄອງປະເພນີ ທີ່ເປັນເອກະລັກສະເພາະຂອງຊາວຫຼວງພະບາງ ໄວ້ຄຽງຄູ່ກັບເມືອງມໍລະດົກໂລກ ເພື່ອດຶງດູດເອົານັກທ່ອງທ່ຽວທັງພາຍໃນ ແລະຕ່າງປະເທດ ເຂົ້າມາທ່ຽວຊົມຫຼວງພະບາງໃຫ້ນັບມື້ນັບເພີ້ມຂຶ້ນ ສ້າງເງື່ອນໄຂໃຫ້ແກ່ການຂະຫຍາຍຕົວທາງດ້ານເສດຖະກິດ -ສັງຄົມ ຂອງນະຄອນ ຫຼວງພະບາງ ກໍ່ຄືຂອງແຂວງໃຫ້ນັບມື້ນັບສູງຂຶ້ນ.
ຈາກນັ້ນ ໄດ້ຈົກສະຫຼາກຄາດຄູ່ ແລະຈົກສະຫຼາກລ່ອງນ້ຳ ເຮືອຊ່ວງທີ່ເຂົ້າແຂ່ງຂັນ ຈຳນວນ 25 ລໍາ ໂດຍມີເຮືອຊ່ວງຈາກບັນດາບ້ານ ແລະເມືອງພາຍໃນແຂວງເຂົ້າຮ່ວມ 22 ລຳ, ສ່ວນເຮືອຊ່ວງຕ່າງແຂວງມີເຮືອເຂົ້າຮ່ວມ 3 ລໍາຄື: ທະນາຄານຮ່ວມພັດທະນາ JDB ລີ່ສອດປາກນ້ຳຄານ, ທະນາຄານພັດທະນາລາວ LDB ແລະບໍລິສັດພັນທະມິດກຣຸບ ແຂວງໄຊຍະບູລີ. ການແຂ່ງຂັນຈະດຳເນີນໃນຮູບແບບ ເສຍສອງລ່ອງແລ້ວຂັດອອກ ພ້ອມຈັດອັນດັບທີ່ ສ່ວນທີ່ເຮືອຊະນະໜື່ງລ່ອງ ສາມາດເຂົ້າແຂ່ງຂັນໃນຮອບຕໍ່ໄປຈົນເຖີງຮອບຊີງຊະນະເລີດ, ໃຊ້ເວລາ 1 ວັນ ຄືວັນທີ່ 2 ກັນຍາ 2024.
