ວັນທີ່ 21 ສີງຫາ 2024 ນີ້ ທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ ໄດ້ຕາງໜ້າໃຫ້ຄະນະພັກ ອົງການປົກຄອງນະຄອນ ຫຼວງພະບາງ ໄດ້ຖະແຫຼງຂ່າວຕໍ່ສື່ມວນຊົນວ່າ: ເພື່ອປະຕິບັດຕາມຮີດຄອງປະເພນີອັນດີງາມຂອງຊາວຫຼວງພະບາງ ເມືອງມໍລະດົກໂລກ ທີ່ເຄີຍສືບທອດກັນມາແຕ່ບູຮານນະການ ແລະຂໍຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍ ການແຕ່ງຕັ້ງຄະນະກຳມະການຮັບຜິດຊອບຈັດງານບຸນຫໍ່ເຂົ້າປະດັບດິນ ທີ່ຍຶ່ງຄານ ນະຄອນຫຼວງພະບາງ. ໃນປີ 2024 ນີ້ ນະ ຄອນຫຼວງພະບາງ ຈະໄດ້ເປີດກວ້າງບຸນເຮືອຊ່ວງປະເພນີ ແລະສີພາຍ ຢູ່ພາຍໃນປະເທດ ເພື່ອເຂົ້າຮ່ວມແຂ່ງຂັນຢູ່ທີ່ຍຶ່ງຄານ ໂດຍເນັ້ນເຖິງ ຄວາມເປັນວັດທະນະທຳ ແລະປະເພນີອັນດີງາມ ຄາດຄະເນຈະມີເຮືອເຂົ້າຮ່ວມປະມານ 23 ລໍາ, ທີ່ມາຈາກບັນດາບ້ານ ພາຍໃນນະຄອນ ຫຼວງພະບາງ, ພະແນກການ-ອົງການ, ເມືອງພາຍໃນແຂວງ, ສ່ວນຕ່າງແຂວງ ຈະມີແຂວງໄຊຍະບູລີ, ນະຄອນຫຼວງວຽງຈັນ ເຂົ້າຮ່ວມ.
ປັດຈຸບັນນີ້ ການກະກຽມວຽກງານແຕ່ລະດ້ານ ຖືວ່າໄດ້ຕິດພັນກັບການສ້າງຂະບວນການເພື່ອ ສະເຫຼີມສະຫຼອງປີທ່ອງທ່ຽວລາວ 2024 ເມື່ອນັກທ່ອງທ່ຽວໄດ້ເຂົ້າມາທ່ຽວຊົມຫຼວງພະບາງ ໃນໄລຍະບຸນ ໃຫ້ມີຄວາມປະທັບໃຈ.
ສ່ວນລາຍການເຄື່ອນໄຫວບຸນທາງຄະນະຮັບຜິດຊອບແມ່ນໄດ້ກຳນົດເອົາແຕ່ວັນທີ 24 ສິງຫາ-2 ກັນຍາ 2024 ໃນນັ້ນ ວັນທີ 24 ສິງຫາ – 2 ກັນຍາ 2024 ມີງານຕະຫຼາດນັດວາງສະແດງສິນຄ້າ ທີ່ເດີ່ນທາດຫຼວງ, ວັນທີ 27 ສິງຫາ ບຸນຊ່ວງເຮືອທີ່ຍື່ງຄານ ບ້ານຫາດຮ່ຽນ, ວັນທີ 31 ສິງຫາ ບຸນຊ່ວງເຮືອທີ່ຍື່ງດົງ ບ້ານສັງຄະໂລກ, ວັນທີ 1 ກັນຍາ 2024 ຕອນເຊົ້າມີການໂລະລາດ ຫຼື ລົງຕະຫຼາດນັດແບບມວນຊົນ ຕາມເສັ້ນທາງສີສະຫວ່າງວົງ ເລີ້ມແຕ່ສາມແຍກບ້ານຈູມຄ້ອງ (ຫໍພະບາງ) ຫາ ສາມແຍກພະແນກ ໂຍທາທິການ ແລະ ຂົນສົ່ງແຂວງ ຫຼວງພະບາງ, ວັນທີ 2 ກັນຍາ ຕອນເຊົ້າ ການນໍາພັກ-ລັດ ຮ່ວມໃສ່ບາດຢູ່ໜ້າວັດແສນສຸຂາຣາມ, ສ່ວນປະຊາຊົນບັນດາເຜົ່າ ໃສ່ບາດເພື່ອຄວາມເປັນສິລິມຸງຄຸນ ຢູ່ຕາມວັດແຫ່ງຕ່າງໆຕາມອັດຖະຍາໄສ, ຈາກນັ້ນ ເຕົ້າໂຮມການນໍາພັກ-ລັດ, ແຂກຮັບເຊີນທັງພາຍໃນ ແລະ ຕ່າງປະເທດຢູ່ຜາມໄຊ ແລະປະຊາຊົນບັນດາເຜົ່າ ເຕົ້າໂຮມກັນຢູ່ສອງຝາກຝັ່ງຍື່ງຄານ ເພື່ອຊົມການຊ່ວງເຮືອປະເພນີ ຕະຫຼອດວັນ.
ທ່ານຍັງໄດ້ຮຽກຮ້ອງໃຫ້ປະຊາຊົນ, ພະນັກງານ, ທະຫານ, ຕຳຫຼວດ, ຜູ້ປະກອບການທຸລະກິດ, ຜູ້ຈັດການ-ຜູ້ບໍລິການດ້ານຕ່າງໆ ຈົ່ງພ້ອມ ກັນເປັນເຈົ້າພາບ-ເປັນເຈົ້າການທີ່ດີ ເຮັດວຽກງານປ້ອງກັນຊາດ-ປ້ອງກັນ ຄວາມສະຫງົບ, ເປັນເຈົ້າການທາງດ້ານການບໍລິການ, ເປັນເຈົ້າການໃນການຮັກສາຄວາມສະອາດ ແລະມີສ່ວນ ຮ່ວມໃນການປະກອບສ່ວນ ທາງດ້ານເຮື່ອແຮງ ແລະວັດຖຸປັດໄຈ ເຂົ້າໃນການຈັດ ງານບຸນຫໍ່ເຂົ້າປະດັບດິນໃນຄັ້ງນີ້ໃຫ້ປະສົບຜົນ ສຳເລັດຢ່າງຈົບງາມ, ພ້ອມນັ້ນ ທ່ານໄດ້ເຊີນຊວນປະຊາຊົນບັນດາເຜົ່າ, ນັກທ່ອງທ່ຽວ ທັງພາຍໃນ ແລະຕ່າງປະເທດ ເຂົ້າ ມາທ່ຽວຊົມຫຼວງພະບາງ ເມືອງມໍລະດົກໂລກ ຮັບຮອງວ່າທ່ານຈະໄດ້ຮັບຄວາມປະທັບໃຈ ທີ່ໄດ້ສຳພັດກັບວັດທະນະທຳ-ຮີດຄອງປະເພນີອັນດີງາມຂອງຊາວຫຼວງພະບາງທີ່ສືບທອດກັນມາແຕ່ບູຮານນະການ.
ຂ່າວ: ອາພຸເດດ ບຸບຜາ
