ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບົດຄວາມເຫັນເນື່ອງໃນ ໂອກາດລະນຶກ ວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ 4 ເມສາ 2020 ຂອງທ່ານ ປອ ຄໍາແພງ ໄຊສົມແພງ ລັດຖະມົນຕີກະຊວງ ຮສສ, ປະທານ ຄຊກລ:

ເນື່ອງໃນໂອກາດລະນຶກວັນສາກົນໂຄສະນາເພື່ອຕ້ານລະເບີດບໍ່ທັນແຕກ 4 ເມສາ 2020, ທ່ານ ປອ ຄໍາແພງ ໄຊສົມແພງ ລັດຖະມົນຕີກະຊວງ ຮສສ, ປະທານ ຄຊກລ ໄດ້ມີຄວາມເຫັນວ່າ: ໃນນາມ ປະທານຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ຂໍແຈ້ງໃຫ້ ປະຊາຊົນ, ພະນັກງານ ແລະ ບັນດາອົງການຈັດຕັ້ງສາກົນ ຊາບວ່າ ວັນທີ 4 ເມສາ ຂອງແຕ່ລະປີ ແມ່ນ ວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ ເຊິ່ງ ປີນີ້ ປີ 2020 ແມ່ນຄົບຮອບ 15 ປີ. ໃນແຕ່ລະປີ, ພວກເຮົາຈະຈັດພີທີຊຸມນຸມເພື່ອລະນຶກເຖິງວັນສາກົນດັ່ງກ່າວນີ້, ແຕ່ໃນປີນີ້ ໄດ້ຮັບຜົນກະທົບຈາກການແຜ່ລະບາດຂອງພະຍາດຈຸລາໂລກສາຍພັນໃໝ່ (ໂຄວິດ-19). ສະນັ້ນ, ຂ້າພະເຈົ້າ ຈຶ່ງຂໍຖະແຫຼງຂ່າວຜ່ານ ສື່ມວນຊົນລາວ ດັ່ງນີ້:

ສປປ ລາວ ເປັນປະເທດທີ່ໄດ້ຮັບຜົນກະທົບຈາກລະເບີດບໍ່ທັນແຕກ (ລບຕ) ໜັກໜ່ວງກ່ວາໝູ່ໃນໂລກ, ທຽບໃສ່ຫົວຄົນ. ຕະຫຼອດ 9 ປີຜ່ານມາ (1964-1973) ຂອງການ ຖີ້ມລະເບີດ, ທຸກໆ 8 ນາທີໃດ ຈະມີຍົນຫລາຍກ່ວາ 580.000 ຖ້ຽວ ບັນທຸກລະເບີດ ມາຖີ້ມລົງໃສ່ຜືນແຜ່ນດິນລາວ ເຊິ່ງມີປະມານ 3 ລ້ານໂຕນ, ໃນນັ້ນ ມີລະເບີດລູກຫ່ວານ (ລະເບີດ ບົມບີ) ປະມານ 270 ລ້ານໜ່ວຍ ແລະ ບົມໃຫ່ຍປະມານ 4 ລ້ານໜ່ວຍ. ນັກວິຊາການດ້ານລະເບີດ ຄາດຄະເນວ່າ 30 ສ່ວນຮ້ອຍຂອງລະເບີດດັ່ງກ່າວແມ່ນບໍ່ທັນແຕກ, ໝາຍຄວາມວ່າ ພາຍຫຼັງສົງຄາມສິ້ນສຸດ ຍັງມີລະເບີດລູກຫວ່ານປະມານ 80 ລ້ານໜ່ວຍ ແລະ ບົມໃຫ່ຍອີກຫຼາຍລ້ານໜ່ວຍ ຍັງບໍ່ທັນແຕກຕົກຄ້າງຢູ່ປະເທດເຮົາ ເຮັດໃຫ້ປະຊາຊົນລາວບັນດາເຜົ່າ ທີ່ດໍາລົງຊີວິດ ແລະ ທໍາມາຫາກິນ ຕ້ອງໄດ້ເສຍຊີວິດ ແລະ ຖືກບາດເຈັບເປັນຈຳນວນຫລວງຫລາຍ; ແຕ່ປີ 2009 ເຖິງ ປະຈຸບັນ ກໍ່ມີຜູ້ໄດ້ຮັບບາດເຈັບ ແລະ ເສຍຊີວິດ ຈາກ ລບຕ ແລ້ວ ປະມານ 50 ຄົນຕໍ່ປີ.

ການຈັດຕັ້ງປະຕິບັດວຽກງານແກ້ໄຂບັນຫາ ລບຕ ໄດ້ເລີ່ມຈັດຕັ້ງປະຕິບັດໃນຊຸມປີ 1990 ແລະ ຈົນເຖິງປະຈຸບັນ, ພວກເຮົາໄດ້ໂຄສະນາທີ່ມາ ແລະ ຜົນຮ້າຍຂອງ ລບຕ; ໄດ້ຊ່ວຍເຫຼືອປິ່ນປົວການແພດ, ຟື້ນຟູສຸຂະພາບ ແລະ ປະກອບອາຊີບ ໃຫ້ຜູ້ລອດຊີວິດຈາກ ລບຕ; ໄດ້ກວດກູ້ ລບຕ ອອກຈາກພື້ນທີ່ທີ່ປະຊາຊົນຕ້ອງການທໍາການຜະລິດກະສິກໍາ ແລະ ໂຄງການພັດທະນາ.

ສໍາລັບ ປີ 2019, ພວກເຮົາໄດ້ປະຕິບັດການໂຄສະນາທີ່ມາ ແລະ ຜົນຮ້າຍ ຈາກ ລບຕ ຢູ່ 572 ເທື່ອບ້ານ, ເຮັດໃຫ້ຈໍານວນມີຜູ້ບາດເຈັບ ແລະ ເສຍຊີວິດຈາກ ລບຕ ຫຼຸດລົງເປັນ 25 ຄົນ; ຊ່ວຍເຫຼືອຜູ້ຖືກເຄາະຮ້າຍຈາກ ລບຕ ໄດ້ທັງໝົດ 216 ຄົນ; ສໍາຫຼວດບໍ່ແມ່ນວິຊາການ ເພື່ອຊອກຫາຈຸດຫຼັກຖານ ລບຕ ໄດ້ 608 ບ້ານ; ສໍາຫຼວດວິຊາການ ກໍານົດພື້ນທີ່ ລບຕ ໄດ້ 19.862 ເຮັກຕາ; ກວດກູ້ ລບຕ ອອກຈາກພື້ນທີ່ໄດ້ທັງໝົດ 5.658 ເຮັກຕາ ແລະ ທໍາລາຍ ລບຕ ໄດ້ທັງໝົດ 128.145 ໜ່ວຍ.

ທັງໝົດນີ້ ແມ່ນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງຊາດ ກໍ່ຄືເປົ້າໝາຍການພັດທະນາແບບຍືນຍົງຂອງສະຫະປະຊາຊາດ, ໂດຍສະເພາະ ແມ່ນເປົ້າໝາຍການພັດທະນາແບບຍືນຍົງອັນດັບທີ 18.

ດັ່ງນັ້ນ, ໃນນາມຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ຈຶ່ງຂໍສະແດງຄວາມຮູ້ບຸນຄຸນເປັນຢ່າງສູງ ມາຍັງ ການຈັດຕັ້ງທຸກຂັ້ນ, ບັນດາປະເທດຜູ້ໃຫ້ທຶນ ແລະ ອົງການຈັດຕັ້ງສາກົນ ຕະຫຼອດຮອດບັນດາອົງການປະຕິບັດງານແກ້ໄຂບັນຫາ ລບຕ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອຕະຫຼອດມາ; ສະແດງຄວາມຂອບໃຈ ຕໍ່ອົງການ ສປຊ ທີ່ເປັນເພື່ອຮ່ວມງານທີ່ໃກ້ຊິດ ພ້ອມທັງເປັນໃຈກາງໃນການລະດົມທຶນເຂົ້າໃນການແກ້ໄຂບັນຫາ ລບຕ ຢູ່ ສປປ ລາວ.

ສຸດທ້າຍນີ້, ເນື່ອງໃນໂອກາດປີໃໝ່ລາວ ພສ 2563, ທີ່ຈະໝູນວຽນມາເຖິງ ໃນອີກບໍ່ເທົ່າໃດວັນຂ້າງໜ້ານີ້, ຂ້າພະ ເຈົ້າຂໍອວຍພອນໄຊອັນປະເສີດມາຍັງບັນດາທ່ານຜູ້ນໍາພັກ-ລັດ, ພະນັກງານ-ລັດຖະກອນ ແລະ ຊາວຜູ້ອອກແຮງງານລາວທັງຫຼາຍ ຈົ່ງມີສຸຂະພາບເຂັ້ມແຂງ, ປະສົບຜົນສໍາເລັດໃນໜ້າທີ່ການງານ ແລະ ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ.