ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບົດຄຳເຫັນຂອງສະຫາຍ ຫງວຽນ ບ໋າ ຮຸ່ງ, ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ ເນື່ອງໃນໂອກາດສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 75 ປີ (ວັນທີ 02 ກັນຍາ 1945 – ວັນທີ 02 ກັນຍາ 2020)

ລະດູຮ່ວງໂຮຍປີ 1945 ແມ່ນຊຸມມື້ທີ່ມີຈິດໃຈສະຫງ່າຜ່າເຜີຍທີ່ສຸດໃນປະຫວັດສາດຂອງຊາດຫວຽດນາມຂ້າພະເຈົ້າ ນັ້ນຄື: ໃນວັນທີ 19 ສິງຫາ, ປະຊາຊົນໃນທົ່ວປະເທດຫວຽດນາມ ໄດ້ລຸກຮື້ຂຶ້ນຍາດອຳນາດຢ່າງສຳເລັດຜົນ. ໃນຕອນເຊົ້າຂອງວັນທີ 2 ກັນຍາ, ຢູ່ສະໜາມຫຼວງ ບາດິ່ງ ປະຫວັດສາດ, ປະທານໂຮ່ຈິມິນໄດ້ອ່ານບົດປະກາດເອກະລາດ, ສະຖາປະນາປະເທດ ສາທາລະນະລັດ ປະຊາທິປະໄຕຫວຽດນາມ ຊຶ່ງໄດ້ເຮັດໃຫ້ຫວຽດນາມ ຈາກດິນແດນຫົວເມືອງຂຶ້ນແຫ່ງໜຶ່ງ ທີ່ບໍ່ມີຊື່ ໄດ້ກາຍເປັນປະເທດໜຶ່ງທີ່ມີລະບົບການເມືອງເອກະລາດ, ມີອະທິປະໄຕ ແລະມີສິດຕັດສິນດ້ວຍຕົນເອງກ່ຽວກັບເສັ້ນທາງພັດທະນາຂອງຕົນ.
ໃນຕະຫຼອດ 75 ປີແຫ່ງການສະຖາປະນາປະເທດ, 45 ປີແຫ່ງການໂຮມປະເທດຊາດເປັນເອກະພາບ ແລະ ເກືອບ 35 ປີ ດຳເນີນການປ່ຽນແປງໃໝ່, ປະຊາຊົນຫວຽດນາມພາຍໃຕ້ການນຳພາຂອງພັກກອມມູນິດຫວຽດນາມໄດ້ສູ້ຊົນຢ່າງບໍ່ຮູ້ອິດຮູ້ເມື່ອຍ ແລະສາມາດຍາດມາໄດ້ຫຼາຍຜົນງານທີ່ໃຫຍ່ຫຼວງ. ດ້ວຍການສ້າງຕັ້ງລັດສາທາລະນະລັດ ປະຊາທິປະໄຕ ຫວຽດນາມ ຊຶ່ງແມ່ນລະບອບການເມືອງປະຊາທິປະໄຕ ປະຊາຊົນແຫ່ງທຳອິດຢູ່ອາຊີຕາເວັນອອກສຽງໃຕ້. ຫວຽດນາມໄດ້ເປັນຄັນທຸງຕະລຸມບອນ ແລະເປັນກຳລັງປຸກລະດົມຂະບວນການປົດປ່ອຍຊາດຢູ່ໃນໄລກໃນໄລຍະກາງສະຕະວັດທີ່ 20 ດ້ວຍໄຊຊະນະ ດ້ຽນບຽນຝູ ໃນປີ 1954 ທີ່ “ກ້ອງກັງວານໄປທົ່ວ 5 ທະວີບ, ສັ່ນສະເທືອນໄປທົ່ວໂລກ” ແລະໄຊຊະນະ ດ້ຽນບຽນຝູ ເທິງອາກາດໃນປີ 1972; ສຳເລັດການຕໍ່ສູ້ອັນຍືດເຍື້ອຍາວນານ ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບຢ່າງສິ້ນເຊິງ.
ດ້ວຍການຫັນປ່ຽນຈາກພື້ນຖານເສດຖະກິດແຜນການລວມສູນມາເປັນເສດຖະກິດການຕະຫຼາດກຳນົດທິດສັງຄົມນິຍົມປະສົບຜົນສຳເລັດ, ຈາກໜຶ່ງໃນບັນດາປະເທດທຸກຍາກທີ່ສຸດຢູ່ໃນໂລກ ຫວຽດນາມໄດ້ກາຍເປັນປະເທດກຳລັງພັດທະນາທີ່ມີລາຍຮັບປານກາງ, ໄດ້ຮັບການຕີລາຄາຈາກຫຼາຍປະເທດ ແລະອົງການຈັດຕັ້ງສາກົນວ່າແມ່ນໜຶ່ງໃນບັນດາພື້ນຖານເສດຖະກິດທີ່ມີຄວາມຂະຫຍັນຂັນເຄື່ອນທີ່ສຸດຢູ່ໃນພາກພື້ນອາຊີຕາເວັນອອກ-ປາຊີຟິກ. ການເມືອງ, ຄວາມໝັ້ນຄົງ, ຄວາມເປັນລະບຽບຮຽບຮ້ອງທາງສັງຄົມໄດ້ຮັບການຮັກສາໄວ້ໄດ້ຢ່າງໜັກແໜ້ນ; ກຳລັງບົ່ມຊ້ອນດ້ານປ້ອງກັນປະເທດໄດ້ຮັບການເພີ່ມທະວີ ນັບມື້ໜັກແໜ້ນ; ກຸ່ມກ້ອນມະຫາສາມັກຄີທົ່ວປວງຊົນໄດ້ຮັບການປັບປຸງ; ບັນດານະໂຍບາຍຊ່ວຍເຫຼືອສັງຄົມ, ວັດທະ ນະທຳ, ສາທາລະນະສຸກ, ການສຶກສາ ນັບມື້ໄດ້ເປັນສົມບູນແບບ ໂດຍໄດ້ຖືປະຊາຊົນເປັນໃຈກາງ; ອັດຕາຄົນທຸກຍາກອຶດຫິວໄດ້ຫຼຸດລົງ ໃນຂະນະທີ່ບັນດາດັດຊະນີພັດທະນາມະນຸດໄດ້ເພີ່ມຂຶ້ນຢ່າງບໍ່ຢຸດຢັ້ງ; ພື້ນຖານວັດຖຸເຕັກນິກ, ໂຄງລ່າງເສດຖະກິດສັງຄົມນັບມື້ນັບຂະຫຍາຍຕົວ ຊຶ່ງໄດ້ສ້າງສະພາບແວດລ້ອມອັນສະດວກເພື່ອດຶງດູດແຫຼ່ງກຳລັງແຮງຂອງສັງຄົມ ແລະການລົງທຶນຈາກຕ່າງປະເທດ.
ໃນໄລະ 30 ປີທີ່ຜ່ານມາ, ການເຕີບໂຕຂອງ ຈິດິດພີບັນ ລຸໃນລະດັບສູງຢູ່ໃນພາກພື້ນ ແລະໃນໂລກ (ແຕ່ 6-8%/ປີ); ອັດຕາຄອບຄົວທຸກຍາກໄດ້ຫຼຸດຈາກ 93% ປີ 1993 ລົງຕ່ຳກວ່າ 3% ໃນປີ 2020; ເປັນສອງປີລຽນຕິດ 2018-2019 ຫວຽດນາມສາມາດປະຕິບັດສຳເລັດ 12/12 ຄາດໝາຍດ້ານເສດຖະກິດ-ສັງຄົມ ທີ່ສະພາແຫ່ງຊາດໄດ້ວາງອອກ; ດັດຊະນີທຶນຮອນມະນຸດ (HCI) ຢູ່ໃນລະດັບສູງທີ່ສຸດໃນຈຳນວນປະເທດທີ່ມີລາຍຮັບປານກາງ, ໃນປີ 2019 ຖືກຈັດອັນດັບທີ່ 8 ໃນຈຳນວນບັນດາພື້ນຖານເສດຖະກິດທີ່ດີທີ່ສຸດໃນໂລກເພື່ອການລົງທຶນ; ຄວາມສາມາດແກ້ງແຍ້ງທົ່ວໂລກ ໃນປີ 2019 ໄດ້ເພີ່ມຂຶ້ນ 10 ອັນດັບເມື່ອທຽບກັບປີ 2015, ຈັດອັນດັບ 75/190 ປະເທດ ແລະເຂດແຄວ້ນ.
ວຽກງານກໍ່ສ້າງ, ປັບປຸງພັກ ແລະລະບົບການເມືອງໄດ້ຮັບການຊຸກຍູ້ຢ່າງແຂງແຮງ; ວຽກງານປ້ອງກັນ ແລະຕ້ານສໍ້ຫຼາດບັງຫຼວງ, ການຟຸມເຟືອຍ, ປະກົດການຫຍໍ້ທໍ້ໄດ້ຮັບການຈັດຕັ້ງປະຕິບັດຢ່າງເດັດດຽວ ບໍ່ມີເຂດຫ້າມ, ບໍ່ມີກໍລະນີຍົກເວັ້ນ, ຊຶ່ງໄດ້ປະກອບສ່ວນປັບປຸງຄວາມໄວ້ເນື້ອເຊື່ອໃຈຈາກພະນັກງານ, ສະມາຊິກພັກ ແລະປະຊາຊົນຕໍ່ການນຳພາຂອງພັກ, ພາລະກິດອັນສົດໃສຂອງຊາດ ແລະກາຍເປັນເຫງົ້າພະລັງອັນໃຫຍ່ຫຼວງໃຫ້ແກ່ການພັດທະນາເສດຖະກິດ-ສັງຄົມຢູ່ຫວຽດນາມໃນໄລຍະຜ່ານມາຢ່າງແທ້ຈິງ.
ດ້ວຍຈິດໃຈ “ຫວຽດນາມຢາກເປັນເພື່ອນມິດກັບບັນດາປະເທດທັງໝົດຢູ່ໃນວົງຄະນາຍາດສາກົນ, ສູ້ຊົນເພື່ອສັນຕິພາບ, ຄວາມເປັນເອກະລາດ ແລະການພັດທະນາ” , ຫວຽດນາມໄດ້ເສີມສ້າງຢ່າງສຳເລັດຜົນການພົວພັນຮ່ວມ ມືທີ່ມີປະສິດທິຜົນກັບບັນດາປະເທດທີ່ເປັນສັດຕູເກົ່າໃນກາງສົງຄາມ; ມີການພົວພັນກັບ 500 ກວ່າອົງການຈັດຕັ້ງສາກົນ, ພົວພັນການທູດກັບ 187 ປະເທດ, ມີການພົວພັນເປັນຄູ່ຮ່ວມມືຍຸດທະສາດ ແລະຮ່ວມມືຮອບດ້ານກັບ 30 ປະເທດ ຊຶ່ງໃນນັ້ນ ມີ 05 ປະເທດທີ່ເປັນກຳມະການປະຈຳສະພາຄວາມໝັ້ນຄົງສະຫະປະຊາຊາດ, ບັນດາປະເທດ G7 ທັງໝົດ ແລະ 17/20 ປະເທດຂອງກຸ່ມ G20; ມີການພົວພັນດ້ານເສດຖະກິດກັບ 224 ຄູ່ຮ່ວມມື, ເປັນສະມາຊິກໃນ ສັນຍາການຄ້າເສລີ 16 ສະບັບ; ໄດ້ຕັ້ງໜ້າເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ ໂດຍໄດ້ສົ່ງ 02 ກອງຮັກສາສັນຕິພາບໄປປະຈຳການຢູ່ສາທາລະນະລັດອາຟລິກາກາງ ແລະ Sudan ໃຕ້; ເປັນເຈົ້າການປະກອບສ່ວນເຂົ້າໃນການສ້າງ, ກຳນົດຮູບການບັນດາລະບອບລະບຽບການ, ກົດກະຕິກຳ, ມາດຕະຖານແບບຫຼາຍຝ່າຍ, ສວມບົດບາດທີ່ຕັ້ງໜ້າກວ່າໃນບັນດາກົນໄກບໍລິຫານທົ່ວໂລກ. ພິເສດ, ປີນີ້ເປັນປີທຳອິດທີ່ຫວຽດນາມໄດ້ຮັບ “ຕຳແໜ່ງຄວບ” ຄື ທັງເປັນປະທານອາຊຽນ 2020 ແລະທັງເປັນກຳມະການບໍ່ຖາວອນສະພາຄວາມໝັ້ນຄົງສະຫະປະຊາຊາດ ອາຍຸການ 2020-2021. ຫວຽດນາມໄດ້ເປັນເຈົ້າການສະເໜີ ແລະຈັດຕັ້ງຜັນຂະຫຍາຍຂໍ້ລິເລີ່ມຫຼາຍຂໍ້ເພື່ອຜ່ານຜ່າຄວາມຫຍຸ້ງຍາກຈາກພະຍາດໂຄວິດ-19, ສືບຕໍ່ປະຕິບັດຢ່າງມີປະສິດທິຜົນສອງໜ້າທີ່ສຳຄັນດັ່ງກ່າວ, ອັນໄດ້ຮັບການຕີລາຄາສູງຈາກເພື່ອນມິດສາກົນ, ພິເສດ ເປັນຄັ້ງທຳອິດໃນປະຫວັດສາດຂອງອາຊຽນ ຫວຽດນາມ ໄດ້ຈັດຕັ້ງສຳເລັດກອງປະຊຸມຂັ້ນສຸດຍອດ ອາຊຽນ-36 ແບບທາງໄກ.
ໃນປີນີ້, ຫວຽດນາມກໍໄດ້ສະເຫຼີມສະຫຼອງວັນສ້າງຕັ້ງຂະແໜງການທູດຄົບຮອບ 75 ປີ ໂດຍມີປະທານໂຮ່ຈິມິນ ເປັນລັດຖະມົນຕີຄົນທຳອິດ ນຳພາໂດຍກົງ. ໃນຕະຫຼອດໄລຍະ 75 ປີທີ່ຜ່ານມາ, ຂະແໜງການທູດຫວຽດນາມໄດ້ປະກອບສ່ວນສຳຄັນເຂົ້າໃນພາລະກິດຕໍ່ສູ້ເພື່ອຄວາມເປັນເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ ກໍຄືພາລະກິດປ່ຽນແປງໃໝ່, ເຊື່ອມໂຍງ ແລະປົກປັກຮັກສາປະເທດຊາດ, ປະກອບສ່ວນເຮັດໃຫ້ຖານະບົດບາດຂອງຫວຽດນາມພົ້ນເດັ່ນຂຶ້ນບົນເວທີສາກົນ.
ກ້າວເຂົ້າສູ່ປີ 2020, ທົ່ວໂລກ ໃນນັ້ນມີຫວຽດນາມພວມປະເຊີນໜ້າກັບສິ່ງທ້າທາຍທີ່ສັບສົນຫຼາຍປະການ, ໃນນັ້ນມີສິ່ງທ້າທາຍໃໝ່ທີ່ບໍ່ເຄີຍມີມາກ່ອນຄືພະຍາດໂຄວິດ-19 ໄດ້ແຜ່ລະບາດໄປທົ່ວໂລກ ອັນໄດ້ກໍ່ຜົນກະທົບທີ່ອັນຕະລາຍທີ່ສຸດຕໍ່ສຸຂະພາບຂອງມະນຸດ ແລະເສດຖະ ກິດ-ສັງຄົມ, ໄດ້ເຮັດໃຫ້ປ່ຽນວິຖີດຳລົງຊີວິດຂອງມະນຸດ. ມາຮອດປັດຈຸບັນນີ້, ຄົນເຮົາກຳລັງເວົ້າເຖິງ “ໂລກຫຼັງໂຄວິດ-19” ໂດຍມີຫຼາຍສິ່ງຫຼາຍຢ່າງທີ່ແຕກຕ່າງກັບໂລກຂອງພວກເຮົາກ່ອນໜ້ານີ້ 9-10 ເດືອນ. ພະຍາດໂຄວິດ-19 ໄດ້ກະທົບຢ່າງເລິກເຊິ່ງ ແລະຮອບດ້ານເຖິງແຕ່ລະປະເທດກໍຄືການພົວພັນລະຫວ່າງປະເທດ.
ຫວຽດນາມມີຄວາມປິຕິຊົມຊື່ນເປັນຢ່າງຍິ່ງທີ່ໄດ້ເຫັນວ່າ ສປປ ລາວ ໄດ້ປະສົບຜົນສຳເລັດໃນການຄວບຄຸມພະຍາດ ໂຄວິດ-19, ນັບແຕ່ກາງເດືອນເມສາເປັນຕົ້ນມາບໍ່ໄດ້ພົບເຫັນກໍລະນີຕິດພະຍາດໃໝ່ຢູ່ໃນຊຸມຊົນ. ຫວຽດນາມກຳລັງຮັບມືກັບການລະບາດພະຍາດໂຄວິດ-19 ຮອບໃໝ່ ນັບແຕ່ທ້າຍເດືອນກໍລະກົດເປັນຕົ້ນມາ. ດ້ວຍຄວາມຕັດສິນໃຈຂອງທົ່ວປວງຊົນທັງຊາດ ແລະທົ່ວລະບົບການເມືອງ, ຫວຽດນາມຍັງຄົງບືນຕົວຂຶ້ນຢ່າງໜັກແໜ້ນ, ສູ້ຊົນປະຕິບັດສອງໜ້າທີ່ຄື: ທັງປ້ອງກັນ-ຕ້ານພະຍາດ, ຖືການຮັກສາສຸຂະພາບຂອງປະຊາຊົນເປັນບູລີມະສິດອັນດັບໜຶ່ງ, ທັງສືບຕໍ່ພັດທະນາເສດຖະກິດ ແລະບັນລຸໄດ້ບັນດາຜົນງານທີ່ເປັນໜ້າຊື່ນຊົມ. ພາຍຫຼັງໄລຍະໜຶ່ງກວ່າເດືອນ, ຫວຽດນາມສມາດຄວບຄຸມການລະບາດຂອງພະຍາດໂຄວິດ-19 ໄດ້ໂດຍພື້ນຖານ. ໃນ 6 ເດືອນ ຕົ້ນປີ 2020, GDP ຄົງເຕີບໂຕບວກ ຄືບັນລຸໄດ້ 1,81%; ຕາມບົດລາຍງານຫວ່າງແລ້ວນີ້ຂອງທະນາຄານໂລກ, ການເຕີບໂຕເສດຖະກິດຂອງຫວຽດນາມໃນປີ 2020 ຈະສູງອັນດັບ 5 ຂອງໂລກ, ອາດບັນລຸລະດັບ 2,8% ໃນປີ 2020 ແລະ 6,8% ໃນປີ 2021 ຖ້າເງື່ອນໄຂສະດວກ. ທະນາຄານໂລກຫາກໍຈັດຫວຽດນາມແມ່ນ 1 ໃນ 6 ພື້ນຖານເສດຖະກິດພົ້ນເດັ່ນໃໝ່ທີ່ປະສົບຜົນສຳເລັດທີ່ສຸດຢູ່ໃນໂລກ. ໃນ 7 ເດືອນຕົ້ນປີ, ການລົງທຶນໂດຍກົງຈາກຕ່າງປະເທດບັນລຸໄດ້ມູນຄ່າ 3,15 ຕື້ USD, ເພີ່ມຂຶ້ນ 79,8% ທຽບກັບໄລຍະດຽວກັນຂອງປີກາຍ; ການສົ່ງອອກເກີນດູນ 7,5 ຕື້ USD. ຕົວເລກເຫຼົ່ານີ້ສະແດງໃຫ້ເຫັນວ່າ ເສດຖະກິດຫວຽດນາມໃນໄລຍະປານກາງ ແລະໄລຍະຍາວຍັງມີແງ່ຫວັງທີີ່ດີ.
ມື້ນີ້, ໄດ້ຮ່ວມກັບບັນດສະຫາຍ ແລະເພື່ອນມິດລາວຫວນຄືນປະຫວັດສາດອັນສະຫງ່າລາສີຂອງຊາດໃນໄລຍະ 75 ປີທີ່ມ່ານ, ພວກຂ້າພະເຈົ້າຮູ້ສຶກພາກພູມໃຈ ແລະຕື້ນຕັນໃຈຫຼາຍ. ໃນພິທີສະເຫຼີມສະຫຼອງວັນສ້າງຕັ້ງພັກກອມມູນິດຫວຽດນາມຄົບຮອບ 90 ປີໃນວັນທີ 03/2/2020, ສະຫາຍເລຂາທິການໃຫຍ່, ປະທານປະເທດຫວຽດນາມ ຫງວຽນ ຝູ ຈ້ອງ ໄດ້ກ່າວວ່າ: “ດ້ວຍຜົນງານຕ່າງໆອັນໃຫຍ່ ຫຼວງທີ່ຍາດມາໄດ້, ພວກເຮົາມີພື້ນຖານເພື່ອສາມາດຢືນຢັນໄດ້ວ່າ ບໍ່ທັນມີຍາມໃດທີ່ປະເທດເຮົາມີພາລະກິດອັນໜັກແໜ້ນ, ມີກຳລັງບົ່ມຊ້ອນ, ມີຖານະບົດບາດ ແລະອິດ ທິພົນຊື່ສຽງຄືໃນທຸກວັນນີ້”.
ເຫັນໄດ້ພາລະກິດອັນໜັກແໜ້ນຄືດັ່ງກ່າວນັ້ນ, ຫວຽດນາມຈະຈົດຈຳເອົາການສະໜັບສະໜູນ, ການຊ່ວຍເຫຼືອຂອງຫຼາຍປະເທດ ກໍຄືວົງຄະນາຍາດສາກົນທີ່ມີຕໍ່ພາລະ ກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ, ສ້າງສາປະເທດຊາດທີ່ແສນຮັກຂອງພວກຂ້າພະເຈົ້າ.
ກ້າວໄປເຖິງອະນາຄົດ, ຫວຽດນາມໄດ້ວາງຄາດໝາຍ, ວິໄສທັດຮອດປີ 2030 (ສະເຫຼີມສະຫຼອງວັນສ້າງຕັ້ງພັກກອມມູນິດຫວຽດນາມຄົບຮອບ 100 ປີ) ແລະ ປີ 2045 (ສະເຫຼີມສະຫຼອງວັນສະຖາປະນາປະເທດຄົບຮອບ 100 ປີ). ໃນໄລຍະທີ່ຈະມາເຖິງ, ຫວຽດນາມຈະເພີ່ມທະວີດ້ານການປ້ອງກັນຊາດ, ປ້ອງກັນຄວາມສະຫງົບກວ່າເກົ່າ, ເດັດດຽວປົກປັກຮັກສາຄວາມເປັນເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ປົກປັກຮັກສາດ້ານການເມືອງ-ສັງຄົມ, ສະພາບແວດລ້ອມແຫ່ງສັນຕິພາບໄວ້ໄດ້ຢ່າງໝັ້ນຄົງເພື່ອການພັດທະນາ, ສ້າງເງື່ອນໄຂອຳນວຍຄວາມສະດວກກວ່າອີກໃຫ້ແກ່ວິສາຫະກິດ, ບັນດານັກລົງທຶນທັງພາຍໃນ ແລະຕ່າງປະເທດ. ຫວຽດນາມກໍຈະສືບຕໍ່ເສີມຂະຫຍາຍບົດບາດທີ່ຕັ້ງໜ້າຢູ່ໃນອາຊຽນ, ເປັນເຈົ້າການເຊື່ອມໂຍງຢ່າງກວ້າງຂວາງ ແລະເລິກເຊິ່ງເຂົ້າກັບສາກົນ, ຕັ້ງໜ້າຊຸກຍູ້ລັດທິຫຼາຍຝ່າຍ, ຍົກສູງກົດບັດສະຫະ ແລະກົດໝາຍສາກົນ, ປະກອບສ່ວນເຂົ້າໃນການອະນຸລັກຮັກສາບັນດາຄຸນຄ່າທີ່ມວນມະນຸດໄດ້ເຊີດຊູ ນັ້ນຄື: ສັນຕິພາບ, ສະເໝີພາບ, ການພັດທະນາ ແລະການເຄົາລົບກົດໝາຍ.
ໃນຕະຫຼອດໄລຍະປະຫວັດສາດກໍຄືໃນອະນາຄົດ, ຍາມໃດຫວຽດນາມກໍຖືເປັນສຳຄັນ ແລະໃຫ້ບູລີມະສິດແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານກັບປະຊາຊົນ ແລະປະເທດລາວອ້າຍນ້ອງ.
ຊາຕະກຳຂອງສອງປະເທດ, ສອງຊາດພວກເຮົາຍາມໃດກໍມີຄວາມຕິດພັນກັນຢ່າງສະໜິດແໜ້ນ. ກົງກັບໄລຍະນີ້ກ່ອນໜ້ານີ້ 75 ປີ, ໄປຄຽງຄູ່ກັບການປະຕິວັດເດືອນສິງຫາຢູ່ຫວຽດນາມ, ຢູ່ລາວປະຊາຊົນໄດ້ລຸກຮືຂຶ້ນຍາດອຳນາດຢ່າງມີໄຊຢູ່ທ້ອງຖິ່ນຈຳນວນໜຶ່ງຄື: ວຽງຈັນ, ທ່າແຂກ ແລະສະຫວັນນະເຂດ. ພາຍຫຼັງໄດ້ກ່າວບົດປະກາດເອກະລາດພຽງ 2 ວັນ, ໃນວັນທີ 04/9/1945, ປະທານໂຮ່ຈິມິນໄດ້ຕ້ອນຮັບສະເດັດເຈົ້າສຸພານຸວົງ ຊຶ່ງເປັນແຂກສາກົນສຳຄັນຄົນທຳອິດຂອງລັດຖະບານສາທາລະນະລັດ ປະຊາທິປະໄຕຫວຽດນາມ, ຕໍ່ຈາກນັ້ນໄດ້ກໍ່ຕັ້ງສາຍພົວພັນມິດສະຫາຍທີ່ນັບມື້ສະໜິດຕິດພັນອັນດູດດື່ມລະຫວ່າງຜູ້ນຳຂອງການປະຕິວັດສອງປະເທດ. ແລະກໍໃນໄລຍະນີ້ກ່ອນໜ້ານີ້ 45 ປີ, ພາຍຫຼັງຫວຽດນາມທ້ອນໂຮມປະເທດ ຊາດເປັນເອກະພາບບໍ່ທັນໄດ້ຮອດ 4 ເດືອນ, ໃນວັນທີ 23/8/1975, ປະຊາຊົນນະຄອນຫຼວງວຽງຈັນນັບໝື່ນຄົນໄດ້ຈັດໂຮມຊຸມນຸມຢູ່ເດີນທາດຫຼວງເພື່ອຄຳນັບຊົມເຊີຍການກຳເນີດເກີດຂຶ້ນຂອງອຳນາດການປົກຄອງນະຄອນ ຫຼວງ; ແລະກໍໃນປີດຽວກັນ, ວັນທີ 02/12/1975 ປະເທດສາທາລະນະລັດ ປະຊາທິປະໄຕ ປະຊາຊົນລາວໄດ້ຮັບການສະຖາປະນາ. ສອງຊາດຫວຽດ-ລາວອ້າຍນ້ອງໄດ້ຮ່ວມສູ້ຮົບນຳກັນ, ຜ່ານຜ່າຄວາມຫຍຸ້ງຍາກລຳບາກນາໆປະການ, ຍອມເສຍສະຫຼະ ທີ່ແກ່ຍາວເປັນເວລາ 30 ປີລຽນຕິດເພື່ອສາມາດຍາດເອົາຄວາມເປັນເອກະລາດຂອງແຕ່ລະຊາດມາໄດ້. ໃນການຢ້ຽມຢາມຫວຽດນາມປີ 2007, ສະຫາຍ ບຸນຍັງ ວໍລະຈິດ ໃນຖານະເປັນກຳມະການກົມການເມືອງ, ຜູ້ປະຈຳການຄະນະເລຂາທິການ, ຮອງປະ ທານປະເທດແຫ່ງ ສປປ ລາວ ໄດ້ສະຫຼຸບວ່າ: “ປະຫວັດ ສາດແຫ່ງສາຍພົວພັນລາວ-ຫວຽດນາມໃນສະຕະວັດທີ່ຜ່ານມາບໍ່ພຽງແຕ່ພິສູດໃຫ້ເຫັນເຖິງລັດທິວິລະຊົນປະຕິ ວັດຂອງສອງຊາດເທົ່ານັ້ນ ຫາກຍັງສະແດງໃຫ້ເຫັນເຖິງສາຍພົວພັນທີ່ບໍລິສຸດຜຸດຜ່ອງ ແລະຫາຍາກໃນການພົວ ພັນສາກົນຂອງຍຸກປັດຈຸບັນອີກ. ໃນເງື່ອນໄຂໃໝ່ນີ້, ຄວາມສາມັກຄີພິເສດ ແລະການຮ່ວມມືຮອບດ້ານລາວ-ຫວຽດນາມໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງ ແລະຈະເລີນງອກງາມຍິ່ງໆຂຶ້ນ”.
ໃນໄລຍະທີ່ຈະມາເຖິງ, ຄືດັ່ງທີ່ການນຳຂອງສອງພັກ, ສອງລັດໄດ້ຢືນຢັນຫຼາຍເທື່ອແລ້ວ ເຖິງວ່າສະພາບການໂລກ ແລະພາກພື້ນມີການຜັນແປແນວໃດກໍຕາມ, ສອງຊາດພວກເຮົາຈະຄຽງບ່າຄຽງໄຫຼ່, ແບ່ງປັນ ແລະຊ່ວຍເຫຼືອຊຶ່ງກັນ ແລະກັນໃນພາລະກິດສ້າງສາພັດທະນາ ແລະປົກປັກຮັກສາປະເທດຊາດ ເພື່ອຄວາມອີ່ມໜຳສຳລານ, ສືບຕໍ່ປົກປັກຮັກສາ, ຖະນຸຖະໜອມ, ເພີ່ມພູນຄູນສ້າງສາຍພົວພັນພິເສດຫວຽດ-ລາວເພື່ອໃຫ້ສົມເປັນຊັບສົມບັດອັນລ້ຳຄ່າຂອງທັງສອງຊາດ.
ໃນຈຸດເວລາທີ່ການແຜ່ລະບາດຂອງພະຍາດໂຄວິດ-19, ສອງປະເທດພວກເຮົາຄົງພະຍາຍາມຢ່າງສຸດຄວາມສາມາດຂອງຕົນເພື່ອຊຸກຍູ້ບັນດາແຜນການ, ໂຄງການຮ່ວມມືໃນທົ່ວທຸກຂົງເຂດ, ທຸກຂັ້ນ ແລະທ້ອງຖິ່ນ. ສອງຝ່າຍໄດ້ປະສານສົມທົບນຳກັນ ແລະມີປະສິດທິຜົນຢູ່ໃນເວທີພາກພື້ນ ແລະສາກົນເຊັ່ນ ອາຊຽນ, ສະຫະປະຊາ ຊາດ, ອະນຸພາກພື້ນແມ່ນ້ຳຂອງ…
ປະທານໄກສອນ ພົມວິຫານ ໄດ້ຕັກເຕືອນວ່າ: “ພວກເຮົາຕ້ອງຮັບຮູ້ວ່າ ສາຍພົວພັນລະຫວ່າງລາວ ແລະຫວຽນາມເຖິງວ່າປະເສີດເລີດລ້ຳກວ່າເພັດ ປະເພດທີ່ປະເສີດທີ່ສຸດ, ແຕ່ກໍຕ້ອງຖະນຸຖະໜອມ, ເພີ່ມພູນຄູນສ້າງຢ່າງເປັນປະຈຳເພື່ອໃຫ້ໃສແຈ້ງກວ່າອີກ”. ໃນສະພາບການໂລກ ແລະພາກພື້ນພວມປະເຊີນໜ້າກັບການທ້າທາຍທັງແບບເກົ່າ ແລະແບບໃໝ່, ຢູ່ສອງປະເທດຂອງພວກເຮົາກໍໄດ້ມີການປ່ຽນແປງຫຼາຍ, ສອງປະເທດພວກເຮົາຈຳເປັນຕ້ອງປັບປຸງສາຍພົວພັນມູນເຊື້ອພິເສດດັ່ງກ່າວ ເພື່ອນຳການຮ່ວມມືຮອບດ້ານຫວຽດນາມ-ລາວ ເຂົ້າສູ່ລວງເລິກ, ແທ້ຈິງ ແລະມີປະສິດທິຜົນກວ່າເກົ່າ, ກ້າວເຂົ້າສູ່ຍຸກສະ ໄໝໃໝ່ຢ່າງເຂັ້ມແຂງ, ຫັນຄວາມມຸ້ງມາດປາດຖະໜາຂອງບັນດາຜູ້ນຳອາວຸໂສເປັນຄວາມຈິງ, ປະກອບສ່ວນໃຫ້ແກ່ສັນຕິພາບ, ສະຖຽນລະພາບ, ການຮ່ວມມື ແລະການພັດທະນາແບບຍືນຍົງຢູ່ໃນພາກພື້ນ ແລະໃນໂລກ.
ເນື່ອງໃນໂອກາດສະເຫຼີມສະຫຼອງວັນສຳຄັນຍິ່ງນີ້, ຂ້າພະເຈົ້າ ຕາງໜ້າພັກ, ລັດ ແລະປະຊາຊົນຫວຽດນາມ, ອີກເທື່ອໜຶ່ງ ແລະໂດຍຕະຫຼອດ ຂໍສະແດງຄວາມຮູ້ບຸນຄຸນຈາກສ່ວນເລິກຂອງຫົວໃຈ ມາຍັງພັກ, ລັດ ແລະປະຊາຊົນລາວອ້າຍນ້ອງທີ່ຍາມໃດກໍໃຫ້ຄວາມສາມັກຄີ, ການສະໜັບສະໜູນ ແລະການຊ່ວຍເຫຼືອແກ່ຫວຽດນາມ. ສ່ວນຫວຽດນາມຂໍສະແດງຄວາມຂອບອົກຂອບໃຈ ແລະປາຖະໜາວ່າບັນດາປະເທດ, ເພື່ອນມິດສາກົນຈົ່ງສືບຕໍ່ສະໜັບສະໜູນເພື່ອໃຫ້ການພົວພັນຮ່ວມມືລະຫວ່າງຫວຽດນາມ-ລາວຂະຫຍາຍຕົວຢ່າງຍືນຍົງ, ປະກອບສ່ວນຢ່າງຕັ້ງໜ້າໃຫ້ແກ່ສັນຕິພາບ, ຄວາມໝັ້ນຄົງ, ສະຖຽນລະພາບ ແລະການພັດທະນາຢູ່ໃນອາຊີ ແລະໃນໂລກ.
ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານຫວຽດນາມ-ລາວ, ລາວ-ຫວຽດນາມ ຈົ່ງສວຍສົດງົດງາມ, ໝັ້ນຄົງຖະນົງແກ່ນໄປຊົ່ວກາລະນານ; ອວຍພອນໃຫ້ປະຊາຊົນລາວອ້າຍນ້ອງຈົ່ງໄດ້ດຳລົງຊີວິດໃນສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະວັດທະນາຖາວອນໂດຍຕະຫຼອດ.