ສະບາຍດີປີໃໝ່ ທ່ານຜູ້ຟັງທີ່ຮັກແພງ !
ປີເກົ່າ ຄສ 2021 ຫາກໍຜ່ານໄປ , ປີໃໝ່ ຄສ 2022 ຫາກໍເຂົ້າມາແທນທີ່. ປີ 2021 ເປັນປີ ທີ່ມີ ເຫດການສຳຄັນຫຼາຍອັນທີ່ພົ້ນເດັ່ນ ເລີ່ມຕົ້ນປີກໍໄດ້ດຳເນີນກອງປະຊຸມໃຫຍ່ຄັ້ງທີ 11 ຂອງພັກ ຮັບຮອງເອົາຄະນະບໍລິຫານງານສູນກາງພັກຊຸດໃໝ່ທີ່ມີ ທ່ານ ທອງລຸນ ສີສຸລິດ ເປັນເລ ຂາທິ ການໃຫຍ່, ເປັນປີເລີ່ມຕົ້ນຜັນຂະຫຍາຍມະຕິ 11 ຂອງພັກ , ມີການເລືອກ ຕັ້ງສະມາ ຊິກສະ ພາແຫ່ງຊາດຊຸດທີ 9 ແລະ ສະມາຊິກສະພາຂັ້ນແຂວງຊຸດທີ 2, ຮັບຮອງເອົາ ຄະນະລັດ ຖະບານ ຊຸດໃໝ່ທີ່ມີທ່ານ ພັນຄຳ ວິພາວັນ ເປັນນາຍົກ ລັດຖະມົນ ຕີ,ແລະເລີ່ມ ປະຕິບັດ ແຜນພັດ ທະນາ ເສດຖະກິດສັງຄົມ 5 ປີ ຄັ້ງທີ 9 ( 2021-2025) ເຂົ້າສູ່ວຽກຕົວຈິງຂອງແຕ່ລະຂະແໜງການ. ປີ 2021 ຍັງເປັນປີເລີ່ມຕົ້ນປະຕິບັດ 2 ວາລະແຫ່ງຊາດທີ່ເປັນວຽກ ງານອັນຮີບດ່ວນ ທີ່ຈະຕ້ອງໄດ້ ຮັບການແກ້ໄຂຢ່າງຈິງຈັງ ນັ້ນຄືວາລະແຫ່ງຊາດເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ ແລະ ແກ້ໄຂບັນຫາຢາເສບຕິດ.
ສ່ວນສະພາບການລະບາດຮອບ 2 ຂອງໂຄວິດ 19 ຢູ່ປະເທດເຮົາທີ່ເລີ່ມມາແຕ່ ໄລຍະປີໃໝ່ ລາວ ເດືອນເມສາຈົນມາຮອດປັດຈຸບັນກໍໜັກໜ່ວງຂຶ້ນກວ່າເກົ່າຫລາຍ ແຕ່ລະມື້ມີຜູ້ຕິດ ເຊື້ອໃໝ່ ຫລາຍ ຮ້ອຍຄົນ ບາງມື້ຂຶ້ນຮອດພັນກວ່າຄົນ ຕົວເລກລວມຜູ້ຕິດເຊື້ອນັບມາຮອດມື້ວານນີ້ມີສູງເຖິງ 111.060 ຄົນ ມີຜູ້ເສຍຊີວິດ 372 ຄົນ ໃນນີ້ກໍແມ່ນນະຄອນຫລວງວຽງຈັນມີຜູ້ຕິດເຊື້ອຫລາຍກວ່າໝູ່ ຊຶ່ງເປັນ ສິ່ງທ້າທາຍແລະສ້າງຄວາມຫຍຸ້ງຍາກໃຫ້ແກ່ການດຳລົງຊີວິດຂອງພະນັກງານທະຫານຕຳຫລວດແລະປະຊາຊົນລາວບັນດາເຜົ່າໜັກສົມຄວນ, ລັດຖະບານກໍໄດ້ໃຊ້ງົບປະມານສຸມໃສ່ຢ່າງຫລວງຫລາຍ, ຄະນະສະເພາະກິດກໍໄດ້ຖະແຫລງຂ່າວແລະແນະນຳການດຳລົງຊີວິດປົກກະຕິແບບໃຫ່ເພື່ອຢູ່ກັບມັນໄດ້ຢ່າງປອດໄພ ປະຊາຊົນລາວສ່ວນຫລາຍກໍໃຫ້ ການຮ່ວມມືເປັນຢ່າງ ດີໃຊ້ມາດຕະ ການປ້ອງ ກັນ ຕົນເອງແລະຄອບຄົວແລະມີຄວາມຮັບຜິດຊອບຕໍ່ສັງຄົມເປັນຢ່າງດີ ບວກກັບປະເພດເພື່ອນມິດ ອົງການຈັດຕັ້ງສາກົນກໍໄດ້ຊ່ອຍເຫຼືອວັກຊິນ ອຸບປະກອນການແພດ ແລະຄະນະຜູ້ຊ່ຽວຊານມາຊ່ອຍ ຈຶ່ງເຮັດໃຫ້ການຕໍ່ສູ້ຕ້ານໂຄວິດຢູ່ປະເທດເຮົາປະສົບຜົນສຳເລັດດີສົມຄວນ ແລະ ຫຼ້າສຸດຄືມື້ນີ້ເອງ ( ວັນທີ 1 ມັງກອນ 2022 ) ລັດຖະບານຈະເລີ່ມເປີດຮັບນັກ ທ່ອງທ່ຽວຕ່າງປະ ເທດໃນເຂດ ທ່ອງ ທ່ຽວສີຂຽວແບບມີເງື່ອນໄຂແລະມາດຕະການປ້ອງກັນໂຄວິດໄປຄຽງຄູ່ກັນ. ອີກເຫດການໜຶ່ງທີ່ບໍ່ກ່າວເຖິງບໍໄດ້ ເພາະແມ່ນຄວາມພາກພູມໃຈແລະ ຈະສ້າງຜົນປະ ໂຫຍດຢ່າງມະ ຫາສານໃຫ້ປະຊາຊົນລາວບັນດາເຜົ່າ ນັ້ນກໍຄືການເປີດນຳໃຊ້ລົດໄຟຄວາມໄວສູງລາວ-ຈີນໃນວັນທີ່ 3 ທັນວາ 2021 ຜ່ານມາ ເປັນລົດໄຟຄວາມໄວສູງທີ່ທັນສະໄຫມ ສະດວກສະບາຍ ປອດໄພສູງແຫ່ງ ທຳອິດໃນອາຊຽນ ຫັນປະເທດເຮົາທີ່ບໍ່ຕິດກັບທະເລເປັນປະເທດເຊື່ອມໂຍງເຊື່ອມຈອດໃນພາກພື້ນ ຈະນຳຜົນປະໂຫຍດມາໃຫ້ບໍ່ພຽງແຕ່ລາວກັບຈີນເທົ່ານັ້ນ ແລະ ຈະລວມທັງປະເທດອ້ອມຂ້າງອີກ.
ສຳລັບ ວິທະຍຸກະຈາຍສຽງແຫ່ງຊາດລາວ ຫຼື ເອີ້ນຫຍໍ້ວ່າ ວສລ ຕະຫຼອດປີ 2021 ກໍໄດ້ຕັ້ງໜ້າຮັບໃຊ້ໃຫ້ຂໍ້ມູນຂ່າວສານທີ່ວ່ອງໄວທັນເຫດການທັງພາຍໃນແລະຕ່າງປະເທດ,ໃຫ້ສາລະຄວາມຮູ້ທີ່ເປັນປະໂຫຍດ ແລະ ຄວາມບັນເທີງທີ່ຫລາກຫລາຍແກ່ທ່ານຜູ້ຟັງຢ່າງຫ້າວຫັນ, ພະນັກງານຂອງວິທະຍຸກະຈາຍສຽງແຫ່ງຊາດລາວ 100 ກວ່າຄົນທັງຝ່າຍເຕັກນິກແລະເນື້້ອໃນ ນັກຂ່າວ ນັກຈັດລາຍການຂອງ 6 ຄື້ນ ຄື AM ຄື້ນກາງແລະຄື້ນສັ້ນ, FM 103,7/ 95/ 97,3/94,3 ແລະ 96 ເມກາເຮິສໄດ້ທຸ້ມເທເຮື່ອແຮງສະຕິປັນຍາຮັບໃຊ້ທ່ານຜູ້ຟັງທົ່ວປະເທດແຕ່ເໜືອຮອດໃຕ້ແລະ
ຜູຟັງຢູ່ຕ່າງປະເທດເກືອບຕະຫຼອດ 24 ຊົ່ວໂມງ ແລະເພື່ອສືບຕໍ່ພັດທະນາການກະຈາຍສຽງໃຫ້ເຂົ້າເຖິງທ່ານຜູ້ຟັງໄດ້ຫຼາຍຊ່ອງທາງກວ່າເກົ່າ ນອກຈາກມີເວັບໄຊ www.lnr.org.la ທີ່ສາມາດອ່ານເນື້ອໃນຂ່າວ-ບົດ, ຮູບພາບນິ້ງແລະ ວີດີໂອ , ຟັງ FM 103,7 ຟັງຄືນລາຍການພາສາອັງກິດ, ຝຣັ່ງ, ຫວຽດນາມ,ພາສາຈີນ ພາສາມົ້ງ ແລະ ກຶມມຸ ໄດ້ຢ່າງຊັດເຈນໃນທົ່ວປະເທດແລະທົ່ວໂລກແລ້ວ ທ່ານຜູ້ຟັງຍັງສາມາດເຂົ້າຟັງແລະເບິ່ງລາຍການຂອງ ວສລ ທາງ ຢູທູບ ໄດ້ອີກ. 2021 ຜ່ານມາ ວສລ ກໍໄດ້ເລີ່ມນຳໃຊ້ຫ້ອງອອກອາກາດ ແລະ ເຄື່ອງສົ່ງ ເອັບເອັມ 103,7 ທີ່ທັນສະໄຫມ ທີ່ໄດ້ຮັບການ ຊ່ອຍເຫຼືອຈາກລັດຖະບານຫວຽດນາມແລ້ວ.ພວກເຮົາໄດ້ສືບຕໍ່່ຜະລິດແລະພັດທະນາຂ່າວທີ່ມີທັງພາບແລະສຽງຄືກັບໂທລະພາບອອກທາງເຟສບຸກ ທີ່ຊື່ວ່າ Lao National Radio ທີ່ໄດ້ຮັບ ການຕອບ ຮັບຈາກຜູ້ຊົມໃນລາວແລະຕ່າງປະເທດນັບມື້ນັບຫຼາຍຂຶ້ນ. ຂໍຂອບໃນສຳລັບການຍ້ອງຍໍຊົມເຊີຍ ແລະ ຕຳນິຕິຊົມຂອງທ່ານຜູ້ຟັງຜູ້ຊົມທີ່ລ້ວນແຕ່ເປັນສິ່ງທີ່ປະເສີດສຳລັບການປັບປຸງເນື້ອໃນແລະຮູບແບບ ລາຍການໃຫ້ຮັບໃຊ້ທ່ານໃຫ້ດີກວ່າເກົ່າໃນປີ2022ນີ້ເພາະເປັນປີທີ່ຈະມີເຫດການໃຫຍ່ໆຂອງຊາດຢ່າງຫຼວງຫຼາຍ.
ຄະນະນຳແລະພະນັກງານທຸກຄົນຂອງ ວິທະຍຸກະຈາຍສຽງແຫ່ງຊາດລາວ ຫວັງວ່າ ໃນປີໃໝ່ 2022 ນີ້ ພວກເຮົາຈະໄດ້ຮັບການຮ່ວມມືຈາກການນຳພັກ-ລັດ ທັງສູນກາງແລະທ້ອງຖິ່ນ, ອຳນາດ ການປົກ ຄອງ ນັກວິຊາການທຸກຂະແໜງ ວິທະຍຸກະຈາຍສຽງ ລະບົບໂທລະ ໂຄ່ງ,ນັກຂ່າວ ທ້ອງຖິ່ນທຸກ ແຂວງແລະເມືອງ ເພື່ອນຮ່ວມງານທຸກທ່ານ ເພື່ອຊ່ອຍກັນໂຄສະນາການພັດທະນາເສດຖະກິດ-ສັງຄົມໃນປີ 2022 ແລະ ເຮັດພາລະບົດບາດເປັນກະບອກສຽງຂອງພັກແລະລັດຖະບານ ເປັນເວທີສະແດງ ຄວາມຄິດຄວາມເຫັນຂອງຂອງປະຊາຊົນລາວບັນດາເຜົ່າໃຫ້ດີກວ່າປີ 2021 ທີ່ຜ່ານມາ.
ປີໃໝ່ ຄສ 2022 ຂໍອວຍພອນໃຫ້ການນຳພັກ-ລັດແລະປະຊາຊົນລາວທຸກເຜົ່າແຕ່ເໜືອຮອດໃຕ້ຈົ່ງມີຄວາມສຸກກາຍສະບາຍໃຈ ຮ່ວມແຮງຮ່ວມໃຈສະຕິປັນຍາເພື່ອນຳພາປະເທດລາວຫຼຸດພົ້ນຈາກຄວາມດ້ອຍພັດທະນາ ຊີວິດການເປັນຢູ່ຂອງປະຊາຊົນລາວຮົ່ມເຢັນຜາສຸກກວ່າປີ 2021 ຜ່ານມາ.
ໂຊກດີປີໃໝ່ 2022
Happy New Year
Loading...