ນັບຖອຍຫຼັງຈາກມື້ນີ້ໄປຮອດວັນທີ 4 ກຸມພາໜ້ານີ້ກໍຍັງເຫຼືອເວລາພຽງແຕ່ບໍ່ພໍເທົ່າໃດມື້ ງານມະຫາກິລາໂອແລມປິກລະດູໜາວປັກກິ່ງ 2022 ກໍຈະໄຂຂື້ນຢ່າງເປັນທາງການແລ້ວຢູ່ນະຄອນຫຼວງປັກກິ່ງ.ມາຮອດມື້ນີ້,ນັກກິລາຫຼາຍປະເທດໄດ້ເດີນທາງມາຮອດນະຄອນຫຼວງປັກກິ່ງແລ້ວ ລວມທັງນັກກິລາສະກີສາວງາມຄົນໜຶ່ງທີ່ີມີຊື່ສຽງຢູ່ໃນໂລກເຊິ່ງເປັນຄົນເຊື້ອ ສາຍຈີນເກີດຢູ່ອາເມຣິກາແລະໄດ້ກັບຄືນມາເຂົ້າຮ່ວມທີມຊາດຈີນ ເພື່ອຕາງໜ້າໃຫ້ປະເທດຈີນເຂົ້າຮ່ວມງານກິລາໂອແລມປິກລະດູໜາວປັກກິ່ງຄັ້ງນີ້. ສາວງາມຜູ້ນີ້ມີຊື່ວ່າ “ກູອ້າຍຫຼິງ” ເຊິ່ງເປັນນັກກິລາຈີນຄົນໜຶ່ງທີ່ມີຄວາມສາມາດສູງ ແລະໄດ້ຮັບຫຼຽນຄຳຫຼາຍຄັ້ງ, ເປັນນັກກິລາສະກີຈີນຜູ້ທໍາອິດທີ່ໄດ້ຮັບຫຼຽນຄຳໃນງານກິລາສ່ຽງອັນຕະລາຍ ຫຼື X Games ລະດັບໂລກ; ເປັນນັກກິລາຈີນຜູ້ທຳອິດທີ່ໄດ້ຮັບຫຼຽນຄຳໃນການເຂົ້າຮ່ວມແຂ່ງຂັນສະກີລີລາ ລາຍ ການຟຣີສະໄຕຢູ່ສະໜາມຮູບໂຕ U ຂອງງານກິລາ X Games ເປັນຄັ້ງທຳອິດ; ເປັນນັກກິລາຈີນຜູ້ທຳອິດທີ່ໄດ້ຮັບ 2 ຫຼຽນຄຳໃນການເຂົ້າຮ່ວມງານກິລາ X Games ລະດູໜາວເປັນຄັ້ງທຳອິດ. ນອກຈາກນີ້, ກູອ້າຍຫຼິງຍັງເປັນຄົນທີ່ຮຽນເກັ່ງ ເຊິ່ງໄດ້ຄະແນນສູງໃນການ ສອບເສັງເພື່ອປະເມີນຄວາມຮູ້ຂອງນັກຮຽນຊັ້ນມັດທະຍົມ ແລະສາມາດສອບເສັງເຂົ້າມະຫາວິທະຍາໄລສະແຕນຟອດຂອງອາເມຣິກາໄດ້.
ກູອ້າຍຫຼິງ, ເກີດເມື່ອເດືອນກັນຍາປີ 2003 ຢູ່ນະຄອນຊານຟຼານຊີສໂກຂອງອາເມຣິກາ.ລາວເປັນລູກຊອດຈີນ ເພາະພໍ່ຂອງລາວແມ່ນຄົນອາເມຣິກາ, ສ່ວນແມ່ແມ່ນຄົນຈີນ. ແມ່ຂອງລາວໄດ້ຮຽນຈົບຈາກມະຫາວິທະຍາໄລປັກກິ່ງ,ແລ້ວໄປຮຽນຕໍ່ທີ່ອາເມຣິກາ. ແມ່ຂອງກູອ້າຍຫຼິງບໍ່ພຽງແຕ່ຮຽນເກັ່ງເທົ່ານັ້ນ,ຍັງແມ່ນຄູສອນການຫຼິ້ນສະກີຕື່ມອີກ. ແມ່ຂອງລາວເຄີຍໄດ້ເຈ່ຍກູອ້າຍຫຼິງໄປຫຼິ້ນສະກີນໍາເລື້ອຍໆໃນເວລາລາວມີອາຍຸພຽງແຕ່ 3 ເດືອນເທົ່ານັ້ນ ແລະກູອ້າຍຫຼິງໄດ້ເລີ່ມຮຽນຫຼິ້ນສະກີເມື່ອອາຍຸໄດ້ 3 ປີ. ພໍໃຫຍ່ຂື້ນມາໜ້ອຍໜຶ່ງລາວໄດ້ບອກກັບພໍ່ແມ່ວ່າຢາກຫຼິ້ນກິລາສະກີເປັນອາຊີບ, ແຕ່ຄອບຄົວຂອງລາວໄດ້ປະຕິເສດ. ແຕ່ກູອ້າຍຫຼິງໄດ້ບອກສາເຫດທີ່ຢາກຮຽນຫຼິ້ນສະກີ ຍ້ອນວ່າໃນເວລາຫຼິ້ນສະກີລາວມີຄວາມຮູ້ສຶກວ່າກໍາລັງເປັນນົກທີ່ກໍາລັງບິນຢູ່ເທິງອາກາດ,ເຮັດໃຫ້ລາວຢາກຫຼິ້ນສະກີຫຼາຍ. ແມ່ຂອງລາວຄິດວ່າ:ເດັກນ້ອຍແຕ່ລະຄົນລ້ວນແຕ່ມີສິດເລືອກເສັ້ນທາງເດີນຂອງຕົນເອງ. ສະນັ້ນ,ຄອບ ຄົວຂອງລາວຈຶ່ງສະໜັບສະໜູນໃຫ້ລາວຫຼິ້ນສະກີນັບຕັ້ງແຕ່ນັ້ນເປັນຕົ້ນມາ.ກູອ້າຍຫຼິງມີພອນສະຫວັນດ້ານການຫຼິ້ນສະກີຫຼາຍ, ລາວຮຽນຮູ້ໄດ້ໄວ ໃຊ້ເວລາບໍ່ດົນກໍ່ສາມາດເຝິກຊ້ອມຮ່ວມກັບຜູ້ໃຫຍ່ໄດ້. ຜ່ານການເຝິກຊ້ອມມາເປັນເວລາຫຼາຍປີ,ຄູເຝິກສະກີອາຊີບຜູ້ໜຶ່ງເລີ່ມເຫັນພອນສະຫວັນຂອງລາວ ແລ້ວສະເໜີນໍາພໍ່ແມ່ລາວວ່າ: ຢາກໃຫ້ກູອ້າຍຫຼິງເຂົ້າຮ່ວມທິມສະກີອາຊີບ. ດັ່ງນັ້ນ,ເມື່ອອາຍຸໄດ້ 8 ປີ ລາວຈື່ງໄດ້ເຂົ້າຮ່ວມທິມສະກີອາຊີບ ແລະ ເລີ່ມເຝິກຊ້ອມເປັນນັກກິລາອາຊີບ ພ້ອມທັງມີຄວາມໄຝ່ຝັນຢາກເຂົ້າຮ່ວມແຂ່ງຂັນກິລາໂອລິມປິກລະດູໜາວຫຼາຍ.
ເມື່ອອາຍຸໄດ້ 9 ປີ, ກູອ້າຍຫຼິງໄດ້ເຂົ້າຮ່ວມການແຂ່ງຂັນສະກີທົ່ວປະເທດອາເມຣິກາແລະໄດ້ຮັບລາງວັນຊະນະເລີດ.ນັບແຕ່ອາຍຸ 11 ຫາ 15 ປີ, ລາວໄດ້ເຂົ້າຮ່ວມການແຂ່ງຂັນສະກີລາຍການຕ່າງໆແລະໄດ້ຮັບລາງວັນຊະນະເລີດຢ່າງນັບບໍ່ຖ້ວນ. ຍ້ອນວ່າລາວມີເຊື້ອສາຍຈີນ,ແມ່ໄດ້ພາກູອ້າຍຫຼິງກັບຄືນມາປະເທດຈີນ ມາຢ້ຽມຢາມບ້ານເກີດເມືອງນອນຢູ່ເລື້ອຍໆ. ໃນປີ 2019, ເວລານັ້ນລາວມີອາຍຸ 15 ປີ, ລາວໄດ້ປະລະສັນຊາດອາເມຣິກາແລ້ວປ່ຽນມາເປັນສັນຊາດຈີນ.ນັບຕັ້ງແຕ່ນັ້ນເປັນຕົ້ນມາ,ກູອ້າຍຫຼິງໄດ້ຕາງໜ້າໃຫ້ປະເທດຈີນເຂົ້າຮ່ວມແຂ່ງຂັນກິລາສະກີລາຍການຕ່າງໆໃນທົ່ວໂລກ ຍ້ອນມີພອນສະຫວັນ ແລະມີຄວາມພະຍາຍາມຫຼາຍກວ່າຄົນອື່ນ ເຮັດໃຫ້ກູອ້າຍຫຼິງໄດ້ຮັບຫຼຽນຄຳຫຼາຍກວ່າ 50 ຫຼຽນແລ້ວ.
ປັດຈຸບັນນີ້, ກູອ້າຍຫຼິງໄດ້ເດີນທາງມາຮອດນະຄອນຫຼວງປັກກິ່ງແລ້ວ ແລະນັກກິລາຈາກປະເທດຕ່າງໆໃນທົ່ວໂລກກຳລັງເດີນທາງມາປະເທດຈີນເຊັ່ນດຽວກັນ. ເພາະຍັງເຫຼືອເວລາອີກບໍ່ພໍເທົ່າໃດມື້, ງານມະຫາກິລາໂອແລມປິກລະດູໜາວປັກກິ່ງ 2022 ກໍ່ຈະໄຂຂຶ້ນຢ່າງເປັນທາງການ, ສໍາຫຼັບກູອ້າຍຫຼິງຈະເຂົ້າຮ່ວມການແຂ່ງຂັນສະກີຟຣີສະໄຕ 3 ລາຍການ ຄື: ລານສະກີໂດດ, ສະກີລີລາຢູ່ສະໜາມຮູບໂຕ U ແລະສະກີຫຼົບຫຼີກສິ່ງກີດຂວາງຢູ່ເທິງຄ້ອຍ. ນາງກູອ້າຍຫຼີງກ່າວວ່າ: “ຂ້ອຍມັກກິລາປະເພດນີ້ຫຼາຍ ແລະຫວັງວ່າຈະແບ່ງປັນຄວາມຮັກແລະປະສົບການຂອງຕົນໃຫ້ກັບເພື່ອນມິດຊາວຈີນກໍ່ຄືຊາວໂລກ ໂດຍຜ່ານງານກິລາໂອແລມປິກລະດູໜາວປັກກິ່ງ 2022.
ໂດຍ: ຟ້າໃສ ຈະເລີນສຸກ
May be an image of 1 person
May be an image of 1 person and standing
Loading...