ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ບົດສະເໜີ: ຂ່າວປອມ ໄພຮ້າຍຈາກສື່ສັງຄົມອອນລາຍ ທີ່ສ້າງຄວາມບໍ່ສະຫງົບໃນສັງຄົມລາວ

ຂ່າວປອມ ຫລື ພາສາອັງກິດເອີ້ນວ່າ: Fake News ໝາຍເຖີງຂ່າວທີ່ມີເນື້ອໃນບໍ່ເປັນຄວາມຈິງ, ຫລອກລວງ ຫລື ຂ່າວສ້າງສະຖານະການ ຊຶ່ງສ່ວນໃຫຍ່ຖືກເຜີຍແຜ່ໃນສື່ສັງຄົມອອນລາຍ ເພາະປັດຈຸບັນຄົນຫັນມາບໍລິໂພກຂໍ້ມູນຂ່າວຜ່ານສື່ປະເພດນີ້ນັບມື້ຫລາຍຂຶ້ນ ເນື່ອງຈາກສັງຄົມຍຸກໃໝ່ທີ່ແຂ່ງຂັນກັນດ້ານຄວາມວ່ອງໄວ, ຂ່າວສານຜ່ານສື່ສັງຄົມອອນລາຍ ແມ່ນສາມາດຕອບສະໜອງໄດ້ດີ ເພາະມີຄວາມສະດວກ, ວ່ອງໄວ ແລະ ຕົ້ນທຶນກໍ່ຕໍ່າໃນການເຂົ້າເຖິງ. ສາເຫດທີ່ເຮັດໃຫ້ມີຂ່າວປອມເກີດຂຶ້ນ ກໍ່ຍ້ອນຂ່າວປອມຖືກສ້າງຂຶ້ນມາຈາກຜູ້ທີ່ມີອະຄະຕິ ຫຼື ຜູ້ຕ້ອງການໃຫ້ສັງຄົມແຕກແຍກ, ເປັນເຄື່ອງມືໃນການສ້າງຜົນປະໂຫຍດໃຫ້ກັບບຸກຄົນ ແລະ ທັງມາຈາກແຮງຈູງໃຈທາງດ້ານເສດຖະກິດ ກໍ່ຄື ຫາກມີຍອດແຊຣ໌, ຍອດການກົດຖືກໃຈຫຼາຍຂຶ້ນເທົ່າໃດ ຫຼື ມີຄົນເຂົ້າອ່ານຂ່າວຫຼາຍເທົ່າໃດ ລາຍໄດ້ກໍ່ຈະຫຼາຍຂຶ້ນເທົ່ານັ້ນ.

ຂ່າວປອມ ໄດ້ສ້າງຄວາມບໍ່ສະຫງົບຫລາຍສົມຄວນຢູ່ຫລາຍປະເທດທົ່ວໂລກ, ໃນນັ້ນ ລວມທັງປະເທດມະຫາອໍານາດຄືສະຫະລັດອາເມລິກາກໍ່ປະສົບບັນຫານີ້ເຊັ່ນດຽວກັນ. ສະເພາະຢູ່ປະເທດລາວ ຂ່າວປອມ ທີ່ເຜີຍແຜ່ຜ່ານສື່ສັງຄົມອອນລາຍໄດ້ສ້າງຄວາມບໍ່ສະຫງົບ ແລະ ຄວາມຫຍຸ້ງຍາກສັບສົນບໍ່ໜ້ອຍໃນສັງຄົມ ເພາະມີກຸ່ມຄົນບໍ່ຫວັງດີຫວັງມ້າງເພທຳລາຍລະບອບໃໝ່ຂອງລາວ ເຜີຍແຜ່ຂ່າວປອມ, ຖ່າຍຄຼິບວິດີໂອ ຫລື ຕັດຕໍ່ຮູບພາບການນຳພ້ອມກັບບັນລະຍາຍຄວາມບໍ່ດີໃສ່ ເພື່ອໂຄສະນາດ້ວຍຫລາຍຮູບແບບທີ່ມີລັກສະນະຕົວະຍົວະຫລອກ ຫລວງປະຊາຊົນລາວຢູ່ພາຍໃນ ແລະ ຕ່າງປະເທດ, ພ້ອມທັງຍຸຍົງສົ່ງເສີມການເຄື່ອນໄຫວທີ່ເປັນການກໍ່ການຮ້າຍ, ປັ່ນປ່ວນສັງຄົມ, ເຜີຍແຜ່ຮູບພາບລາມົກອານາຈານ ແລະ ອື່ນໆ. ຂ່າວປອມທີ່ເຜີຍແຜ່ຢູ່ລາວໃນໄລຍະຜ່ານມາ ທີ່ພົ້ນເດັ່ນ ແລະ ໄດ້ຮັບຄວາມສົນໃຈຫລາຍຈາກສັງຄົມມີຫລາຍຂ່າວ ເປັນຕົ້ນ: ໃນໄລຍະສັນເຂື່ອນກັນນ້ຳອ່າງເກັບນ້ຳສໍາຮອງເຂື່ອນໄຟຟ້າເຊປຽນ-ເຊນ້ຳນ້ອຍແຕກຢູ່ເມືອງ ສະໜາມໄຊ, ແຂວງ ອັດຕະປື ໃນເດືອນ ກໍລະກົດປີ 2018 ຜ່ານມາ, ກຸ່ມຄົນບໍ່ດີໄດ້ຕັດຕໍ່ຮູບພາບປະຊາຊົນທີ່ເສຍຊີວິດ, ຜູ້ໄດ້ຮັບຜົນກະທົບ ແລະ ອື່ນໆ ທີ່ບໍ່ເປັນຄວາມຈິງເຜີຍແຜ່ໃນສັງຄົມ. ນອກຈາກນີ້ ຍັງມີຂ່າວການແຕ່ງຕັ້ງການນໍາລະດັບສຳຄັນຂອງປະເທດຫລາຍຕໍາແໜ່ງ, ບັນຫາຊາຍແດນລາວ-ກໍາປູເຈຍ, ຂ່າວກ່ຽວກັບເຂື່ອນໄຟຟ້າເຊລະບໍາແຕກຢູ່ແຂວງຈໍາປາສັກ ແລະ ອື່ນໆ ຊຶ່ງລ້ວນແລ້ວແຕ່ເປັນຂ່າວປອມ ຫລື ຂ່າວທີ່ບໍ່ມີຄວາມຈິງທັ້ງນັ້ນ.

ໃນໄລຍະຜ່ານມາ, ຫລາຍປະເທດໄດ້ເອົາໃຈໃສ່ແກ້ໄຂບັນຫາຂ່າວປອມຢ່າງຈິງຈັງດ້ວຍການອອກກົດໝາຍ ແລະ ລະບຽບການຕ່າງໆ ຢ່າງເຂັ້ມງວດ ເປັນຕົ້ນ: ປະເທດຟິລິບປິນ ໄດ້ຜ່ານກົດໝາຍສະເພາະເພື່ອລົງໂທດບຸກຄົນທີ່ເຜີຍແຜ່ຂ່າວປອມ ຕ້ອງຖືກປັບໄໝ 100.000-5 ລ້ານເປໂຊ ແລະ ອາດຖືກຈຳຄຸກ 1-5 ປີ ຫລື ທັງປັບໄໝ ແລະ ຈຳຄຸກ; ສ່ວນຢູ່ປະເທດມາເລເຊຍ ໄດ້ຜ່ານກົດໝາຍກຳນົດໂທດ ຈໍາຄຸກສູງສຸດ 6 ປີ ແລະ ປັບໄໝ 5 ແສນຣິງກິດຕໍ່ຜູ້ເຜີຍແຜ່ຂ່າວປອມ, ເປັນຕົ້ນ. ສະເພາະຢູ່ລາວ ເຖີງວ່າລັດຖະບານ ບໍ່ໄດ້ອອກກົດໝາຍເພື່ອຮັບມືກັບຂ່າວປອມໂດຍສະເພາະ ແຕ່ກໍ່ມີກົດໝາຍ ແລະ ລະບຽບການທີ່ກ່ຽວຂ້ອງກັບການຄຸ້ມຄອງຂ່າວ ແລະ ອິນເຕີເນັດຫລາຍສະບັບ ເປັນຕົ້ນ: ກົດໝາຍວ່າດ້ວຍສື່ມວນຊົນ, ກົດໝາຍວ່າດ້ວຍການຕ້ານ ແລະ ສະກັດກັ້ນອາດຊະຍາກຳທາງລະບົບຄອມພີວເຕີ, ກົດໝາຍວ່າດ້ວຍການປົກປ້ອງຂໍ້ມູນອີເລັກໂຕຣນິກ ແລະ ນິຕິກໍາ ແລະ ອື່ນໆ. ຫລ້າສຸດ, ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ກໍ່ໄດ້ອອກແຈ້ງການໃຫ້ສື່ສັງຄົມອອນລາຍ ຄື ບັນດາເວັບໄຊ ແລະ ເພຈເຟສບຸກທີ່ໃຫ້ບໍລິການດ້ານຂ່າວສານແກ່ສັງຄົມຕ້ອງລົງທະບຽນໃຫ້ຖືກຕ້ອງຕາມກົດໝາຍ ແຕ່ໃນການຈັດຕັ້ງປະຕິບັດຕົວຈິງ ແມ່ນຍັງບໍ່ທັນໄດ້ຮັບຜົນດີເທົ່າທີ່ຄວນ ເນື່ອງຈາກຍັງມີຫລາຍເວັບໄຊ ແລະ ຫລາຍເພຈທີ່ໄດ້ຮັບຄວາມນິຍົມຈາກສັງຄົມບໍ່ທັນໄປລົງທະບຽນຢ່າງເປັນທາງການເທື່ອ.
ສື່ສັງຄົມອອນລາຍ ເປັນສື່ມີມີຄວາມວ່ອງໄວທັນເຫດການທີ່ມີທັງດ້ານດີ ແລະ ບໍ່ດີ. ບັນດາຂ່າວປອມທີ່ເກີດຂຶ້ນ ລ້ວນແຕ່ມີສື່ສັງຄົມອອນລາຍເປັນຕົວຂັບເຄື່ອນທີ່ສຳຄັນ ແລະ ສ້າງຄວາມບໍ່ສະຫງົບຫລາຍສົມຄວນໃນສັງຄົມລາວ. ດັ່ງນັ້ນ ຈິ່ງຮຽກຮ້ອງມາຍັງທຸກຄົນໃນສັງຄົມຈົ່ງບໍລິໂພກຂໍ້ມູນຂ່າວສານຜ່ານສື່ສັງຄົມອອນລາຍຢ່າງມີສະຕິ ໂດຍສະເພາະໃນໄລຍະທີ່ຫລາຍທ້ອງຖິ່ນໃນທົ່ວປະເທດຂອງລາວປະສົບໄພພິບັດນໍ້າຖ້ວມໃນປີນີ້ ທຸກຄົນຕ້ອງຈໍາແນກ ແລະ ວິເຄາະຂໍ້ມູນຂ່າວສານທີ່ໄດ້ຮັບຢ່າງລະອຽດວ່າເປັນຂໍ້ມູນຂ່າວສານທີ່ແທ້ຈິງ ແລະ ເຊື່ອຖືໄດ້ຫລືບໍ່ ໂດຍປະຕິບັດ 6 ມີໃນການໃຊ້ສື່ອອນລາຍໃຫ້ເຂັ້ມງວດທີ່ສຸດ ຄື: ມີສະຕິໃນການບໍລິໂພກ, ມີສະຕິໃນການກົດຖືກໃຈ, ມີສະຕິໃນການແຊຣ໌, ມີສະຕິໃນການອອກຄວາມເຫັນ, ມີສະຕິໃນການກົດຕິດຕາມ ແລະ ມີສະຕິໃນການພສ. ຖ້າເຮັດໄດ້ຄືແນວນີ້, ແນ່ນອນຜູ້ຊົມໃຊ້ສື່ສັງຄົມອອນລາຍທຸກຄົນ ຈະບໍ່ຕົກເປັນເຫຍື່ອຂອງກຸ່ມຄົນບໍ່ດີທີ່ເຜີຍແຜ່ຂ່າວປອມທີ່ເກີດຂຶ້ນໃນສັງຄົມລາວ.

ຂຽນໂດຍ: ມົດແດງນ້ອຍ