ບ້ານທວາຍໃຫຍ່ ເມືອງທ່າພະບາດ ຮັບປະກັນການເລືອກຕັ້ງ ສສຊ ແລະ ສສຂ ຈະບັນລຸສາມຮ້ອຍສ່ວນຮ້ອຍ
……….
ບ້ານທວາຍໃຫຍ່, ເມືອງທ່າພະບາດ, ແຂວງບໍລິຄໍາໄຊ ພ້ອມແລ້ວໃນການກະກຽມໃຫ້ແກ່ການເລືອກຕັ້ງສະມາ ຊິກສະພາແຫ່ງຊາດ (ສສຊ) ຊຸດທີ IX ແລະ ການເລືອກຕັ້ງສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ທີ່ຈະຈັດຂຶ້ນໃນວັນທີ 21 ກຸມພາ 2021 ເຊີ່ງອົງການປົກ ຄອງບ້ານດັ່ງກ່າວຮັບປະກັນວ່າ: ການເລືອກຕັ້ງຄັ້ງນີ້ບ້ານຂອງຕົນຈະບັນລຸໄດ້ສາມຮ້ອຍສ່ວນຮ້ອຍ.
ທ່ານ ຄຳໝຽນ ຈອມທິບ, ຮອງເລຂາພັກບ້ານ, ຮອງນາຍບ້ານທວາຍໃຫຍ່ ໃຫ້ສໍາພາດວ່າ: ບ້ານທວາຍໃຫຍ່ ໄດ້ເອົາໃຈໃສ່ກະກຽມໃຫ້ແກ່ການເລືອກຕັ້ງຄັ້ງນີ້ຢ່າງເປັນເຈົ້າການທີ່ສຸດ ໂດຍເລີ່ມຈາກການແຕ່ງຕັ້ງຄະນະຮັບຜິດ ຊອບແຕ່ລະວຽກງານ ເປັນຕົ້ນ: ຄະນະຮັບຜິດຊອບວຽກ ງານ ປກຊ-ປກສ, ຄະນະຮັບຜິດຊອບສະຖານທີ່ປ່ອນບັດເລືອກຕັ້ງ, ຄະນະຮັບຜິດຊອບໜ່ວຍປ່ອນບັດ ແລະ ອື່ນໆ ໂດຍໄດ້ຈັດເຝິກອົບຮົມແນະນຳແຕ່ລະຄະນະຮັບຜິດຊອບຮຽບຮ້ອຍແລ້ວ. ປັດຈຸບັນ ການກະກຽມວຽກງານຕ່າງໆ ພາຍໃນບ້ານໃຫ້ແກ່ການເລືອກຕັ້ງຄັ້ງນີ້ແມ່ນພ້ອມແລ້ວຮ້ອຍສ່ວນຮ້ອຍ.
ພ້ອມນີ້ ທ່ານຍັງໄດ້ຮຽກຮ້ອງໃຫ້ປະຊາຊົນພາຍໃນບ້ານທວາຍໃຫຍ່ທີ່ມີອາຍຸ 18 ປີຂຶ້ນໄປ ຕ້ອງຕື່ນຕົວໄປໃຊ້ສິດປະຊາທິປະໄຕຂອງຕົນໃຫ້ເປັນປະໂຫຍດ ເພື່ອປ່ອນບັດເລືອກຕັ້ງເອົາ ສສຊ ຊຸດທີ IX ແລະ ການເລືອກຕັ້ງ ສສຂ ຊຸດທີ II ເປັນຕົນແທນຂອງຕົນເຂົ້າໄປປະຕິບັດໜ້າທີ່ໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໂດຍການປະຕິບັດຕາມການແນະນຳຂອງຄະນະຮັບຜິດຊອບການປ່ອນບັດເລືອກຕັ້ງພາຍໃນບ້ານຢ່າງຖືກຕ້ອງ ເພື່ອຮັບ ປະກັນບໍ່ໃຫ້ມີບັດຕາຍເກີດຂຶ້ນ.
ບ້ານທວາຍໃຫຍ່ ມີພົນລະເມືອງ 1.700 ກວ່າຄົນ, ໃນນີ້ ມີຜູ້ມີສິດປ່ອນບັດເລືອກຕັ້ງ 900 ກວ່າຄົນ. ສໍາລັບຜູ້ລົງສະໝັກຮັບເລືອກຕັ້ງເປັນ ສສຊ ຊຸດທີ IX ຢູ່ແຂວງບໍລິຄໍາໄຊ ມີທັງໝົດ 10 ທ່ານ, ຍິງ 2 ທ່ານ ເລືອກເອົາ 7 ທ່ານ, ສ່ວນຜູ້ລົງສະໝັກຮັບເລືອກຕັ້ງເປັນ ສສຂ ຊຸດທີ II ມີທັງ ໝົດ 39 ທ່ານ, ຍິງ 12 ທ່ານ ເລືອກເອົາ 25 ທ່ານ, ໃນນີ້ ສະເພາະ ສສຂ ທີ່ລົງສະໝັກປະຈໍາຢູ່ເມືອງທ່າພະບາດ ມີ 5 ທ່ານ, ຍິງ 1 ທ່ານ ເລືອກເອົາ 3 ທ່ານ.
ຂ່າວ: ບຸນຕຽງ ຈັນທະວົງ
ພາບ: ຈັນທະວອນ ຄຳພິລາວົງ
Loading...