ເມື່ອບໍ່ດົນມານີ້, ຫ້ອງການກະສິກຳ ແລະ ປ່າໄມ້ເມືອງຄູນຄຳ ແຂວງຄໍາມ່ວນ ພ້ອມດ້ວຍການນຳພາຍໃນເມືອງ ແລະ ຂະແໜງ ການທີ່ກ່ຽວຂ້ອງ ລົງແຈກຢາຍແນວພັນພືດ ໃຫ້ບັນດາບ້ານທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ໃນໄລຍະປີ 2023 ທີ່ຜ່ານມາ, ຊຶ່ງນຳພາໂດຍທ່ານ ນາງ ຍົມມະລາ ເດດສັກດາ ຮອງເຈົ້າເມືອງໆຄູນຄຳ ແລະ ທ່ານ ເພັດມະນີ ກອງມະນີ ຫົວໜ້າຫ້ອງການກະສິກຳ ແລະ ປ່າໄມ້ເມືອງ.
ແນວພັນພືດທີ່ນຳມາແຈກຢາຍຄັ້ງນີ້ ປະກອບມີ 5 ຊະນິດແນວພັນພືດຄື: ສາລີຫວານ, ໝາກເຜັດ, ຜັກກາດຊອມ, ຫອມປ້ອມ ແລະ ໝາກແຕງຄ້າງ ລວມມູນຄ່າແນວພັນພືດ ແລະ ການຈັດສົ່ງທັງໝົດ 1 ຕື້ກວ່າກີບ ປັດຈຸບັນແມ່ນມອບສຳເລັດແລ້ວ 3 ບ້ານຄື: ບ້ານນາຂາມ, ບ້ານກາງ ແລະ ບ້ານພູຊາດ ແລະ ຍັງຈະສືບຕໍ່ມອບໃຫ້ຄົບທັງ 22 ບ້ານພາຍໃນເມືອງຄູນຄຳ.
ສ່ວນການແບ່ງປັນແນວພັນພືດໃນແຕ່ລະບ້ານ ແມ່ນອີງຕາມຜົນເສຍຫາຍໃນຊ່ວງໄລຍະໄພພິບັດປີ 2023 ທີ່ຫ້ອງການກະ ສິກຳ ແລະ ປ່າໄມ້ເມືອງ ໄດ້ເກັບຂໍ້ມູນໃນໄລຍະປີຜ່ານມາ.
