ບ້ານສາງກາງ ເມືອງໂມຫານ, ສປປຈີນ ເປັນກຸ່ມບ້ານທີ່ມີຄວາມສະອາດຈົບງາມ ມີຫຼາຍຊົນເຜົ່າທີ່ອາໄສຢູ່ຢ່າງໜາແໜ້ນ ແລະ ມີຄວາມສຸກເພິ່ງພາອາໄສກັນ ມີປະຊາກອນປະມານ 1.250 ຄົນ, ມີ 238 ຫຼັງຄາເຮືອນ, ປະຊາຊົນສ່ວນໃຫຍ່ແມ່ນທໍາການຜະລິດ ແລະ ປູກພືດເປັນສິນຄ້າໂດຍສະເພາະແມ່ນສາລີ.
ທ່ານ ນາງ ອີກອງຊອນ ປະຊາຊົນບ້ານ ສາງກາງ ເວົ້າສູ່ນັກຂ່າວ ອາຊຽນ ມີເດັຍ ທົວ ໃນໂອກາດທີ່ເດີນທາງຢ້ຽມຢາມກຸ່ມບ້ານແຫ່ງນີ້ວ່າ :ຄອບຄົວຂອງລາວມີພີ່ນ້ອງຮ່ວມຄອບຄົວດຽວກັນ ຫ້າຄົນ ສ່ວນໃຫຍ່ມີອາຊີບປູກໝາກສາລີ, ເຂົ້າ ແລະ ລ້ຽງສັດເປັນສ່ວນໃຫຍ່ ປະຊາຊົນມີຄວາມສາມັກຄີຮັກແພງເຊິ່ງກັນ ແລະ ກັນ ບ້ານສາງກາງ ມີຫຼາຍຊົນເຜົ່າຢູ່ຮ່ວມກັນ ສ່ວນໃຫຍ່ແມ່ນ ໄຕລື້ຊໍາ ໂຄງລ່າງພື້ນຖານຂອງກຸ່ມບ້ານແຫ່ງນີ້ ມີຄວາມສວຍງາມ ຄົງຄວາມເປັນວັດທະນາທໍາສະເພາະຂອງເຜົ່າໄຕລື້ ທີ່ມີແຕກຕ່າງຈາກເຜົ່າອື່ນໆ ເພື່ອສຶກສາ ແລະ ຮຽນຮູ້ຂອງແຂກທີ່ຈະເຂົ້າໄປສໍາພັດກັບວີຖີຊີວິດທີ່ຮຽບງ່າຍ ແລະ ວັດທະນາທໍາທີ່ໜ້າຄົ້ນຫາ.
ກຸ່ມບ້ານແຫ່ງນີ້ ຕັ້ງຫ່າງຈາກຊາຍແດນ ບໍ່ເຕັນ-ບໍ່ຫານປະມານ 11 ກິໂລແມັດ ນັບຕັ້ງແຕ່ບໍລິສັດລົດໄຟລາວ-ຈີນ ຄຸນມິງຫານະຄອນຫຼວງວຽງຈັນ ໄດ້ເລີ່ມການກໍ່ສ້າງກຸ່ມບ້ານຕ່າງໆຕາມຊາຍແດນ 6 ທິດທາງ ເພື່ອສົ່ງເສີມກໍ່ສ້າງກຸ່ມບ້ານຊາຍແດນໃຫ້ທັນສະໄໝ ແລະມີຄວາມສຸກ ຮັບປະກັນການກໍ່ສ້າງພື້ນຖານໂຄງລ່າງທີ່ໝັ້ນຄົງ ຄຽງຄູ່ກັບການອະນຸລັກມໍລະດົກ ການພັດທະນາອຸດສະຫະກໍາທີ່ຖືກຕ້ອງ ມີສະພາບແວດ ລ້ອມທີ່ດີ ການຄຸ້ມຄອງລະບົບນິເວດທີ່ເໝາະສົມ ໃນໄລຍະຜ່ານມາມີການຈັດສັນງົບປະມານ ຈໍານວນ 25 ລ້ານຢວນ ຫຼືປະມານ 3 ລ້ານ 4 ແສນກວ່າໂດລາສະຫະລັດ ເພື່ອປັບປຸງໂຄງສ້າງນໍ້າປະປາ ໄຟຟ້າ ແລະ ຖະໜົນ ທີ່ສຳຄັນໃນກຸ່ມບ້ານແຫ່ງນີ້ ເພື່ອອໍານວຍຄວາມສະດວກໃຫ້ແກ່ປະຊາຊົນ ໄດ້ມີຄວາມອຸດົມສົມບູນ ແລະ ຊີວິດການເປັນຢູ່ທີ່ດີຂຶ້ນ %
