ແຂວງບໍລິຄໍາໄຊ ມີນະໂຍບາຍຍົກເວັ້ນຄ່າລົງທະບຽນ ແລະ ຄ່າທໍານຽມຕ່າງໆ ໃຫ້ນັກຮຽນໃນຄອບຄົວອານາຖາທຸກຍາກຕະຫລອດສົກຮຽນ 2024-2025, ສ່ວນນັກ ຮຽນໃນຄອບຄົວອື່ນຍັງຕ້ອງເສຍຄ່າລົງທະບຽນຮຽນຄືທຸກປີຜ່ານມາ.
ທ່ານ ພຸເພັດ ກຸນນະວົງ ຮອງຫົວໜ້າພະແນກສຶກສາທິການ ແລະ ກິລາແຂວງບໍລິຄໍາໄຊ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງ ຊາດລາວ ໃນວັນທີ 14 ສິງຫານີ້ວ່າ: ກ່ອນໜ້ານີ້, ອົງການປົກຄອງແຂວງບໍລິຄໍາໄຊ ໄດ້ອອກແຈ້ງການສະບັບເລກທີ 14/ຂບຊ, ລົງວັນທີ 6 ສິງຫາ 2024 ເຖີງ 7 ຕົວເມືອງພາຍໃນແຂວງ ກ່ຽວກັບການປຸກລະດົມນັກຮຽນເຂົ້າຮຽນໃນຊັ້ນຮຽນຕ່າງໆ ຕາມເກນອາຍຸໃນສົກຮຽນ2024-2025 ທີ່ຈະມາເຖີງນີ້, ໃນນີ້ ມີ 1 ຂໍ້ໄດ້ກໍານົດວ່າ: ຕໍ່ກັບຄອບຄົວອານາຖາທຸກຍາກ ແມ່ນມອບໃຫ້ບ້ານ ແລະ ໂຮງຮຽນດັ່ງກ່າວສະໜອງອຸປະກອນການຮຽນພ້ອມທັງຍົກເວັ້ນຄໍາລົງທະບຽນ, ຄ່າທໍານຽມຕ່າງໆ ຕະຫຼອດສົກຮຽນຕາມຄວາມເໝາະສົມ. ແຕ່ມີບາງສື່ອອນລາຍເຂົ້າໃຈຜິດ ແລະ ໄປເຜີຍແຜ່ຂ່າວວ່າ: ແຂວງບໍລິຄໍາໄຊ ຈະບໍ່ເກັບຄ່າລົງທະບຽນເຂົ້າຮຽນຂອງນັກຮຽນໝົດທຸກຄົນພາຍໃນແຂວງ ເຊິ່ງນັ້ນເປັນການເຂົ້າໃຈທີ່ຜິດພາດ. ຄວາມຈິງແລ້ວສໍາລັບນັກຮຽນທົ່ວໄປທີ່ບໍ່ແມ່ນນັກຮຽນຢູ່ໃນຄອບຄົວອານາຖາທຸກຍາກ ຕ້ອງໄດ້ເສຍຄ່າລົງທະບຽນເຂົ້າຮຽນຕາມທີ່ແຂວງກໍານົດ ເພື່ອປະກອບສ່ວນບູລະນະສ້ອມແປງ ແລະ ຊື້ອຸປະ ກອນການຮຽນ-ການສອນຮ່ວມກັນຄືທຸກປີຜ່ານມາ. ສ່ວນນັກຮຽນທີ່ຢູ່ໃນຄອບຄົວອານາຖາທຸກຍາກແມ່ນມອບໃຫ້ບ້ານ ແລະ ໂຮງຮຽນດັ່ງກ່າວ ສະໜອງອຸປະກອນການຮຽນພ້ອມທັງຍົກເວັ້ນຄໍາລົງທະບຽນ ແລະ ຄ່າທໍານຽມຕ່າງໆ ຕະຫຼອດສົກຮຽນຕາມຄວາມເໝາະສົມ.
ທ່ານກ່າວຢໍ້າຕື່ມວ່າ: ໃນແຈ້ງການຂອງອົງການປົກຄອງແຂວງໃນຄັ້ງນີ້ ໄດ້ເນັ້ນໃຫ້ບັນດາຂະແໜງການທີ່ກ່ຽວຂ້ອງ ກໍຄື ອົງການປົກຄອງທັງ 7 ເມືອງພາຍໃນແຂວງ ຕ້ອງປຸກລະດົມຂົນຂວາຍຜູ້ປົກຄອງໃຫ້ສົ່ງລູກຫຼານຂອງຕົນທີ່ຢູ່ໃນເກນອາຍຸໃຫ້ເຂົ້າຮຽນຕາມຊັ້ນຮຽນຕ່າງໆ ພ້ອມທັງສຶກສາອົບຮົມລູກຫຼານຂອງຕົນໃຫ້ໄປໂຮງ ຮຽນປົກກະຕິ, ຮຽນໃຫ້ຈົບ ແລະ ເປັນຄົນດີຂອງສັງຄົມ. ທັ້ງນີ້, ເນື່ອງຈາກອັດຕາປະລະການຮຽນຂອງນັກຮຽນພາຍໃນແຂວງບໍລິຄໍາໄຊ ໃນສົກຮຽນ 2023-2024 ຜ່ານມາ ສູງສົມຄວນ, ໃນນີ້ ອັດຕາປະລະການຮຽນຊັ້ນປະຖົມ 2,9%, (ຄາດຄະເນ 1,9%), ຊັ້ນມັດທະຍົມຕອນຕົ້ນ ແລະ ຕອນປາຍ 12,9% (ຄາດຄະເນ 10,5%) ເຫັນວ່າເປັນບັນຫາ ແລະ ສິ່ງທ້າທ້າຍສໍາລັບວຽກງານການສຶກສາພາຍແຂວງທີ່ຕ້ອງສືບຕໍ່ແກ້ໄຂໃຫ້ດີຂຶ້ນໃນຕໍ່ໜ້າ.
