ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ບໍລິຄໍາໄຊ ສຸມໃສ່ 9 ວຽກຈຸດສຸມ ເພື່ອແກ້ໄຂ 4 ເຖື່ອນ ໃຫ້ມີປະສິດທິຜົນກ່ວາເກົ່າ

ແຂວງ ບໍລິຄໍາໄຊ ພວມສຸມໃສ່ຈັດຕັ້ງປະຕິບັດວຽກຍຸດທະສາດຈຸດສຸມເພື່ອແກ້ໄຂ 4 ເຖື່ອນ ຄື: ຄົນເຖື່ອນ, ອາວຸດເຖື່ອນ, ລົດເຖື່ອນ ແລະ ຄ້າຂາຍເຖື່ອນ ຊຶ່ງເປັນປະກົດການຫຍໍ້ທໍ້ທີ່ສໍາຄັນໃຫ້ມີປະສິດທິຜົນກ່ວາເກົ່າ ແນໃສ່ ເຮັດໃຫ້ແຂວງມີຄວາມສະຫງົບ, ເປັນລະບຽບຮຽບຮ້ອຍ ແລະ ຮັບປະກັນໃຫ້ເສດຖະກິດ-ສັງຄົມຂອງແຂວງສືບຕໍ່ຂະຫຍາຍຕົວຢ່າງຕໍ່ເນື່ອງ.

ທ່ານ ກອງແກ້ວ ໄຊສົງຄາມ, ເຈົ້າແຂວງໆ ບໍລິຄໍາໄຊ ໄດ້ຖະແຫຼງໃຫ້ຊາບ ໃນໂອກາດສະເຫລີມສະຫລອງວັນສ້າງຕັ້ງແຂວງ ບໍລິຄໍາໄຊ ຄົບຮອບ 35 ປີ, ຊຶ່ງຈັດຂຶ້ນໃນວັນທີ 6 ມີນາ 2019 ວ່າ: ເພື່ອເຮັດໃຫ້ການແກ້ໄຂ 4 ເຖື່ອນ ໄດ້ ຮັບປະສິດທິຜົນກ່ວາເກົ່າ, ແຂວງ ບໍລິຄໍາໄຊ ພວມສຸມໃສ່ຈັດຕັ້ງປະຕິບັດ 9 ວຽກຈຸດສຸມ ຄື: 1) ສຸມໃຈໃສ່ວຽກງານ ປກຊ-ປກສ ໃຫ້ທົ່ວແຂວງມີຄວາມສະຫງົບ ແລະ ເປັນລະບຽບຮຽບຮ້ອຍ, 2) ປັບປຸງອໍານາດການປົກຄອງຂັ້ນຮາກຖານບ້ານໃຫ້ມີຄວາມເຂັ້ມແຂງ, 3) ແກ້ໄຂບັນຫາການຕັ້ງສະນຳ ຕິດພັນກັບການຍົກຍ້າຍພົນລະເມືອງແບບບໍ່ຖືກຕ້ອງ, 4) ບັນຫາຄ້າຂາຍສີ່ງເສບຕິດ, 5) ບັນຫາການສວຍໃຊ້ສາດສະໜາທີ່ຕ້ານຕໍ່ແນວທາງແຜນນະໂຍບາຍຂອງພັກ-ລັດ, 6) ບັນຫາອຸບັດຕິເຫດຕາມທ້ອງຖະໜົນ, 7) ການກີດຂວາງໃນການປະຕິບັດໜ້າທີ່ຂອງເຈົ້າໜ້າທີ່, 8)ການແກ້ໄຂຄວາມ ທຸກຍາກ ແລະ 9) ບັນຫາເລື່ອງທີ່ດິນ.
ທັງ 9 ວຽກຈຸດສຸມນີ້ ໄດ້ມີການສຳມະນາທາງດ້ານວິທະສາດ, ພ້ອມທັງໄດ້ມີແນວທາງ ແລະ ມາດຕະການແກ້ໄຂໄວ້ແລ້ວ.

ສໍາລັບ 4 ເຖື່ອນ ແມ່ນປະກົດການຫຍໍ້ທໍ້ທີ່ແຂວງ ບໍລິຄໍາໄຊ ເລັ່ງຈັດຕັ້ງປະຕິບັດ ໂດຍໄດ້ກຳນົດໄວ້ໃນມະຕິ ກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ ບໍລິຄໍາໄຊ ຊຶ່ງຈັດຂຶ້ນໃນວັນທີ 6-8 ພຶດສະພາ 2015, ເພື່ອແນໃສ່ ຮັບປະກັນໃຫ້ແຂວງ ມີຄວາມສະຫງົບ, ເປັນລະບຽບຮຽບຮ້ອຍດີ.
ຢ່າງໃດກໍ່ຕາມ, ເພື່ອເຮັດໃຫ້ການແກ້ໄຂ 4 ເຖື່ອນ ກໍ່ຄື ການພັດທະນາເສດຖະກິດ-ສັງຄົມຂອງແຂວງນັບມື້ດີຂຶ້ນກ່ວາເກົ່າ, ເຈົ້າແຂວງໆບໍລິຄໍາໄຊ ໄດ້ຮຽກຮ້ອງມາຍັງຄະນະ ພັກທຸກຂັ້ນ, ສະມາຊິກພັກ, ພະນັກງານ, ນັກຮົບຕະຫຼອດພໍ່ແມ່ປະຊາຊົນບັນດາເຜົ່າຊາວບໍລິຄຳໄຊທຸກຖ້ວນໜ້າຈົ່ງເຊີດຊູນ້ຳໃຈຮັກຊາດ, ຕິດພັນກັນກັບຮັກລະບອບໃໝ່, ເພີ່ມທະວີຄວາມສາມັກຄີເປັນເອກະພາບພາຍໃນ, ເປັນຈິດໜື່ງໃຈດຽວ, ຮັກສາ ແລະ ເສີມຂະຫຍາຍມູນເຊື້ອປະຕິວັດ, ເດັດດ່ຽວປະຕິບັດພາລະກິດປ່ຽນແປງໃໝ່ ຮອບດ້ານຂອງພັກ, ເຊີດຊູຄວາມເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ປົກປັກຮັກສາໝາກຜົນຂອງການປະຕິວັດ ແລະ ພັດທະນາປະເທດຊາດ ກໍ່ຄືແຂວງບໍລິຄຳໄຊ ໃຫ້ກ້າວຂື້ນສູ່ຈຸດໝາຍທີ່ພັກໄດ້ກຳນົດໄວ້.

ໂດຍ: ບຸນຕຽງ ຈັນທະວົງ