ທ່ານ ວີ່ຕ່າລີ້ ວ່າຊຽດສະໂກ້ ປະທານທີ່ປຶກສາຄະນະອຳນວຍການບໍລິສັດ ກອນສະແຕນ ພລັດ ສະຫະພັນຣັດເຊຍ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ ພ້ອມດ້ວຍຄະນະ ໃນວັນທີ 25 ມິຖຸນານີ້, ທີ່ຫ້ອງວ່າການແຂວງຊຽງຂວາງ.
ທ່ານ ວີ່ຕ່າລີ້ ວ່າຊຽດສະໂກ້ ໄດ້ລາຍງານຈຸດປະສົງຂອງການມາຢ້ຽມຢາມ ແລະ ເຮັດວຽກ ຢູ່ແຂວງຊຽງຂວາງໃນຄັ້ງນີ້ ເພື່ອສຶກສາຂໍ້ມູນກ່ຽວກັບດິນ, ແນະນຳເຕັກນິກການບຳບັດດິນທີ່ມີສານພິດເຈືອປົນ(ເຄມີ), ຝົນເຫຼືອງ, CO3 ທີ່ໄດ້ຮັບຜົນກະທົບຈາກການຖິ້ມລະເບີດໃນປາງສົງຄາມ ໃຫ້ແກ່ພະແນກການທີ່ກ່ຽວຂ້ອງ ສາມາດນຳໃຊ້ດິນໃນການປູກພືດໃຫ້ງອກງາມໄດ້, ບຳລຸງ, ປັບປຸງພືດສາມາດໃຫຍ່ໄວ ນຳໃຊ້ຈຸລິນຊີທີ່ເປັນມິດຕໍ່ສິ່ງແວດລ້ອມ, ໃຫ້ແຂວງຊອກເນື້ອທີ່ດິນທີ່ປົນເປື້ອນສານເຄມີຫຼາຍທີ່ສຸດ ເພື່ອເອົາໄປວິໄຈ ແລະ ປັບປຸງດິນເຫຼົ່ານັ້ນ ໃຫ້ສາມາດນຳໃຊ້ເນື້ອທີ່ດິນໃນການປູກຝັງ ຈະເລີນງອກງາມໄດ້.
ໂອກາດນີ້ທ່ານຮອງເຈົ້າແຂວງຊຽງຂວາງ ໄດ້ກ່າວສະແດງຄວາມດີໃຈຕ້ອນຮັບ ແລະ ຂອບໃຈມາຍັງພັກ-ລັດຖະບານ ກໍຄືປະຊາຊົນສະຫະພັນຣັດເຊຍ ທີ່ໄດ້ໃຫ້ການຊ່ວຍເຫຼືອຕະຫຼອດມາ ມໍ່ໆມານີ້ແມ່ນຊ່ວຍເກັບກູ້ລະເບີດ, ພັດທະນາເດີ່ນບິນທົ່ງໄຫຫີນ, ກະສິກຳ, ມອບໃຫ້ພະແນກກະສິກຳ ແລະ ພະແນກການທີ່ກ່ຽວຂ້ອງປະສານສົມທົບ, ສະໜອງຂໍ້ມູນ, ຮ່ວມມື, ເປັນໃຈກາງປະສານງານ ເພື່ອໃຫ້ການເຮັດວຽກຂອງບໍລິສັດໃນຄັ້ງນີ້ ເປັນໄປຕາມຈຸດປະສົງ ແລະ ມີຜົນສຳເລັດຕາມຄາດໝາຍ.
(ຂ່າວ: ບຸນມີ ແສງທຸມມີ)
