ໃນມໍ່ໆມານີ້ທີ່ຫ້ອງປະຊຸມຂອງບໍລິສັດທາງລົດໄຟລາວ-ຈີນ ຈຳກັດ ໄດ້ຈັດກອງປະຊຸມປຶກສາຫາລືລະຫວ່າງ ບໍລິສັດທາງລົດໄຟລາວ-ຈີນຈຳກັດ ແລະ ຜູ້ປະກອບການຂົນສົ່ງລາວ, ໂດຍການເປັນປະທານກອງປະຊຸມໂດຍທ່ານ ຫຼິວ ຫົງ ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນ ຈຳກັດ, ທ່ານ ດາວຈິນດາ ສີຫາລາດ ຮອງຜູ້ອຳນວຍການຜູ້ປະຈຳການພ້ອມດ້ວຍຄະນະບໍລິສັດ ແລະ ຕາງໜ້າໃຫ້ແກ່ຜູ້ປະກອບການຂອງລາວໃຫ້ກຽດເຂົ້າຮ່ວມຈຳນວນ 50 ກວ່າທ່ານ.
ເປົ້າໝາຍຂອງກອງປະຊຸມໃນຄັ້ງນີ້ເພື່ອຮັບຟັງຄຳຄິດເຫັນແນະນຳ ແລະ ປຶກສາຫາລືແລກປ່ຽນ ລະຫວ່າງ ບໍລິສັດທາງລົດໄຟລາວ-ຈີນ ຈຳກັດ ກັບຜູ້ປະກອບການຂອງລາວ ກ່ຽວກັບການສົ່ງເສີມການອຳນວຍຄວາມສະດວກ ແລະ ສາມາດຕອບສະໜອງການບໍລິການຂອງລູກຄ້າ, ຮັບໃຊ້ເປົ້າໝາຍ ແລະ ນະໂຍບາຍຂອງບໍລິສັດໃນການຄຸ້ມຄອງບໍລິຫານ ແລະ ການຈັດຕັ້ງການຂົນສົ່ງຜ່ານທາງລົດໄຟໃຫ້ດີ, ຮັບໃຊ້ຜູ້ປະກອບການຂອງລາວໃຫ້ມີປະສິດທິພາບ ຖືເອົາການອຳນວຍຄວາມສະດວກໃຫ້ຜຸ້ກອບການລາວໃນການຂົນສົ່ງສິນຄ້າກັບທາງລົດໄຟມາເປັນອັນດັບທຳອິດ ຄຽງຄູ່ກັນນັ້ນກໍຮັບປະກັນໃຫ້ສາມາດຊຸກຍູ້ເສດຖະກິດ-ສັງຄົມຂອງລາວໃຫ້ມີການພັດທະນາຍິ່ງໆຂຶ້ນ.
ໃນລະຫວ່າງກອງປະຊູມບໍລິສັດທາງລົດໄຟລາວ-ຈີນ ໄດ້ແນະນຳລາຍລະອຽດທີ່ກ່ຽວຂ້ອງກ່ຽວກັບການສະໜອງຕູ້, ລະບົບການແຈ້ງ, ການເຂົ້າເຖິງ, ສະພາບການດຳເນີນການ ແລະ ອື່ນໆ, ໄດ້ມີການແລກປ່ຽນກ່ຽວກັບປະເດັນ ແລະ ຂໍ້ຄິດເຫັນກັບຜູ້ປະກອບການຢ່າງກົງໄປກົງມາ, ຖືວ່າກອງປະຊຸມໄດ້ດຳເນີນໄປດ້ວຍບັນຍາກາດທີ່ຟົດຟື້ນ ແລະ ໄດ້ຮັບໝາກຜົນທີ່ດີ.
ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນ ຈຳກັດ ມີຄຳເຫັນວ່າ ຈະສືບຕໍ່ຊຸກຍູ້ໃຫ້ມີການປະສານງານຕິດຕໍ່ພົວພັນກັບຜູ້ປະກອບການຂົນສົ່ງຂອງລາວຢ່າງເປັນປະຈຳ, ເປີດນຳໃຊ້ສາຍດ່ວນບໍລິການ ແລະ ອີເມວ ເພື່ອອຳນວຍຄວາມສະດວກໃຫ້ຜູ້ປະກອບການຂອງລາວໃນການໂທສອບຖາມຂໍ້ມູນ ແລະ ແຈ້ງບັນຫາທີ່ກ່ຽວຂ້ອງ. ພ້ອມກັນນີ້, ກໍຈະຍຶດໝັ້ນເປົ້າໝາຍ “ທາງລົດໄຟລາວ-ຈີນ ຮັບໃຊ້ການພັດທະນາເສດຖະກິດສັງຄົມຂອງລາວ, ຮັບໃຊ້ປະຊາຊົນລາວ ແລະ ຮັບໃຊ້ຜູ້ປະກອບການຂອງລາວ”, ສຸມໃສ່ການເພີ່ມປະລິມານການຂົນສົ່ງສິນຄ້າ, ຫຼຸດຜ່ອນຄ່າໃຊ້ຈ່າຍໃນການຂົນສົ່ງ, ຍົກສູງຄຸນນະພາບການບໍລິການ, ເພີ່ມທະວີການຄຸ້ມຄອງບໍລິຫານ, ຮັບໃຊ້ຜູ້ປະກອບການຂອງລາວໃຫ້ດີຂຶ້ນ, ສົ່ງເສີມການຂົນສົ່ງສິນຄ້າກະສິກຳຂອງລາວສູ່ພາກພື້ນ ແລະ ສາກົນ, ສ້າງໃຫ້ທາງລົດໄຟເປັນດັ່ງເສັ້ນທາງສາຍຄຳທີ່ສ້າງຄວາມຜາສຸກໃຫ້ແກ່ປວງຊົນລາວ.