ວັນທີ 29 ມີນາ 2024 ບໍລິສັດທາງລົດໄຟລາວ-ຈີນ ຈຳກັດ ໄດ້ຈັດກອງປະຊຸມແລກປ່ຽນຜົນການຮຽນຮູ້ ແລະ ເຊື່ອມຊຶມແຜນແມ່ບົດວ່າດ້ວຍການສ້າງຄູ່ຮ່ວມຊະຕາກຳລາວ-ຈີນ ພ້ອມທັງໄດ້ມອບໃບຍ້ອງຍໍໃຫ້ແກ່ພະນັກງານທີ່ໄດ້ມີການຮຽນຮູ້ ແລະ ເຂົ້າໃຈຕໍ່ກັບແຜນແມ່ບົດດັ່ງກ່າວທີ່ດີເດັ່ນ.
ໃນກອງປະຊຸມ, ທ່ານ ຫຼິວຫົງ ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນ ຈຳກັດ ໄດ້ເວົ້າເຖິງຄວາມຮູ້ຄວາມເຂົ້າໃຈຕໍ່ແຜນແມ່ບົດວ່າ: ແຜນແມ່ບົດສະບັບໃໝ່ນີ້ສະແດງໃຫ້ເຫັນເຈດຈຳນົງທາງການເມືອງອັນສູງສຸດຂອງສອງພັກສອງຊາດລາວ-ຈີນ,ເປັນການຍົກລະດັບການພົວພັນຮ່ວມມືລະຫວ່າງຄູ່ຮ່ວມຊະຕາກຳລາວ-ຈີນໃໝ່ທີ່ສູງທີ່ສຸດ,ແມ່ນການລົງເລິກການຮ່ວມມືຍຸດທະສາດລະຫວ່າງສອງປະເທດ ແລະມີຄວາມໝາຍຄວາມສຳຄັນຕໍ່ການພັດທະນາຄຸນນະພາບຂອງທາງລົດໄຟລາວ-ຈີນທີ່ສູງທີ່ສຸດ. ນອກຈາກນັ້ນ, ທ່ານ ຫຼິວຫົງ ຍັງໄດ້ວິເຄາະສະພາບການແລະວຽກງານການດຳເນີນການທາງລົດໄຟໃນປະຈຸບັນ, ພ້ອມທັງວາງເປົ້າໝາຍແລະມາດຕະການສະເພາະໃນການຈັດຕັ້ງປະຕິບັດແຜນແມ່ບົດໃນຄັ້ງນີ້ຕິດພັນກັບການພັດທະນາບໍລິສັດແລະເສັ້ນທາງລົດໄຟລາວ-ຈີນ ໃຫ້ມີຄຸນນະພາບທີ່ສູງຂຶ້ນ.
ທ່ານ ດາວຈິນດາ ສີຫາລາດ ຮອງຜູ້ອຳນວຍການຜູ້ປະຈຳການ ກ່າວບາງຕອນວ່າ: ຜົນສຳເລັດໃນການກໍ່ສ້າງ ແລະ ການດຳເນີນການທາງລົດໄຟ ລາວ-ຈີນ ເປັນໝາກຜົນສຳເລັດທີ່ສຳຄັນຂອງສອງພັກລາວ-ຈີນ ທີ່ຮ່ວມກັນສ້າງຄູ່ຮ່ວມຊະຕາກຳ ລາວ-ຈີນ ໃຫ້ເຂົ້າສູ່ລວງເລິກ.ໃນຂະບວນການດັ່ງກ່າວ, ລັດຖະບານແລະປະຊາຊົນຈີນໄດ້ໃຫ້ການສະໜັບສະໜູນຢ່າງແຂງແຮງ, ໂດຍສະເພາະແມ່ນພະນັກງານຈີນທີ່ໄດ້ອອກຈາກບ້ານເກີດເມືອງນອນ, ຈາກຄອບຄົວ ແລະ ໝູ່ເພື່ອນມາເປັນເວລາດົນນານ ເພື່ອມາກໍ່ສ້າງ ແລະດໍາເນີນການທາງລົດໄຟລາວ-ຈີນຢູ່ປະເທດລາວ, ປະຊາຊົນລາວ ແລະ ພັກປະຊາຊົນປະຕິວັດລາວ ຂໍສະແດງຄວາມຂອບໃຈຢ່າງສຸດໃຈ. ທ່ານດາວຈິນດາ ສີຫາລາດ ຍັງໄດ້ກ່າວຕື່ມວ່າ: ພາຍໃຕ້ການຊີ້ນຳຂອງສອງພັກສອງຊາດລາວ-ຈີນໃນແຜນແມ່ບົດ, ບໍລິສັດຈະຕັ້ງໃຈປະຕິບັດຢ່າງເລິກເຊິ່ງ, ຮອບດ້ານແລະມີປະສິດທິຜົນເພື່ອດຳເນີນການ, ພັດທະນາ ແລະສ້າງສາເສັ້ນທາງລົດໄຟລາວ-ຈີນໃຫ້ດີທີ່ສຸດ.
ຕິດພັນກັບການຈັດຕັ້ງປະຕິບັດວຽກງານດ້ານຕ່າງໆຂອງທາງລົດໄຟລາວ-ຈີນ ແລະ ການປະຕິບັດໜ້າທີ່ຕົວຈິງຂອງຕົນ, ພະນັກງານບໍລິສັດທາງລົດໄຟລາວ-ຈີນ ໄດ້ກ່າວຄຳຄິດເຫັນກ່ຽວກັບຄວາມຮູ້ຄວາມເຂົ້າໃຈໃນການສຶກສາເຊື່ອມຊຶມຂອງຕົນຕໍ່ກັບແຜນແມ່ບົດແລະການນຳໃຊ້ແຜນແມ່ບົດເຂົ້າໃນວຽກງານ, ການສຶກສາຮຽນຮູ້ແລະການດຳລົງຊີວິດຂອງຕົນ.
ທ່ານ ພູມີ ວົງເຫຼັກ ຜູ້ຊ່ຽວຊານອາວຸໂສຈາກພະແນກພັດທະນາປິ່ນອ້ອມ ກ່າວວ່າ: ນັບແຕ່ໄດ້ເຂົ້າເປັນສ່ວນຫນຶ່ງຂອງບໍລິສັດທາງລົດໄຟລາວ-ຈີນໃນປີ 2018 ເປັນຕົ້ນມາຈົນມາຮອດມື້ນີ້ຕົນກໍ່ກຳລັງຈະບຳນານແລ້ວ, ການໄດ້ເຮັດວຽກຢູ່ທາງລົດໄຟ ແລະ ເປັນສ່ວນໜຶ່ງໃນການພັດທະນາທາງລົດໄຟລາວ-ຈີນ ເປັນປະສົບການຫນຶ່ງທີ່ບໍ່ສາມາດລືມໄດ້, ການທີ່ໄດ້ຮ່ວມມືກັບພະນັກງານໃນການເຮັດວຽກ, ຕໍ່ສູ້ຄຽງບ່າຄຽງໄຫຼ່, ຕ້ານການລະບາດຂອງພະຍາດໂຄວິດ-19 ຈົນບັນລຸການເປີດດຳເນີນງານທາງລົດໄຟຢ່າງລາບລື່ນ,ໃນຖານະທີ່ເປັນສະມາຊິກຂອງການກໍ່ສ້າງ ແລະ ການດໍາເນີນການທາງລົດໄຟລາວ-ຈີນ, ເປັນສັກຂີພິຍານໃນການຮ່ວມກັນສ້າງຄູ່ຮ່ວມຊະຕາກຳ ຂ້າພະເຈົ້າຮູ້ສຶກມີຄວາມພາກພູມໃຈຫຼາຍ.
ທ່ານ ຈາງ ເຖຍຊື້ ພະນັກງານພະແນກບຸກຄະລາກອນຂອງບໍລິສັດ ໄດ້ນໍາໃຊ້ຂໍ້ມູນສະຖິຕິກວ່າ 2 ປີທີ່ຜ່ານມາ, ສະແດງໃຫ້ເຫັນກ່ຽວກັບຜົນຂອງການດໍາເນີນການທາງລົດໄຟລາວ-ຈີນ ທີ່ຕິດພັນກັບການພັດທະນາດ້ານບຸກຄະລາກອນທາງລົດໄຟທີ່ມີປະສິດທິພາບ, ພ້ອມທັງຍົກໃຫ້ເຫັນໄດ້ຄວາມສຳຄັນໃນການຮັບສະໝັກພະນັກງານຄົນລາວ, ເງິນເດືອນແລະສະຫວັດດີການ, ການຝຶກອົບຮົມດ້ານວິຊາການ, ການຍົກລະດັບດ້ານຕຳແໜ່ງງານ, ການພັດທະນາໃນອາຊີບ ແລະ ອື່ນໆ.
ທ່ານ ຢາງເຟິງ ພະນັກງານພະແນກແຜນການ ແລະ ການເງິນກ່າວວ່າ: ແຜນແມ່ບົດສະບັບໃໝ່ນີ້ໄດ້ສົ່ງເສີມການສ້າງຄູ່ຮ່ວມຊະຕາກຳລາວ-ຈີນດ້ວຍມາດຕະຖານ, ມີຄຸນນະພາບ ແລະ ລະດັບທີ່ສູງຂຶ້ນ, ພ້ອມທັງວາງທິດທາງໃໝ່ແລະເປົ້າໝາຍການພັດທະນາທາງລົດໄຟລາວ-ຈີນ.ໃນ 5 ປີຕໍ່ໜ້າ, ພະແນກແຜນການແລະການເງິນຂອງບໍລິສັດຈະສຸມໃສ່ເຮັດສຳເລັດວຽກງານ“ປັບປຸງກົດລະບຽບຄຸ້ມຄອງການເງິນ, ເພີ່ມຄວາມເຂັ້ມແຂງໃນການຄຸ້ມຄອງເງິນທຶນ, ການຄຸ້ມຄອງລາຍຮັບການຂົນສົ່ງ, ວຽກງານການພັດທະນາລະບົບຄຸ້ມຄອງການເງິນແລະເພີ່ມທະວີການຝຶກອົບຮົມວຽກງານດ້ານການເງິນໃຫ້ແກ່ພະນັກງານລາວ”.
ນອກຈາກນີ້, ຍັງມີພະນັກງານອີກຈຳນວນຫນຶ່ງ ທີ່ໄດ້ຜັດປ່ຽນກັນຂຶ້ນໄປປະກອບຄຳເຫັນ, ເຊິ່ງເຫັນໄດ້ວ່າ ບັນຍາກາດໃນຫ້ອງປະຊຸມເຕັມໄປດ້ວຍຄວາມຄຶກຄື້ນ, ພະນັກງານທີ່ໄດ້ເຂົ້າຮ່ວມກອງປະຊຸມຕ່າງກໍ່ໄດ້ໂອ້ລົມແລກປ່ຽນເຊິ່ງກັນແລະກັນ ໂດຍໄດ້ກ່າວວ່າ: ນັບແຕ່ເປີດດຳເນີນເສັ້ນທາງລົດໄຟລາວ-ຈີນເປັນຕົ້ນມາ, ບໍລິສັດໄດ້ຕັ້ງໜ້າຈັດຕັ້ງປະຕິບັດການກໍ່ສ້າງຄູ່ຮ່ວມຊະຕາກຳລະຫວ່າງລາວ-ຈີນເຊັ່ນ:ການຮັບສະໝັກພະນັກງານລາວເປັນຈຳນວນຫຼວງຫຼາຍແລະ ຝຶກອົບຮົມດ້ານວິຊາການທາງລົດໄຟໃຫ້ເຂົາເຈົ້າ, ຂຶ້ນເງິນເດືອນໃຫ້ແກ່ພະນັກງານ ເພື່ອໃຫ້ມີຊີວິດການເປັນຢູ່ທີ່ດີຂຶ້ນ ແລະ ໄດ້ສ້າງສະໜາມກິລາເຕະບານ, ເດີ່ນຕີບານ, ຫ້ອງອອກກຳລັງກາຍແລະສິ່ງອຳນວຍຄວາມສະດວກອື່ນໆ ເພື່ອຍົກລະດັບຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນ, ນອກນີ້ ໄດ້ຈັດກິດຈະກຳເພື່ອແລກປ່ຽນວັດທະນະທຳອື່ນໆ ເພື່ອໃຫ້ພະນັກງານໄດ້ມີກິດຈະກຳຮ່ວມກັນ ເພື່ອເຕົ້າໂຮມຄວາມສາມັກຄີ ໃຫ້ທຸກຄົນມີຄວາມຮູ້ສຶກເປັນອັນໜຶ່ງອັນດຽວ ແລະ ມີຄວາມຮູ້ສຶກອົບອຸ່ນຄືດັ່ງຄອບຄົວດຽວກັນ.
ໃນອະນາຄົດ, ບໍລິສັດທາງລົດໄຟລາວ-ຈີນ ຈຳກັດ ຈະສືບຕໍ່ຈັດຕັ້ງປະຕິບັດແຜນແມ່ບົດສະບັບໃຫມ່ນີ້ ໂດຍສຸມໃສ່ການກໍ່ສ້າງຄູ່ຮ່ວມຊະຕາກຳລາວ-ຈີນ ແລະ ເປົ້າໝາຍການພັດທະນາທາງລົດໄຟລາວ-ຈີນທີ່ມີຄຸນນະພາບສູງ, ສ້າງບົດບາດໃໝ່ໃຫ້ແກ່ປະເທດຊາດສູ່ເວທີສາກົນ, ສ້າງທາງລົດໄຟລາວ-ຈີນໃຫ້ເປັນເສັ້ນທາງແຫ່ງຄວາມຜາສຸກ, ເສັ້ນທາງແຫ່ງການພັດທະນາ ແລະ ເສັ້ນທາງແຫ່ງມິດຕະພາບຂອງປະຊາຊົນສອງຊາດ ລາວ-ຈີນ ຢ່າງແທ້ຈິງ.
