ເນື່ອງໃນວາລະໂອກາດວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ຄົບຮອບ 44 ປີ, ບໍລິສັດທາງລົດໄຟລາວ-ຈີນ ຈຳກັດ ໄດ້ຖືໂອກາດມອບເດີ່ນກິລາບານບ້ວງ “ເສັ້ນທາງແຫ່ງມິດຕະພາບ” ທີ່ໄດ້ສ້າງສໍາເລັດ ໃຫ້ແກ່ໂຮງຮຽນປະຖົມສົມບູນ ລາວ-ຈີນ ບ້ານໜອງປີງ.
ພິທີມອບ-ຮັບໄດ້ຈັດຂຶ້ນໃນຕອນບ່າຍຂອງວັນທີ 5 ມິຖຸນາ ທີ່ບ້ານໜອງປີງ ເມືອງຈັນທະບູລີ ນະຄອນຫຼວງວຽງຈັນ. ເປັນກຽດເຂົ້າຮ່ວມໂດຍ ທ່ານ ພຸດ ສິມມາ ລາວົງ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ທ່ານ ຫຼິວ ຫົງ ອຳນວຍການໃຫຍ່ ບໍລິສັດທາງລົດໄຟລາວ-ຈີນ ຈຳກັດ, ພ້ອມດ້ວຍບັນດາແຂກການນຳພາກລັດກໍໃຫ້ກຽດເຂົ້າຮ່ວມ.
ໃນພິທີ, ທ່ານ ຫຼິວ ຫົງ ຜູ້ອຳນວຍການໃຫຍ່ ບໍລິສັດທາງລົດໄຟລາວ-ຈີນ ຈຳກັດ ໄດ້ກ່າວຈຸດປະສົງວ່າ: ໃນໄລຍະຫຼາຍປີທີ່ຜ່ານມາ, ບໍລິສັດໄດ້ໃຫ້ຄວາມສຳຄັນ ແລະ ສະໜັບສະໜູນວຽກງານດ້ານການພັດທະນາ ການສຶກສາ ແລະ ໄດ້ມີການຈັດກິດຈະກຳລົງຮາກຖານ “ລົງບ້ານສູ່ໂຮງຮຽນ” ຢູ່ເປັນປະຈຳ. ທ່ານໄດ້ກ່າວຕື່ມວ່າ ໂຄງການມອບ-ຮັບເດີ່ນບານບ້ວງ ຜັນຂະຫຍາຍຕາມຄຳຂວັນ “ເສັ້ນທາງແຫ່ງມິດຕະພາບ” ລະຫວ່າງ ບໍລິສັດທາງລົດໄຟລາວ-ຈີນ ຈຳກັດ ແລະ ໂຮງຮຽນປະຖົມສົມບູນລາວ-ຈີນ ບ້ານໜອງປີງ ແມ່ນໜຶ່ງໃນບັນດາໂຄງການສຳຄັນໃນການຊ່ວຍເຫຼືອດ້ານການຮຽນການສອນ .ຫຼັງຈາກຜ່ານການກວດກາສະຖານທີ່, ການສ້າງວາງໂຄງສ້າງ ແລະ ດຳເນີນການຈັດຕັ້ງປະຕິບັດ ເຊິ່ງຢູ່ພາຍໃຕ້ການຄຸ້ມຄອງຈາກວິຊາການຢ່າງລະອຽດ, ໃສ່ໃຈດ້ານຄວາມປອດໄພ ແລະ ຄຸນນະພາບເປັນຫຼັກ ແລະ ຮັບປະກັນສາມາດສຳເລັດຕາມເວລາທີ່ກຳນົດ, ເພື່ອໃຫ້ຄູ-ອາຈານແລະນັກຮຽນ ມີສະພາບແວດລ້ອມການຮຽນການສອນທີ່ກວ້າງຂວາງ ແລະ ມີຄຸນນະພາບສູງຂຶ້ນ, ຍົກລະດັບຄຸນນະພາບການຫຼິ້ນກິລາ ເພື່ອໃຫ້ນ້ອງນັກຮຽນມີຮ່າງກາຍທີ່ແຂງແຮງ ແລະ ສ້າງຄວາມສາມັກຄີມ່ວນຊື່ນໃນໂຮງຮຽນ.
ພ້ອມດຽວກັນນັ້ນ, ບໍລິສັດທາງລົດໄຟລາວ-ຈີນ ຈຳກັດ ຍັງໄດ້ມອບອຸປະກອນໃຊ້ຕ່າງໆ ເປັນຕົ້ນ ເຄື່ອງຂຽນ, ພັດລົມ, ຄັນຮົ່ມ, ຫນ່ວຍບານບ້ວງ, ເບ້ຍໄມ້ ແລະ ໄດ້ຊ່ວຍແປງຕຶກອາຄານ ໃຫ້ໂຮງຮຽນຢູ່ລຽບຕາມແລວທາງລົດໄຟ ເພື່ອຍົກລະດັບສະພາບແວດລ້ອມການຮຽນ-ການສອນ ແລະ ຊີວິດການເປັນຢູ່ຂອງ ຄູ-ອາຈານ ແລະ ນັກຮຽນໃຫ້ສະດວກສະບາຍຍິ່ງຂຶ້ນ. ນອກນັ້ນ, ບໍລິສັດກຳລັງມີແຜນຈະດຳເນີນກິດຈະກຳ ຊ່ວຍເຫຼືອດ້ານການຮຽນ-ການສອນ ລະຫວ່າງບໍລິສັດກັບໂຮງຮຽນໃນຫຼາຍແຫ່ງ ແລະ ສົ່ງຜູ້ຊ່ຽວຊານດ້ານການລົດໄຟ ເປັນອາສາສະໝັກ ໃນການສິດສອນ ແລະ ຖ່າຍທອດຄວາມຮູ້ປະສົບການຕ່າງໆກ່ຽວກັບທາງລົດໄຟ ເຊັ່ນ: ວິທະຍາສາດ-ເຕັກນິກທາງລົດໄຟ, ວຽກງານດ້ານການຄຸ້ມຄອງດຳເນີນງານທາງລົດໄຟ, ດ້ານການບໍລິການ, ວຽກງານພື້ນຖານຄວາມປອດໄພ ແລະອື່ນໆ ໃຫ້ແກ່ບັນດາຄູ-ອາຈານ ແລະ ນັກຮຽນນັກສຶກສາ ຢູ່ທົ່ວປະເທດ.
ທ່ານ ພຸດ ສິມມະລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ສະແດງຄວາມຂອບໃຈ ແລະ ຮູ້ບຸນຄຸນ ຕໍ່ລັດຖະບານ ແລະ ປະຊາຊົນ ສປ ຈີນ ທີ່ໄດ້ປະກອບສ່ວນ ໃນການກໍ່ສ້າງໂຮງຮຽນປະຖົມສົມບູນ ລາວ-ຈີນ ໜອງປີງ ນຳໃຊ້ແຕ່ປີ 2012 ເປັນຕົ້ນມາ, ຕະຫຼອດໄລຍະດັ່ງກ່າວ ສປ ຈີນ ກໍໄດ້ສົ່ງຄູອາສາສະໝັກມາປະຈຳທີໂຮງຮຽນ ເພື່ອສິດສອນ ແລະ ສະໜອງອຸປະກອນຫຼາຍຢ່າງ. ເພິ່ນຍັງໄດ້ຕີລາຄາສູງຕໍ່ບໍລິສັດທາງລົດໄຟລາວ-ຈີນ ທີ່ໄດ້ສະຫຼະທຶນຮອນ ເພື່ອສ້າງພື້ນຖານໂຄງລ່າງດ້ານກິລາ ແລະ ອຸປະກອນການສຶກສາໃຫ້ແກ່ໂຮງຮຽນແຫ່ງນີ້ ເຊິ່ງໄດ້ສ່ອງແສງ ແລະ ຢັ້ງຢືນຄືນເຖິງຄວາມໝາຍໝັ້ນຂອງບໍລິສັດທາງລົດໄຟລາວ-ຈີນ ຕໍ່ວຽກງານການສຶກສາ ກໍຄືວຽກງານພັດທະນາຊັບພະຍາກອນມະນຸດ ຢູ່ ສປປ ລາວ.
ທາງລົດໄຟລາວ-ຈີນ ໄດ້ເປີດດຳເນີນການແຕ່ວັນທີ 3 ທັນວາ 2021 ໄດ້ກາຍເປັນການປະກອບສ່ວນເຮັດໃຫ້ໂຄງການ “ໜຶ່ງແລວໜຶ່ງເສັ້ນທາງ” ໄດ້ນຳເອົາຜົນປະໂຫຍດຕົວຈິງ ມາສູ່ ສປປ ລາວ ແລະ ສປ ຈີນ. ຄູອາຈານ ແລະ ນັກຮຽນຂອງໂຮງຮຽນໜອງປີງ ກໍໄດ້ເປັນສັກຂີພິຍານຕໍ່ “ເສັ້ນທາງແຫ່ງມິດຕະພາບ” ນີ້ ໂດຍໄດ້ຮ່ວມໃນພິທີີສຳຄັນຕ່າງໆຂອງທາງລົດໄຟ. ການປະກອບສ່ວນຂອງບໍລິສັດທາງລົດ ໄຟລາວ-ຈີນ ແມ່ນມີຄວາມໝາຍສຳຄັນຫຼາຍ, ເປັນຂົວເຊື່ອມຕໍ່ສາຍພົວພັນທາງດ້ານຈິດໃຈ, ສົ່ງເສີມການໄປມາຫາສູ່ກັນລະຫວ່າງປະຊາຊົນສອງຊາດລາວ-ຈີນ, ສືບຕໍ່ພົວພັນສ້າງມິດຕະພາບທີ່ດີຕໍ່ກັນລະຫວ່າງສອງຊາດລາວ-ຈີນ ຈາກຮຸ່ນຄົນນີ້ສູ່ຮຸ່ນຄົນຕໍ່ໄປ, ດັ່ງນັ້ນ ຈິ່ງຂໍຮຽກຮ້ອງໃຫ້ຜູ້ບໍລິຫານໂຮງຮຽນ, ຄູອາຈານ ແລະ ນ້ອງນັກຮຽນນັກສຶກສາ ຈົ່ງນຳໃຊ້ພື້ນຖານໂຄງລ່າງ ແລະ ອຸປະກອນທີ່ບໍລິສັດມອບໃຫ້ ໃຫ້ເກີດປະໂຫຍດສູງສຸດ. ພ້ອມນັ້ນ, ກໍຫວັງຢ່າງຍິ່ງວ່າ ບໍລິສັດທາງລົດໄຟລາວ-ຈີນ ຈະສືບຕໍ່ຊ່ວຍເຫຼືອສັງຄົມໃນຮູບແບບຕ່າງໆ.
ບໍລິສັດທາງລົດໄຟລາວ-ຈີນ ຈຳກັດ ໄດ້ມອບອຸປະກອນເຄື່ອງໃຊ້ ໃຫ້ແກ່ໂຮງຮຽນປະຖົມສົມບູນ ລາວ-ຈີນ ບ້ານໜອງປີງ ປະກອບມີ: ກະເປົາເປ້ຈຳນວນ 300 ໜ່ວຍ, ປຶ້ມຂຽນ 300 ຫົວ, ພ້ອມດ້ວຍເຄື່ອງກອງນ້ຳ, ໜ່ວຍບານບ້ວງ, ເຄື່ອງໃສ່ຂີ້ເຫຍື້ອສະແຕນເລດ, ເບ້ຍໄມ້ ແລະອື່ນໆ. ທາງບໍລິສັດກໍຍັງໄດ້ດຳເນີນກິດຈະກຳ ມອບອຸປະກອນການຮຽນຕ່າງໆ ເຊັ່ນ: ກະເປົາເປ້, ປື້ມຂຽນ, ກະເປົາຜ້າ, ເຕົ້ານ້ຳ ແລະ ເຄື່ອງໃຊ້ອື່ນໆ ໃຫ້ແກ່ຄູອາຈານ ແລະ ນັກຮຽນນັກສຶກສາແຕ່ລະໂຮງຮຽນ ຈຳນວນ 7 ແຫ່ງ ເຊິ່ງມີແຂວງ ຫຼວງພະບາງ, ເມືອງງາແຂວງ ອຸດົມໄຊ, ເມືອງນາເຕີຍ ແຂວງຫຼວງນໍ້າທາ ແລະ ສະຖານທີ່ອື່ນໆທີ່ຢູ່ລຽບຕາມເສັ້ນທາງລົດໄຟລາວ-ຈີນ.
ກິດຈະກຳດັ່ງກ່າວນີ້ ແມ່ນນຳພາໂດຍຄະນະນຳຂອງບໍລິສັດ ເຊິ່ງໄດ້ເດີນທາງໃນໄລຍະ 670 ກວ່າກິໂລແມັດ ເພື່ອໄປແຕ່ລະສະຖານທີ່, ພ້ອມທັງເປັນການເຜີຍແຜ່ຄວາມຮູ້ດ້ານຄວາມປອດໄພທາງລົດໄຟ ເພື່ອເປັນການປູກຝັງຄວາມຮູ້ແຕ່ຂັ້ນພື້ນຖານ ໃຫ້ແກ່ບັນດານ້ອງນັກຮຽນໃນທ້ອງຖິ່ນ ອັນໄດ້ຮັບການຕ້ອນຮັບເປັນຢ່າງດີ ຈາກບັນດາອົງການຈັດຕັ້ງທ້ອງຖິ່ນ ເນື່ອງຈາກສາມາດສ້າງປະໂຫຍດທີ່ດີໃນອີກຮູບແບບຫນຶ່ງ ໃຫ້ແກ່ສັງຄົມບໍ່ໜ້ອຍກໍຫຼາຍ.
