ວັນທີ 24 ພຶດສະພານີ້, ບໍລິສັດທາງລົດໄຟລາວ-ຈີນ ຈຳກັດ ແລະມູນນິທິຊ່ວຍເຫຼືອເຊິ່ງກັນແລະກັນ (GX FOUNDATION) ຮ່ວມກັນລົງນາມໃນບົດບັນທຶກການຮ່ວມມືວ່າດ້ວຍ “ ໂຄງການສະກັດກັ້ນ-ຕ້ານພະຍາດໄຂ້ເລືອດອອກ ແລະ ພະຍາດທີ່ເກີດຈາກແມງໄມ້ເປັນພາຫະນະນຳເຊື້ອຕາມແລວທາງລົດໄຟລາວ-ຈີນ ”. ເປັນກຽດເຂົ້າຮ່ວມໂດຍ ທ່ານ Leung Chun-ying ຮອງປະທານສະພາທີ່ປຶກສາການເມືອງປະຊາຊົນທົ່ວປະເທດຈີນ ທັງເປັນປະທານມູນນິທິຊ່ວຍເຫຼືອເຊິ່ງກັນແລະກັນ, ທ່ານ ຫວາງ ຊາງ ອຸປະທູດ ສະຖານເອອັກຄະລັດຖະທູດ ສປ ຈີນ ປະຈຳ ສປປ ລາວ, ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ແລະ ທ່ານ ຫຼິວ ຫົງ ຜູ້ອຳນວຍການໃຫຍ່ ບໍລິສັດ ທາງລົດໄຟລາວ-ຈີນ ເຂົ້າຮ່ວມພິທີລົງນາມໃນຄັ້ງນີ້.
ທ່ານ Leung Chun-ying ຮອງປະທານສະພາທີ່ປຶກສາການເມືອງປະຊາຊົນທົ່ວປະເທດຈີນ, ປະທານມູນນິທິຊ່ວຍເຫຼືອເຊິ່ງກັນແລະກັນ ໄດ້ກ່າວວ່າ: ທາງມູນນິທິຈະມອບໂຄມໄຟກຳຈັດຍຸງ 360 ໜ່ວຍ ໃຫ້ແກ່ສະຖານີຕ່າງໆຕາມເສັ້ນທາງລົດໄຟລາວ-ຈີນ ເພື່ອປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໄຂ້ເລືອດອອກຢູ່ຕາມເສັ້ນທາງລົດໄຟລາວ-ຈີນ.
ທ່ານ ຫວາງ ຊາງ ອຸປະທູດ ສະຖານເອອັກຄະລັດຖະທູດ ສປ ຈີນ ປະຈຳ ສປປ ລາວ ກໍໄດ້ກ່າວຄໍາເຫັນໃນພິທີວ່າ: ພະຍາດໄຂ້ເລືອດອອກ ເປັນພະຍາດຕິດຕໍ່ທີ່ແຜ່ເຊື້ອໄດ້ໄວ, ເປັນໄພຂົ່ມຂູ່ທີ່ອັນຕະລາຍຕໍ່ຊີວິດ ແລະ ສຸຂະພາບຂອງປະຊາຊົນລາວມາແຕ່ດົນນານ. ການເຂົ້າມາຢ້ຽມຢາມ ສປປ ລາວຂອງມູນນິທິ ພາຍໃຕ້ “ໂຄງການສະກັດກັ້ນ-ຕ້ານພະຍາດໄຂ້ເລືອດອອກ ແລະ ພະຍາດທີ່ເກີດຈາກແມງໄມ້ເປັນພາຫະນະນຳເຊື້ອ”ໃນຄັ້ງນີ້ ແມ່ນຖືເປັນມາດຕະການສຳຄັນ ເພື່ອປະຕິບັດຕາມຄວາມເຫັນດີເຫັນພ້ອມຂອງການນຳສອງພັກສອງປະເທດລາວ-ຈີນ ເພື່ອຊ່ວຍຍົກລະດັບວຽກງານດ້ານສາທາລະນະສຸກລຽບຕາມເສັ້ນທາງລົດໄຟລາວ-ຈີນ ແລະ ເພື່ອສຸຂະພາບທີ່ດີຂອງປະຊາຊົນລາວ, ນອກນັ້ນ ກໍຍັງຈະຊ່ວຍພັດທະນາດ້ານການຄຸ້ມຄອງວຽກງານສາທາລະນະ ສຸກຂອງ ສປປ ລາວ, ເພີ່ມທະວີການພົວພັນມິດຕະພາບລະຫວ່າງປະຊາຊົນລາວ-ຈີນໃຫ້ແຫນ້ນແຟ້ນຍິ່ງຂຶ້ນ ແລະ ຊຸກຍູ້ການ ສ້າງຄູ່ຮ່ວມຊະຕາກຳລາວ-ຈີນ ໃຫ້ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ.
ໃນໂອກາດດຽວກັນ ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ກໍໄດ້ກ່າວສະແດງຄວາມຂອບໃຈ ແລະມີຄຳເຫັນຕໍ່ກັບໂຄງການນີ້ວ່າ: ແຕ່ລະປີຢູ່ ສປປ ລາວ ມີຈຳນວນກໍລະນີເຈັບເປັນ ແລະ ເສຍຊີວິດຍ້ອນພະຍາດໄຂ້ຍຸງລາຍເປັນຈຳນວນຫຼວງຫຼາຍ ແລະ ໃນທຸກໆ 03-04 ປີຈະມີການລະບາດຂະໜາດໃຫຍ່ເກີດຂຶ້ນ ເຊິ່ງພວກເຮົາກໍໄດ້ນຳໃຊ້ຫຼາຍວິທີໃນການທຳລາຍແຫຼ່ງເພາະພັນຂອງຍຸງ ທີ່ເປັນພາຫະນະນຳເຊື້ອຂອງພະຍາດໄຂ້ຍຸງລາຍ, ເປັນຕົ້ນແມ່ນການປຸກລະດົມປະຊາຊົນ ໃຫ້ອະນາໄມບໍລິເວນບ້ານເຮືອນບໍ່ໃຫ້ມີນໍ້າຂັງທີ່ຈະເປັນແຫຼ່ງເພາະພັນຂອງຍຸງ, ລ້ຽງປາຫາງນົກຍຸງ, ປ່ອຍຍຸງ Wolbachia ແລະ ວິທີອື່ນໆ. ເຖີງຢ່າງໃດກໍ່ຕາມພະຍາດໄຂ້ຍຸງ ລາຍກໍຍັງມີການລະບາດເປັນແຕ່ລະໄລຍະ.
ສະນັ້ນ ການຮ່ວມມືໃນຄັ້ງນີ້ ຈຶ່ງມີຄວາມໝາຍຄວາມສຳຄັນເພື່ອເຊື່ອມຈອດ ລະຫວ່າງປະຊາຊົນສອງຊາດລາວ-ຈີນ ພາຍໃຕ້ຂໍ້ລິເລີ່ມ ໜຶ່ງແລວໜຶ່ງເສັ້ນທາງ ໃຫ້ມີການຜັນຂະຫຍາຍ ແລະປະກົດຜົນເປັນຈິງ ເຊິ່ງໄລຍະຜ່ານມາມູນນິທິຊ່ວຍເຫຼືອເຊິ່ງກັນ ແລະກັນ (GX FOUNDATION) ໄດ້ຮ່ວມມືກັບກະຊວງສາທາລະນະສຸກໃນການຊ່ວຍເຫຼືອການຜ່າຕັດແກ່ນຕາຂຸ້ນ ທີ່ໄດ້ຮັບໝາກຜົນເປັນຢ່າງດີ. ໃນຄັ້ງນີ້ກໍແມ່ນການຮ່ວມມືເພື່ອຄວບຄຸມການລະບາດຂອງພະຍາດໄຂ້ຍຸງລາຍ ໂດຍການນຳໃຊ້ນະວັດຕະກຳໃໝ່ໃນການກຳຈັດຍຸງທີ່ເປັນພາຫະນະນຳເຊື້ອຂອງພະຍາດໄຂ້ຍຸງ ລາຍຢູ່ຕາມແລວທາງລົດໄຟລາວ-ຈີນ ເຊິ່ງຈະເຮັດໃຫ້ປະຊາຊົນທີ່ອາໄສຢູ່ບໍລິເວນດັ່ງກ່າວ ແລະ ຜູ້ທີ່ມາໃຊ້ບໍລິການລົດໄຟລາວ-ຈີນ ມີຄວາມປອດໄພຈາກພະຍາດໄຂ້ຍຸງລາຍຂຶ້ນຕື່ມ.
ບໍລິສັດ ທາງລົດໄຟ ລາວ-ຈີນ ຈຳກັດ ຈະຕັ້ງຫນ້າທຸ່ມເຮື່ອເທແຮງປະກອບສ່ວນເຂົ້າໃນວຽກງານດ້ານສາທາລະນະສຸກໃນສັງຄົມລາວ ແລະ ວຽກງານສາທາລະນະປະໂຫຍດທີ່ເປັນສ່ວນລວມອື່ນໆ. ການລົງນາມໃນບົດບັນທຶກການຮ່ວມມືກັບມູນນິທິຊ່ວຍເຫຼືອເຊິ່ງກັນແລະກັນໃນຄັ້ງນີ້ ຈະຊ່ວຍສະກັດກັ້ນ-ຕ້ານພະຍາດໄຂ້ເລືອດອອກ ແລະ ທໍາລາຍແຫຼ່ງເພາະພັນຂອງຍຸງໄດ້ຢ່າງມີປະສິດທິພາບຕາມແລວທາງລົດໄຟລາວ-ຈີນ, ເພີ່ມທະວີການປ້ອງກັນເພື່ອຮັບປະກັນພະນັກງານແລະຜູ້ໂດຍສານທຸກຄົນຈະມີສຸຂະພາບທີ່ດີ ແລະປາສະຈາກພະຍາດໄຂ້ເລືອດອອກ.
ນອກຈາກໂຄງການສະກັດກັ້ນ-ຕ້ານພະຍາດທີ່ເກີດຈາກແມງໄມ້ເປັນພາຫະນະນຳເຊື້ອແລ້ວ, ບໍລິສັດທາງລົດໄຟລາວ-ຈີນ ຈຳກັດ ແລະ ມູນນິທິຊ່ວຍເຫຼືອເຊິ່ງກັນແລະກັນ ຍັງໄດ້ຮ່ວມມືກັນໃນໂຄງການທີ່ສ້າງສາທາລະນະປະໂຫຍດໃຫ້ແກ່ປະຊາຊົນລາວ ເຊັ່ນ: ໂຄງການ “ລົບລ້າງແກ່ນຕາຂຸ້ນ”. ປະຈຸບັນ,ມູນນິທິດັ່ງກ່າວໄດ້ໃຫ້ການຜ່າຕັດແກ່ນຕາຂຸ້ນໂດຍບໍ່ເສຍຄ່າໃຫ້ແກ່ຄົນເຈັບໃນລາວແລ້ວ 3,500 ກວ່າຄົນ, ໃນອະນາຄົດ ໂຄງການດັ່ງກ່າວນີ້ຈະຍັງສືບຕໍ່ສ້າງສາຜົນປະໂຫຍດໃຫ້ແກ່ຄົນເຈັບຢູ່ໃນລາວ ໃຫ້ສາມາດເຂົ້າຮ່ວມການຮັກສາໄດ້ຢ່າງສະດວກບໍ່ວ່າຈະຢູ່ໃນຂົງເຂດໃດ ໂດຍຈະຍັງຂະຫຍາຍໂຄງການຊ່ວຍເຫຼືອໄປທາງພາກໃຕ້ຂອງລາວ ເພື່ອໃຫ້ທົ່ວເຖິງຄົນເຈັບທີ່ຢູ່ຫ່າງໄກທົ່ວທຸກແຂວງໃນລາວ ໃຫ້ໄດ້ຮັບການຮັກສາທີ່ດີ ແລະມີຄຸນນະພາບຍິ່ງຂຶ້ນກວ່າເກົ່າ.
ທີ່ມາ: ບໍລິສັດ ລົດໄຟ ລາວ-ຈີນ ຈໍາກັດ
