ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ບໍລິສັດບົວລະພາກະສິກຳປ່າໄມ້ຈຳກັດ ກະກຽມເບັ້ຍໄມ້ 1,750,000 ເບັ້ຍ ເພື່ອວັນປູກຕົ້ນໄມ້ແຫ່ງຊາດປີນີ້

ປັດຈຸບັນ, ບໍລິສັດບົວລະພາກະສິກໍາປ່າໄມ້ຈໍາກັດ ໄດ້ກະກຽມເບ້ຍໄມ້ໄດ້ທັງໝົດ 1 ລ້ານ 7 ແສນ 5 ໝື່ນເບ້ຍແລ້ວ ເພື່ອຮັບໃຊ້ພິທີສະເຫລີມສະຫລອງວັນປູກຕົ້ນໄມ້ແຫ່ງຊາດ, ວັນທີ 1 ມິຖຸນາທີ່ຈະມາເຖິງ. ຄາດວ່າປີນີ້, ຈະປູກໃຫ້ໄດ້ ຈໍານວນ 1 ລ້ານ 3 ແສນເບ້ຍ, ໂດຍໃນເບື້ອງຕົ້ນ ແມ່ນໄດ້ນຳໄປປູກແລ້ວ 5 ແສນກວ່າເບ້ຍ.
ສຳລັບປີນີ້, ວຽກກະກຽມດິນຈະອ່າວຫລ້າຊ້າ, ເນື່ອງຈາກທາງບໍລິສັດໄດ້ຮັບເນື້ອທີ່ດິນມາຊັກຊ້າ, ຊຶ່ງຄາດວ່າພາຍໃນເດືອນມິຖຸນານໜ້ານີ້ ຈະເລີ່ມລົງມືປູກຮ່ວມກັບປະຊາຊົນໃນເນື້ອທີ່ 200 ຫາ 300 ເຮັກຕາ.
ພິເສດປີນີ້, ບໍລິສັດບົວລະພາກະສິກໍາປ່າໄມ້ຈຳກັດ ໄດ້ຮັບການອະນຸມັດຈາກລັດຖະບານໃຫ້ປູກຕົ້ນໄມ້ໃສ່ເນື້ອທີ່ປ່າຜະລິດທີ່ຊຸດໂຊມປະມານ 2 ພັນເຮັກຕາຢູ່ບາງເມືອງຂອງແຂວງວຽງຈັນຄື: ເມືອງໝື່ນ, ເມືອງຊະນະຄາມ ແລະ ເມືອງເຟືອງ.
ມາຮອດຕອນນີ້, ທາງບໍລິສັດກໍາລັງຂຸ້ນຂ້ຽວປັບແລວດິນເພື່ອກຽມບຸກເບີກ, ໂດຍເນັ້ນໃສ່ປູກຕົ້ນໄມ້ປະເພດ ອຸດສາຫະກໍາເຊັ່ນ: ຕົ້ນຢູຄະລິດຕັສ, ກະຖິນນາໂລງ ແລະ ອື່ນໆອີກ.
ທ່ານນາງ ສຸໄພວັນ ທ່ຽງຈັນໄຊ, ຮອງຜູ້ອໍານວຍການບໍລິສັດບົວລະພາກະສິກໍາປ່າໄມ້ຈໍາກັດ ໃຫ້ສໍາພາດວ່າ: ພິເສດປີນີ້, ທາງບໍລິສັດໄດ້ມີເບ້ຍໄມ້ຈໍານວນໜຶ່ງໄວ້ໃຫ້ປະຊາຊົນ, ຖ້າຫາກປະຊາຊົນມີດິນກໍາລັງປູກເຂົ້າໃສ່ ຕ້ອງການໃຫ້ບໍລິສັດເຊົ່າ ຫລື ວ່າມີສ່ວນຮ່ວມນໍາແບບ 1 ບວກ 4 ຫລື ຕ້ອງການຢາກປູກເອງ, ແມ່ນສາມາດເຮັດໃບສະເໜີມາຫາທາງບໍລິສັດໄດ້ ພ້ອມທີ່ຈະສະໜອງເບ້ຍໄມ້ໃຫ້ລ້າໆ ພ້ອມທັງຝຸ່ນ ແລະ ປຸຍ ລວມທັງ ຈະຊ່ວຍແນະນໍາເຕັກນິກວິຊາການໃຫ້ພ້ອມ. ໃນໄລຍະຜ່ານມາ, ມີປະຊາຊົນບ້ານທີ່ເຂົ້າຮ່ວມປູກໄມ້ນໍາທາງບໍລິສັດແລ້ວປະມານ 100 ກວ່າບ້ານໃນຈໍານວນ 4 ແຂວງຄື: ນະຄອນ ຫລວງວຽງຈັນ, ແຂວງວຽງຈັນ, ໄຊຍະບູລີ ແລະ ແຂວງໄຊສົມບູນ; ສ່ວນການປູກໄມ້ຂອງບໍລິສັດຜ່ານມາ, ແມ່ນເນັ້ນໃສ່ປູກຕາມປ່າເຫລົ່າ ຫລື ດິນທີ່່ປະຊາຊົນເຮັດໄຮ່ແລ້ວບໍ່ໄດ້ຜົນຜະລິດດີເປັນສ່ວນໃຫຍ່.
ທ່ານຮອງຜູ້ອໍານວຍການບໍລິສັດບົວລະພາກະສິກໍາປ່າໄມ້ຈໍາກັດໃຫ້ຮູ້ຕື່ມວ່າ: ທາງບໍລິສັດຍັງຈະສຸມໃສ່ປູກໄມ້ໃນເນື້ອທີ່ດິນທາງລັດຖະບານມອບໃຫ້ທົດລອງປູກຈໍານວນ 2 ພັນເຮັກຕາ ເພື່ອໃຫ້ປະກົດຜົນເປັນຈິງ ຕາມນະໂຍບາຍຂອງລັດຖະບານ, ເພື່ອແນ່ໃສ່ເຮັດໃຫ້ເນື້ອທີ່ປົກຫຸ້ມຂອງປ່າໄມ້ ກວມ 70 ສ່ວນຮ້ອຍຂອງເນື້ອທີ່ທົ່ວປະເທດພາຍໃນປີ 2020 ຊຶ່ງພາຍຫລັງປູກໄມ້ວິກແລ້ວທາງບໍລິສັດກໍ່ຈະປູກໄມ້ທໍາມະຊາດທົດແທນໃຫ້ອີກເຊັ່ນ: ໄມ້ດູ່, ແຕ່ຂ່າ, ກະຖິນນາໂລງ ແລະ ໄມ້ອື່ນໆ.
ສຳລັບໄລຍະຊຸມປີຕໍ່ໜ້າ, ທາງບໍລິສັດບົວລະພາກະສິກໍາປ່າໄມ້ຈຳກັດ ມີແຜນຈະກໍ່ສ້າງໂຮງງານໄມ້ອັດເປັນໂຮງງານແຫ່ງທີ່ 2 ຢູ່ເມືອງຫີນເຫີບແຂວງວຽງຈັນ, ໂດຍຈະຜະລິດໄມ້ວິກອອກມາເປັນຜ້າແພ ແລະ ເຫຍື່ອໄມ້ຜະລິດເປັນຢາງພລາສຕິກ ແລະ ອື່ນໆ.

  

ໃນໄລຍະຜ່ານມາ, ທາງບໍລິສັດບົວລາພາກະສິກໍາປ່າໄມ້ຈໍາກັດ ໄດ້ຮັບຜົນສໍາເລັດພໍສົມຄວນໃນການປູກໄມ້ເພື່ອສົ່ງອອກ ເນື່ອງຈາກວ່າ ໄມ້ທີ່ຜະລິດໄດ້ແມ່ນນໍາເຂົ້າໄປປ້ອນໂຮງງານໄມ້ແປຮູບ ເພື່ອສົ່ງອອກປີໜຶ່ງບໍ່ຫລຸດ 25 ຫາ 30 ແມັດກ້ອນ, ໂດຍສາມາດສ້າງລາຍຮັບໃຫ້ປະຊາຊົນທ້ອງຖິ່ນທີ່ເຂົ້າຮ່ວມປູກໄມ້ນໍາທາງບໍລິສັດ ໄດ້ຫລາຍພໍສົມຄວນ, ໂດຍສະເພາະແມ່ນປະຊາຊົນຢູ່ເມືອງຫີນເຫີບ, ແຂວງວຽງຈັນ.

ຂ່າວ;ພາບ: ບຸນຍັງ ພຸດສະຫວັດ