ໃນໂອກາດຂຶ້ນຊີ້ແຈງຕໍ່ຄໍາຊັກຖາມຂອງສະມາຊິກສະພາແຫ່ງຊາດ ຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 13 ມິຖຸນາ 2024 ນີ້ ທ່ານ ງາມປະສົງ ເມືອງມະນີ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ (ຍທຂ) ໄດ້ຍົກໃຫ້ເຫັນກ່ຽວກັບການປະກອບສ່ວນໃນການສ້ອມແປງເສັ້ນທາງ ຂອງຜູ້ປະກອບການຂົນສົ່ງແຮ່ທາດ ວ່າ: ນັບແຕ່ປີ 2021 ເປັນຕົົ້ນມາ, ກະຊວງ ຍທຂ ໄດ້ປະສານສົມທົບກັບ ພະແນກ ຍທຂ ແຂວງ ໄດ້ເຊີນເອົາບໍລິສັດຜູ້ປະກອບການຂົນສົ່ງແຮ່ທາດ ເພື່ອປຶກສາຫາລືເຊັນບົດບັນທຶກມອບຄວາມຮັບຜິດຊອບ ໃນການບູລະນະຮັກສາ ແລະ ສ້ອມແປງເສັ້ນທາງ ເພື່ອໃຫ້ຜູ້ປະກອບການສາມາດບັນທຸກນໍ້າໜັກໄດ້ຫຼາຍຂຶ້ນຈາກ 9,1 ໂຕນ/ເພົາ ເປັນ 11 ໂຕນ/ເພົາ. ໃນນັ້ນ, ລວມມີ: ບໍລິສັດ ພອນສັກຈໍາກັດ, ບໍລິສັດ ລາວຢູຄູນເຫຼັກກ້າບໍ່ແຮ່ ຈໍາກັດ ແລະ ບໍລິສັດ ລາວຮຸຍຫົງບໍ່ແຮ່ ຈໍາກັດ, ບໍລິສັດ ວັງຕັດຂຸດຄົ້ນແຮ່ ຈໍາກັດ ໃນການບູລະນະຮັກສາ ແລະ ສ້ອມແປງເສັ້ນທາງ.
ລັດຖະມົນຕີກະຊວງ ຍທຂ ໃຫ້ຮູ້ຕື່ມວ່າ: ຜ່ານການຈັດຕັ້ງປະຕິບັດຕົວຈິງເຫັນວ່າ ຜູ້ປະກອບການຂົນສົ່ງແຮ່ທາດ ໄດ້ມີຄວາມເອົາໃຈໃສ່ໃນການສ້ອມແປງເສັ້ນທາງ, ແຕ່ຂະນະດຽວກັນ ມີບໍລິສັດຈໍານວນໜຶ່ງຍັງຂາດຄວາມຮັບຜິດຊອບ ຊຶ່ງທາງກະຊວງ ກໍຄື ພາກສ່ວນກ່ຽວຂ້ອງ ຈະສືບຕໍ່ຮ່ວມເຮັດວຽກກັບທ້ອງຖິ່ນ ແລະ ບັນດາບໍລິສັດທີ່່ປະກອບການຂົນສົ່ງແຮ່ທາດ ມາເຊັນສັນຍາມອບຄວາມຮັບຜິດຊອບໃນການບູລະນະຮັກສາ ແລະ ສ້ອມແປງເສັ້ນທາງ.
