ວັນທີ 12 ທັນວາ 2020 ນີ້ ທາງທີມງານ ບໍລິສັດພະລັງງານບົວສະຫວັນ ຮ່ວມກັບ ອະດີດນັກສຶກສາ ອຸດົມຟ້າງຸ່ມ  ສົກປີ 1983 ໄດ້ມອບອຸປະກອນ ການຮຽນ ການສອນ ໃຫ້ໂຮງຮຽນ 9 ແຫ່ງ ທີ່ຢູ່ເຂດຫ່າງໄກຊອກຫລີກ ເມືອງເງິນ ແຂວງ ໄຊຍະບູລີ  ລວມມູນຄ່າ 74.000.000 ກີບ.

ເຄື່ອງທີ່ນຳມາມອບໃນຄັ້ງນີ້: ມີອຸປະກອນການຮຽນ-ການສອນ, ອຸປະກອນ ກິລາ ເຄື່ອງນຸ່ງຫົ່ມ ເສື້ອກັນໜາວ, ເຄື່ອງບໍລິໂພກອີກຈຳນວນໜຶ່ງເປັນ ແລະ ເຄື່ອງໃຊ້ອື່ນໆ . ລວມມູນຄ່າ 74 ລ້ານກີບ. ເພື່ອນຳໄປມອບໃຫ້ນັກຮຽນທີ່ຢູ່ເຂດຫ່າງໄກຊອກຫລີກ  ຈຳນວນ  9 ໂຮງຮຽນຄື: ໂຮງຮຽນ ປະຖົມສົມບູນ ປຸ່ງຝາດ, ປະຖົມຫ້ວຍເຜີ້ງ, ປະຖົມຜາແດງ, ປະຖົມປາກແຄນ, ປະຖົມນ້ຳເງິນ, ໂຮງຮຽນມໍຕົ້ນດອກເຜີ້ງ, ມໍຕົ້ນສາມັກຄີໄຊ, ໂຮງຮຽນມັດທະຍົມສົມບູນສິນໄຊ ແລະ ໂຮງຮຽນມັດທະຍົມສົມບູນບ້ານທອງ ລວມທັງໝົດ 1.560 ນ້ອງ, ຍິງ 732 ນ້ອງ.

ທ່ານ ບາແກ້ວ ລາດຊະວົງ ຕາງໜ້າທີມງານ ບໍລິສັດ ພະລັງງານ ບົວສະຫວັນ ແລະ ອາດີດນັກສຶກສາ ອຸດົມຟ້າງຸ່ມ  ສົກປີ 1983 ໃຫ້ຮູ້ຕື່ມວ່າ ເຄື່ອງດັ່ງກ່າວ ແມ່ນໄດ້ລະດົມທຶນນຳ ທີມງານທາງບໍລິສັດ ພະລັງງານ ບົວສະຫວັນແຕ່ລະສາຂາ ແລະ  ອະດີດນັກສຶກສາ ອຸດົມຟ້າງຸ່ມ  ສົກປີ 1983 ເພື່ອນຳໄປຊື້ ອຸປະກອນການຮຽນ-ການສອນ, ອຸປະກອນ ກິລາ ເຄື່ອງນຸ່ງຫົ່ມ ແລະ ເສື້ອກັນໜາວ  ເພື່ອເປັນການແບ່ງປັນນໍ້າໃຈໃຫ້ນ້ອງໆນັກຮຽນ ທີ່ຢູ່ເຂດຫ່າງໄກຊອກຫລີກ ເພື່ອແນໃສ່ເຮັດໃຫ້ເຂົ້າເຈົ້າມີຄວາມບຸກບືນຫ້າວຫັນ ຕໍ່ການຮໍ່າຮຽນ ທັງເປັນການຊ່ວຍແບ່ງເບົາການໃຊ້ຈ່າຍໃນຄອບຄົວ.

ຈາກນັ້ນ ທີມງານ ບໍລິສັດພະລັງງານບົວສະຫວັນ ຮ່ວມກັບ ອະດີດນັກສຶກສາ ອຸດົມຟ້າງຸ່ມ  ສົກປີ 1983 ກໍ່ໄດ້ມອບເງິນສົດ ໃຫ້ກອງທຶນ ໄພພິບັດ ເມືອງເງິນ  ຈຳນວນ 26.000.000 ກີບ. ໂດຍຊ້ອງໜ້າພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຄີພະຍານ.

  

ຂ່າວ: ອິນແປງ ແຫວນຄຳ

Loading...