ບໍລິສັດພູເບ້ຍ ມາຍນິ້ງ ປະກອບສ່ວນສໍາຄັນໃນການສ້າງວຽກເຮັດງານທໍາໃຫ້ແຮງງານລາວ, ລວມເຖີງການສ້າງລາຍໄດ້ໃຫ້ປະຊາຊົນທີ່ຢູ່ເຂດໃກ້ຄຽງ ເຮັດໃຫ້ຊີວິດການເປັນຢູ່ຂອງແຂວງເຈົ້າໄດ້ຮັບການປັບປຸງດີຂຶ້ນຢ່າງຕໍ່ເນື່ອງ.
ອີງຕາມຂໍ້ມູນທີ່ສະເໜີໃຫ້ຮູ້ໃນໂອກາດທີ່ ຕາງໜ້າບໍລິສັດພູເບ້ຍ ມາຍນິ່ງ ພົບ ປະກັບສື່ມວນຊົນຢູ່ສໍານັກງານໃຫຍ່ຂອງບໍລິ ສັດດັ່ງກ່າວ ທີ່ນະຄອນຫລວງວຽງຈັນ ໃນວັນທີ 15 ມີນາ 2024 ນີ້ ໃຫ້ຮູ້ວ່າ: ປັດຈຸບັນ ບໍລິສັດ ພູເບ້ຍ ມາຍນິ້ງ ມີພະນັກ ງານທັງໝົດ 3.900 ຄົນ. ນອກຈາກນີ້ ຍັງມີບໍລິສັດທີ່ເປັນຜູ້ ຮັບເໝົາທັງພາຍໃນ ແລະ ຕ່າງປະເທດ ມີພະນັກງານລວມກັນປະມານ 1.000 ຄົນ, ໃນນີ້ ສະເພາະພະນັກ ງານຢູ່ບໍລິສັດ ພູເບ້ຍ ມາຍນິ້ງ 93% ແມ່ນແຮງງານລາວ ເຊິ່ງສ່ວນໃຫຍ່ແມ່ນກຸ່ມຊົນ ເຜົ່າໃນເຂດທ້ອງຖິ່ນທີ່ຢູ່ໃກ້ຄຽງຂອງໂຄງການ, ສ່ວນພະນັກງານຕ່າງປະເທດ ແມ່ນມີໜ້ອຍ ແລະ ຢູ່ໃນຕໍາແໜ່ງວິຊາການທີ່ບໍ່ທັນມີພະນັກງານທີ່ມີທັກສະນັ້ນຢູ່ ໃນລາວ, ໃນນັ້ນ ມີແມ່ຍິງກວມເອົາ 21% ຂອງພະນັກງານພາຍໃນບໍລິສັດທັງໝົດ.
ນອກຈາກນີ້ ຕະຫລອດໄລຍະ 11 ປີ ບໍລິສັດ ໄດ້ຮ່ວມມືກັບວິທະຍາໄລເຕັກນິກລາວ-ເຢຍລະມັນ ເພື່ອຈັດຕັ້ງປະຕິບັດໂຄງ ການສ້າງສີມືແຮງງານ ໃນ 5 ວິຊາ ຄື: ກົນຈັກໜັກ, ສ້ອມແປງ ແລະ ບໍາລຸງຮັກສາ, ໄຟຟ້າ, ໄຟຟ້າລົດຍົນ ແລະ ເຊື່ອມຈອດ ຫລັງ ຈາກຮຽນຈົບກໍສາມາດສອບເສັງເພື່ອເຂົ້າແຮດວຽກນໍາບໍລິສັດ ພູເບ້ຍ ມາຍນິ້ງ ຕາມຕໍາແໜ່ງງານ ແລະ ຈໍານວນທີ່ບໍລິ ສັດຕ້ອງການ.
ຄຽງຄູ່ກັນນີ້ ບໍລິສັດດັ່ງກ່າວ ໄດ້ສ້າງໂອກາດໃຫ້ຊຸມຊົນທ້ອງ ຖິ່ນນັບແຕ່ການຈ້າງງານຈົນເຖີງການກໍ່ສ້າງພື້ນ ຖານໂຄງລ່າງຕ່າງໆ ໂດຍໄດ້ຈັດສັນງົບປະມານ 3 ແສນ 8 ໝື່ນກວ່າໂດລາສະຫະລັດຕໍ່ປີເຂົ້າໃນໂຄງການທຶນພັດທະນາຊຸມຊົນ ແລະ ຈະໃນຕໍ່ໜ້າເພີ່ມ ຂຶ້ນເປັນ 7 ແສນ 5 ໝື່ນໂດລາສະຫະລັດຕໍ່ປີ, ໃນນີ້ ນັບແຕ່ປີ 2002-2022 ໄດ້ຈັດຕັ້ງ 436 ໂຄງການ, ໂດຍສຸມໃສ່ 6 ຂະແໜງການສໍາຄັນ ຄື: ກະສິກໍາ, ສຶກສາ, ສາທາລະນະສຸກ, ໂຄງລ່າງພື້ນ ຖານ, ການພັດທະນາທຸລະກິດທ້ອງຖິ່ນ ແລະ ການເຂົ້າເຖີງການ ເງິນ .
ສໍາລັບບໍລິສັດ ພູເບ້ຍ ມາຍນິ່ງ ຈໍາກັດ ມີໂຄງການຂຸດຄົ້ນ 2 ໂຮງງານໃນເຂດສໍາປະທານແຂວງໄຊສົມບູນ ຄື: ໂຄງການຂຸດຄົ້ນ- ປຸງແຕ່ງທອງ-ຄໍາພູຄໍາ ແລະໂຄງການ ຂຸດຄົ້ນ-ປຸງແຕ່ງຄໍາ-ເງິນ ບ້ານຫ້ວຍຊາຍ.
Cr: BT, ວສລ
