ບໍລິສັດລາວທາດຫຼວງລົງທຶນພັດທະນາ ຈຳກັດ ຈັດພີທີວາງສີລາລຶກໂຄງການກໍ່ສ້າງສະໜາມກ໊ອຟຢູ່ເຂດເສດຖະກິດພິເສດບຶງທາດຫຼວງ ໃນວັນທີ 29 ທັນວາ 2023 ໂດຍມີທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ຫວງກົວປີ່ງ ປະທານ ບໍລິສັດລາວທາດຫຼວງລົງ ທຶນພັດທະນາ ຈຳກັດ ຊື່ງເປັນຜູ້ພັດທະ ນາເຂດເສດຖະກິດພິເສດບຶງທາດຫລວງ ພ້ອມດ້ວຍການນໍານະຄອນຫລວງວຽງ ຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຫວງກົວປີ່ງ ແຈ້ງໃຫ້ຮູ້ວ່າ: ການກໍ່ສ້າງສະຫນາມກ໋ອຟ 18 ຂຸມ ຢູ່ໃນໃຈກາງເມືອງຂອງເຂດ ເສດຖະກິດພິເສດບຶງທາດຫຼວງ ເປັນປັດໃຈສໍາຄັນໃນການພັດທະນາເຂດເສດຖະກິດພິເສດບຶງທາດ ຫລວງ ນີ້ບໍ່ພຽງແຕ່ເປັນສະຖານທີ່ ໃນການເຄື່ອນໄຫວກິດຈະການກິລາເທົ່ານັ້ນ, ແຕ່ຍັງເປັນອົງປະ ກອບໃນການພັດທະນາຕົວເມືອງ ແລະ ເປັນຈຸດເດັ່ນອັນໃໝ່ຂອງແຫຼ່ງທ່ອງທ່ຽວ. ໃນເຂດອ້ອມ ຂ້າງຂອງສະໜາມກ໊ອຟບຶງທາດຫຼວງຈະປະກອບມີໂຮງແຮມລະດັບສູງ, ສະຖານທີ່ບັນເທີງ, ຮ້ານ ອາຫານ, ສູນການຄ້າການທ່ອງທ່ຽວລະດັບສາ ກົນ, ແລະ ຮ້ານຄ້າປອດພາສີອື່ນໆ ມູນຄ່າການລົງ ທຶນຄາດຄະເນ ປະມານ 400 ລ້ານ ໂດລາສະຫະລັດ. ສະໜາມກ໊ອຟດັ່ງກ່າວ ຈະກາຍເປັນ Land mark ແຫ່ງໃໝ່ຂອງແຫຼ່ງທ່ອງທ່ຽວໃນນະຄອນຫຼວງວຽງຈັນ.
ໂອກາດນີ້ທ່ານ ສອນປະເສີດ ດາລາວົງ, ຫົວໜ້າຫ້ອງການສົ່ງເສີມ ແລະຄຸ້ມຄອງເຂດເສດຖະກິດພິເສດ ກະຊວງແຜນການ ແລະການລົງທືນ ກ່າວວ່າ: ໂຄງການກໍ່ສ້າງສະໜາມກ໊ອຟຢູ່ເຂດເສດຖະກິດພິເສດບຶງທາດຫຼວງນີ້ ແມ່ນເປັນການສ້າງສິ່ງອໍານວຍຄວາມສະດວກປິ່ນອ້ອມບັນດາກິດຈະການທີ່ລົງ ທຶນພາຍໃນເຂດ ເພື່ອດຶງດູດການລົງທຶນ ແລະ ສົ່ງເສີມດ້ານການທ່ອງທ່ຽວ ໃຫ້ຄົນພາຍໃນ ແລະ ຕ່າງ ປະເທດເຂົ້າມາສຳພັດກັບກິດຈະກຳທີ່ຫຼາກຫຼາຍສີສັນຢູ່ພາຍໃນເຂດ. ໂຄງການສະໜາມກ໊ອຟບຶງທາດຫຼວງ ມີເນື້ອທີ່ປະມານ 1/3 ຂອງເນື້ອທີ່ທັງໝົດຂອງໂຄງການເຂດ ເສດຖະກິດພິເສດບຶງທາດຫຼວງ. ໂຄງການພັດທະນາເຂດເສດຖະກິດພິເສດບຶງທາດຫຼວງ ເປັນໜຶ່ງໃນ 21 ເຂດເສດຖະກິດພິເສດ ແລະ ໜຶ່ງໃນ 5 ເຂດເສດຖະກິດພິເສດ ທີ່ຕັ້ງຢູ່ໃຈກາງນະຄອນຫຼວງວຽງຈັນ, ທີ່ໄດ້ຮັບບຸລິມະສິດພິເສດ ຕາມນະໂຍບາຍຂອງລັດຖະບານ, ສ້າງຕັ້ງຂຶ້ນ ໃນວັນທີ 28 ທັນວາ 2011, ຊຶ່ງໂຄງການດັ່ງກ່າວໂດຍອີງຕາມສັນຍາທີ່ລັດຖະບານໄດ້ເຊັນ ກັບບໍລິສັດ ອະສັງຫາລິມະຊັບ ວ້ານເພີ່ງ ຊ່ຽງໄຮ້ ສປ ຈີນ ຈຳກັດ ເປັນເອກະຊົນຕ່າງປະເທດຖືຮຸ້ນ 100% ມີອາຍຸສຳປະທານ 99 ປີ, ເນື້ອທີ່ຂອງໂຄງການແມ່ນ 365 ຮຕ, ເປົ້າໝາຍການພັດທະນາໂຄງການເພື່ອສ້າງໃຫ້ເຂດເສດຖະກິດ ພຽບພ້ອມໄປດ້ວຍສິ່ງອໍານວຍຄວາມສະດວກຮອງຮັບໃຫ້ແກ່ຜູ້ລົງທຶນ, ນິຕິບຸກຄົນ ແລະ ບຸກຄົນທັງ ພາຍໃນ ແລະ ຕ່າງປະເທດ, ເປັນເຂດຕົວເມືອງທ່ອງທ່ຽວທີ່ທັນສະໄໝ, ສະຫງົບປອດໄພ, ເປັນຕົວເມືອງສີຂຽວມີ ໜອງນໍ້າໃຫ່ຍ 50 ເຮັກຕາ, ມີບ່ອນຍ່າງຊົມທິວທັດທີ່ສວຍງາມ, ສ້າງສູນການຄ້າ ແລະ ການບໍລິການ, ທີ່ພັກອາໃສ, ຮ້ານຄ້າ, ຮ້ານອາຫານ, ທະນາຄານ, ໂຮງແຮມ, ໂຮງຮຽນນາໆຊາດ ແລະ ໂຮງໝໍສາກົນທີ່ທັນສະໄໝ; ໂຄງການສ້າງພະພຸດທະຮູບໃຫຍ່ 108 ແມັດ ກາງໜອງນໍ້າໃຫຍ່ ເປັນໂຄງ ການທີ່ສາມາດສ້າງວຽກເຮັດງານທໍາທາງກົງ ແລະ ທາງອ້ອມໃຫ້ແກ່ສັງຄົມ ແລະ ເປັນຖານແຫຼ່ງລາຍຮັບທີ່ສໍາຄັນເຊັ່ນ: ອາກອນເງິນເດືອນ; ອາກອນມູນຄ່າເພີ່ມ ໃຫ້ສູນກາງ ແລະ ທ້ອງຖິ່ນໃນອະນາຄົດ.
