ບໍລິສັດວັງຕັດຂຸດຄົ້ນບໍ່ແຮ່ ຈຳກັດ ໄດ້ມອບເຄື່ອງຊ່ວຍເຫຼືອໃຫ້ປະຊາຊົນ ທີ່ຖືກນໍ້າຖ້ວມ ຈາກພະຍຸໂນຣູ ຢູ່ແຂວງອັດຕະປື,ເຄື່ອງຊ່ວຍເຫຼືອທີ່ທາງບໍລິສັດບໍ່ຄໍາວັງຕັດຂຸດຄົ້ນບໍ່ແຮ່ ຈໍາກັດນໍາມາມອບເທື່ອນີ້ປະກອບມີ: ເຂົ້າສານ ຈຳນວນ 10 ໂຕນ ແລະ ໝີ່ ສຳເລັດຮູບ ຈຳນວນ 1.000 ແກັດ,ລວມເຄື່ອງຊ່ວຍເຫຼືອທັງໝົດມີມູນຄ່າ 150 ລ້ານກີບ.
ພິທີອມ-ຮັບໄດ້ຈັດຂື້ນຢ່າງເປັນທາງການເມື່ອວັນທີ 1 ຕຸລາ 2022 ທີ່ພະແນກແຮງງານ ແລະ ສະຫວັດດີການສັງຄົມແຂວງ,ໂດຍການກ່າວມອບຂອງ ທ່ານ ບຸນໂຮມ ພັນທະມາລາ ຕາງໜ້າບໍລິສັດບໍ່ຄຳວັງຕັດຂຸດຄົ້ນບໍ່ແຮ່ ຈຳກັດ ແລະ ກ່າວຮັບໂດຍທ່ານ ໄຊຍະລາດ ຊຸມພົນພັກດີ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ,ໂດຍຊ້ອງໜ້າພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ . ເຊິ່ງເຄື່ອງທີ່ນຳມາມອບໃນຄັ້ງນີ້ ທາງພະແນກແຮງງານ ແລະ ສະຫວັດດີການສັງຄົມແຂວງອັດຕະປື ຈະໄດ້ນຳໄປມອບຕໍ່ ໃຫ້ປະຊາຊົນທີ່ຖືກຜົນກະທົບ ຈາກນໍ້າຖ້ວມ ເພື່ອແບ່ງເບົາຊີວິດການເປັນຢູ່ຂອງປະຊາຊົນ ໃຫ້ໄດ້ຮັບການຟື້ນຟູກັບຄືນສູ່ສະພາບປົກກະຕິໂດຍໄວ .
ສໍາລັບແຂວງອັດຕະປື ພາຍຸໃຕ້ຝຸ່ນໂນຣູ ໄດ້ຜັດເຂົ້າໃນຄໍ້າຄືນວັນທີ 27 ຈົນຮອດຕອນເຊົ້າວັນທີ 28 ກັນຍາ 2022 ເກີດມີຝົນຕົກໜັກເຮັດໃຫ້ 4 ເມືອງໄດ້ຮັບຜົນກະທົບ ຄື: ເມືອງສາມັກຄີໄຊ,ເມືອງພູວົງ,ຊານໄຊ ແລະ ເມືອງສະໜາມໄຊ . ຕາມຂໍ້ມູນເບື້ອງຕົ້ນໃຫ້ຮູ້ວ່າ: ເມືອງທີ່ໄດ້ຮັບຜົນກະທົບໜັກທີ່ສຸດ ແມ່ນເມືອງຊານໄຊ ແລະ ເມືອງສະໜາມໄຊ,ປັດຈຸບັນຄະນະກໍາມະການຄຸ້ມຄອງໄພພິບັດຂັ້ນແຂວງ,ເມືອງ ຍັງຢູ່ໃນຂັ້ນຕອນການເກັບກໍາຂໍ້ມູນລະອຽດ ກ່ຽວກັບຄວາມເສຍຫາຍ. ພ້ອມນີ້ອຳນາດການປົກຄອງ ແລະ ພາກສ່ວນກ່ຽວຂ້ອງ ກຳລັງເລັ່ງໃຫ້ການຊ່ວຍເຫລືອປະຊາຊົນທີ່ໄດ້ຮັບຜົນກະທົບ .
ຂ່າວ: ສິດຕິພອນ
