ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບໍລິສັດເຄເບິ້ນ TV ອຸດົມໄຊ ມອບເຄື່ອງປ້ອງກັນພະຍາດ ໂຄວິດ 19 ແລະ ນ້ຳດື່ມ ໃຫ້ພະແນກ ຖວທ ແຂວງອຸດົມໄຊ

ຕອນແລງວັນທີ 7 ເມສາ 2020 ຢູ່ທີ່ຫ້ອງປະຊຸມ ພະແນກ ຖວທ ແຂວງອຸດົມໄຊ ໄດ້ມີພິທີ ມອບ – ຮັບ ເຄື່ອງປ້ອງກັນພະຍາດໂຄວິດ 19 ແລະ ນໍ້າດື່ມ ລະຫວ່າງ  ບໍລິສັດເຄເບິ້ນ TV ອຸດົມໄຊ ກັບ ພະແນກ ຖວທ ແຂວງອຸດົມໄຊ.

ທ່ານ ເຮີຢີຫົງ ປະທານ ບໍລິສັດເຄເບິ້ນ TV ອຸດົມໄຊ ກ່າວວ່າ: ການນຳເອົາເຄື່ອງປ້ອງກັນ ພະຍາດໂຄວິດ 19 ມາມອບໃຫ້ກັບພະແນກ ຖວທ ແຂວງອຸດົມໄຊ ໃນຄັ້ງນີ້ ກໍເພື່ອປະກອບສ່ວນ ເຂົ້າໃນວຽກງານປ້ອງກັນ ແລະ ສະກັດກັ້ນ ພະຍາດດັ່ງກ່າວ ເນື່ອງຈາກພະແນກ ຖວທ ແຂວງເປັນພະແນກໜຶ່ງ ທີ່ມີຄວາມສ່ຽງ ແລະ ໄດ້ເຄື່ອນໄຫວຈັດຕັ້ງປະຕິບັດວຽກງານແບບປະເຊີນໜ້າ ໂດຍສະເພາະແມ່ນ ພະນັກງານສື່ມວນຊົນ ດັ່ງນັ້ນ ຈຶ່ງຈຳເປັນຕ້ອງມີເຄື່ອງມື,ອຸປະກອນ ໃນການປ້ອງກັນ ແລະ ສະກັດກັ້ນ ພ້ອມທັງນ້ຳຢາຂ້າເຊື້ອພະຍາດ. ອີກຢ່າງຫນຶ່ງ ທັງສອງພາກສ່ວນເຮັດຫນ້າທີ່ໃນຮູບແບບດຽວກັນ ແລະ ມີການພົວພັນ, ຊ່ວຍເຫຼືອເຊິ່ງກັນ ແລະ ກັນມາໂດຍຕະຫຼອດ. ເຊິ່ງເຄື່ອງທີ່ນຳມາມອບໃນຄັ້ງນີ້ ປະກອບມີ ຜ້າອັດປາກ – ດັງ 1,200 ແຜ່ນ, ນໍ້າຢາຂ້າເຊື້ອ 7 ຕຸກ ລວມ 175 ລິດ, ເຫລົ້າ 90 ຈໍານວນ 10 ຕຸກ ລວມ 29 ລິດ, ເຄື່ອງແທກອຸນຫະພູມ 1 ອັນ ແລະ ນໍ້າດື່ມ ຕຸກນ້ອຍ ຈໍານວນ 20 ແກັດ ລວມເປັນມູນຄ່າທັງຫມົດ 2 ຫມື່ນຢວນ ຫຼື ເທົ່າກັບ 26 ລ້ານກີບ. ໃຫ້ກຽດມອບໂດຍທ່ານ ເຮີຢີຫົງ ປະທານ ບໍລິສັດເຄເບິ້ນ TV ອຸດົມໄຊ ແລະ ຮັບໂດຍທ່ານ ນາງ ວັນສີ ພວງມະໄລ ຮອງຫົວໜ້າພະແນກ ຖວທ ແຂວງອຸດົມໄຊ ໂດຍມີ ພະນັກງານ ວິຊາການທັງສອງຝ່າຍເຂົ້າຮ່ວມນຳ.

ໂອກາດດັ່ງກ່າວ ທ່ານ ນາງ ວັນສີ ພວງມະໄລ ຮອງຫົວໜ້າພະແນກ ຖວທ ແຂວງອຸດົມໄຊ ຕາງໜ້າຄະນະພັກ, ຄະນະນຳ ແລະ ພະນັກງານ ລັດຖະກອນ ພາຍໃນພະແນກ ຖວທ ກ່າວຂອບໃຈ ຕໍ່ບໍລິສັດ ເຄເບິ້ນ TV ອຸດົມໄຊ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້ ແລະ ຈະນໍາເອົາເຄື່ອງດັ່ງກ່າວ ໄປນໍາໃຊ້ ເຂົ້າໃນການປ້ອງກັນ ແລະ ຂ້າເຊື້ອພະຍາດ ຢູ່ຕາມຈຸດຕ່າງໆ ແລະ ສະຖານທີ່ ທີ່ຕົນເອງຮັບຜິດຊອບ ໃຫ້ໄວທີ່ສຸດ ແລະ ຫວັງວ່າຈະໄດ້ຮັບການຊ່ວຍເຫຼືອແບບນີ້ໃນຕໍ່ຫນ້າ.

ຂ່າວຈາກ: ຄານມະນີ ຮຽນດໍຈັນ