ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ບໍລິສັດເບຍລາວ ມອບເງິນຊ່ວຍເຫຼືອໃຫ້ລັດຖະບານ ເພື່ອແກ້ໄຂການແຜ່ລະບາດຂອງພະຍາດ ໂຄວິດ-19

ໃນຕອນເຊົ້າມື້ນີ້ ວັນທີ 26 ມີນາ 2020 ທີ່ສຳນັກງານນາຍົກລັດຖະມົນຕີ, ນະຄອນຫຼວງວຽງຈັນ, ບໍລິສັດເບຍລາວຈໍາກັດ ໄດ້ນຳເງິນຈຳນວນ 2 ຕື້ກີບ ມາມອບໃຫ້ລັດຖະບານລາວ ເພື່ອປະກອບສ່ວນສະໜັບສະໜູນມາດຕະການໃນການຮັບມື ແລະ ຄວບຄຸມການແຜ່ລະບາດຂອງເຊື້ອພະຍາດ ໂຄວິດ-19 ໃນສປປ ລາວ.

ກ່າວມອບເງິນຊ່ວຍເຫຼືອໃນຄັ້ງນີ້ ແມ່ນ ທ່ານ ສູນທອນ ພົມມະຈັກ, ປະທານບໍລິສັດເບຍລາວຈໍາກັດ ແລະ ກ່າວຮັບແມ່ນ ທ່ານ ສົມດີ ດວງດີ, ຮອງນາຍົກລັດຖະມົນຕີ ແລະ ລັດຖະມົນຕີກະຊວງການເງິນ, ທັງເປັນຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂພະຍາດອັກເສບປອດຈາກເຊື້ອຈຸລະໂລກ ຫຼື ໂຄວິດ-19,ໂດຍການເຂົ້າຮ່ວມຂອງບັນດາພາກສ່ວນທີ່ກ່ຽວຂ້ອງຂອງທັງສອງຝ່າຍ.

ໃນໂອກາດນີ້, ທ່ານສົມດີ ດວງດີ ກໍ່ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ກ່າວສະແດງຄວາມຂອບໃຈຕໍ່ການຊ່ວຍເຫຼືອດັ່ງກ່າວຂອງບໍລີສັດເບຍລາວຈຳກັດ, ໂດຍມີຄວາມເຊື່ອໝັ້ນວ່າການປະກອບສ່ວນດັ່ງກ່າວ ຈະຊ່ວຍເຮັດໃຫ້ການຊ່ວຍເຫຼືອແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ຢູ່ປະເທດລາວເຮົາໃນຄັ້ງນີ້ ຈະຜ່ານພົ້ນໄປດ້ວຍດີ ໂດຍເງິນດັ່ງກ່າວແມ່ນຈະຖືກນໍາໃຊ້ຕາມຈຸດປະສົງເປົ້າໝາຍຢ່າງມີປະສິດທິຜົນ ແລະ ເກີດປະໂຫຍດສູງສຸດ.

ໃນໂອກາດດຽວກັນ, ທ່ານ ສູນທອນ ພົມມະຈັກ ໄດ້ກ່າວວ່າ: ບໍລິສັດເບຍລາວຂອງພວກເຮົາມີຄວາມເປັນຫ່ວງເປັນໄຍຕໍ່ລັດຖະບານ ແລະ ຮັບຮູ້ເຖິງການແຜ່ລະບາດຢ່າງຮ້າຍແຮງຂອງເຊື້ອພະຍາດໂຄວິດ-19 ທີ່ເກີດຂຶ້ນໃນທົ່ວໂລກ ລວມທັງ ຢູ່ສປປ ລາວ ຂອງພວກເຮົາ, ດັ່ງນັ້ນ ພວກເຮົາຈຶ່ງຂໍເປັນສ່ວນໜຶ່ງໃນການສະໜັບສະໜູນ ລັດຖະບານລາວ ທີ່ກໍາລັງຮັບມືກັບການແຜ່ລະບາດຂອງເຊື້ອພະຍາດດັ່ງກ່າວນີ້.

ສຳລັບພາຍໃນບໍລິສັດເບຍລາວ ກໍ່ໄດ້ເອົາໃຈໃສ່ປະຕິບັດຕາມມາດຕະການຕ່າງໆ ທີ່ທາງລັດຖະບານວາງອອກ ໃນແຕ່ລະໄລຍະ ຢ່າງເຄັ່ງຄັດ ເພື່ອໃຫ້ແນ່ໃຈວ່າພະນັກງານທັງໝົດຂອງບໍລິສັດເບຍລາວ ຕ້ອງໄດ້ຮັບຮູ້ຂໍ້ມູນຂ່າວສານ ແລະ ມີການຝຶກອົບຮົມເບື້ອງຕົ້ນໃນການຮັບມື ແລະ ປ້ອງກັນການແຜ່ລະບາດຂອງເຊື້ອພະຍາດດັ່ງກ່າວ, ໂດຍມາດຕະການທີ່ມີຄວາມປອດໄພ ແມ່ນໄດ້ຖືກນໍາມາປະຕິບັດພາຍໃນໂຮງງານ, ເຊິ່ງທາງຄະນະຜູ້ບໍລິຫານບໍລິສັດກໍ່ໄດ້ມີການສົ່ງຂ່າວໃຫ້ພະນັກງານຢ່າງທັນການ, ລວມທັງ ຄໍາແນະນໍາຕ່າງໆຂອງອົງການອານາໄມໂລກເພື່ອໃຫ້ພະນັກງານ ແລະ ກຳມະກອນຂອງບໍລີສັດ ຮູ້ຈັກປ້ອງກັນຕົນເອງ ແລະ ຄອບຄົວໃຫ້ມີຄວາມປອດໄພທີ່ສຸດ.

 

ຂ່າວ;ພາບ: ກົມປະຊາສຳພັນ ສຫນຍ