ບໍລິສັດເພັດສະໝອນກໍ່ສ້າງເຄຫາສະຖານຂົວທາງ ແລະຊົນລະປະທານຈຳຈັດ ມອບເງິນຈຳນວນ 100 ລ້ານກີບ ເພື່ອຊຸກຍູ້ ແລະສະໜັບສະໜູນກອງປະຊຸມໃຫ່ຍຜູ້ແທນທົ່ວປະເທດຄັ້ງທີ 11 ຂອງພັກໃນວັນທີ 14 ມັງກອນນີ້, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ໂດຍການກ່າວມອບຂອງທ່ານ ນາງ ເພັດສະໝອນ ແສງສະຫວ່າງ, ປະທານບໍລິສັດເພັດສະໝອນກໍ່ສ້າງເຄຫາສະຖານຂົວທາງ ແລະຊົນລະປະທານຈຳຈັດ ແລະ ທ່ານ ບຸນໂຈມ ອຸບົນປະເສີດ ເລຂາຄະນະບໍລິຫານງານພັກກະຊວງການເງິນ, ທັງເປັນຫົວໜ້າອານຸກໍາມະການງົບປະມານຮັບໃຊ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 11 ຂອງພັກ ເປັນຜູ້ກ່າວຮັບ.
ໃນພິທີມອບຮັບເງິນໃນຄັ້ງນີ້ທ່ານ ນາງ ເພັດສະໝອນ ແສງສະຫວ່າງ, ປະທານບໍລິສັດເພັດສະໝອນກໍ່ສ້າງເຄຫາສະຖານຂົວທາງ ແລະຊົນລະປະທານຈຳຈັດ ໃຫ້ສຳພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວວ່າ: ຮູ້ສຶກພູມໃຈຫລາຍທີ່ໄດ້ປະກອບສ່ວນຊຸກຍູ້ກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ 11 ຂອງພັກໃນຄັ້ງນີ້ ເນື່ອງຈາກພາຍໃຕ້ການຊີ້ນໍາໆພາຂອງພັກປະຊາຊົນປະຕິວັດລາວ ຈີ່ງເຮັດໃຫ້ການເຄື່ອນໄຫວດຳເນີນທຸລະກິດຂອງບໍລິສັດດຳເນີນໄປຢ່າງສະດວກ ແລະມີຜົນສຳເລັດເປັນກ້າວໆມາ.
ກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ 11 ຂອງພັກ ຈັດຂື້ນຢ່າງເປັນທາງການລະຫວ່າງວັນທີ 13 ຫາ 15 ມັງກອນນີ້, ທີ່ນະຄອນຫລວງວຽງຈັນ ມີພາກສ່ວນຕ່າງໆທັງພາກລັດ ແລະ ເອກະຊົນ, ບຸກຄົນ, ນິຕິບຸກຄົນ, ການຈັດຕັ້ງ, ບໍລິສັດ, ກຸ່ມບໍລິສັດຕ່າງໆ ຈຳນວນ 26 ພາກສ່ວນ ໄດ້ແຈ້ງເຈດຈຳນົງໃນການປະກອບສ່ວນເປັນວັດຖຸ ແລະ ປັດໄຈ ເພື່ອຮັບໃຊ້ໃຫ້ແກ່ກອງປະຊຸມ. ມາຮອດປັດຈຸ ບັນ ໄດ້ປະກອບສ່ວນແລ້ວ 21 ພາກສ່ວນ ລວມຈຳນວນເງິນທັງໝົດ 14 ຕື້ກວ່າກີບ ແລະ ມອບເປັນວັດຖຸ ລວມມູນຄ່າ 240 ລ້ານກີບ ແລະ ບາງພາກສ່ວນຍັງຈະສືບຕໍ່ປະກອບສ່ວນຊຸກຍູ້ຕື່ມອີກ.
 
ຂ່າວ: ຈັນທະສອນ ສີຫານາດ
Loading...